ភ្នំពេញ ៖ លោក អ៊ុំ សំអាន ដែលកំពុងជាប់ពន្ធនាគារ ចង់ឱ្យសម្ដេចនាយករដ្ឋមន្ត្រី ហ៊ុន សែន ចូលបំភ្លឺដោយផ្ទាល់ក្នុងរដ្ឋសភាជាមួយនឹងលោក ជាជាងចាត់ តំណាងចូលបំភ្លឺជំនួសករណី ដីសម្បាទានសេដ្ឋកិច្ចមួយកន្លែងនៅខេត្តរតនគីរីដែលលោកថាមានវត្តមានកងទ័ពវៀតណាមគ្រប់គ្រងលើដីនោះ ។ លោកថា នាយករដ្ឋមន្ត្រីជាអ្នកទទួលខុសត្រូវខ្ពស់បំផុតក្នុងរឿងនេះ ។ នេះបើយោងតាមលោក មាំុ ម៉ាជីកូ ដែលបានប្រាប់វិទ្យុស្ត្រីនៅថ្ងៃទី១១ខែឧសភានេះ ។ បែបនេះក្ដីមន្ត្រីរដ្ឋាភិបាលឆ្លើយតបថា សម្ដេចនាយករដ្ឋមន្ត្រីស្វាគមន៍ជានិច្ច នៅពេលដែលលោក អ៊ុំ សំអាន ចេញពីពន្ធធនាគារវិញ ។ លោកកែវ សុខា ជូនសេចក្ដីរាយការណ៍ ៖
ជំនួយការម្នាក់របស់លោក អ៊ុំ សំអាន អ្នកតំណាងរាស្ត្រគណបក្សប្រឆាំងដែលកំពុងជាប់ឃុំនៅ ពន្ធធនាគារ ករណីរឿងផែនទីព្រំដែនជាមួយវៀតណាមបានអះអាងថា លោក អ៊ុំ សំអាន ទទូចឱ្យប្រមុខរដ្ឋាភិបាល បំភ្លឺដោយផ្ទាល់ចំពោះការចោទសួររបស់លោក នៅក្នុងរដ្ឋសភាទាក់ទងទៅនឹងការចោទសួរពីវត្តមានរបស់ទ័ពវៀតណាមនៅលើតំបន់ដីសម្បទាននៅកម្ពុជា ។
លោក មាំុ ម៉ាជីកូ បានបញ្ជាក់ដូចនេះក្នុងបទសម្ភាសន៍ខ្លីមួយជាមួយវិទ្យុស្ត្រីកាលពីថ្ងៃម្សិលមិញ នូវអ្វីដែលជាការឆ្លើយតបលិខិតរបស់សម្តេចនាយករដ្ឋមន្ត្រី ផ្ញើជូនប្រធានរដ្ឋសភា ជុំវិញការចាត់បញ្ជូនអ្នកជំនាញរបស់រដ្ឋាភិបាល ដើម្បីបំភ្លឺសំនួររបស់អ្នកតំណាងរាស្ត្របក្សប្រឆាំងរូបនេះ អំពីដីតំបន់សម្បទាននៅរតនគីរីថាជាជំរកកងទ័ពវៀតណាម ។ លោក មាំុ ម៉ាជីកូ បានបញ្ជាក់ទៀតថា លោកបានទទួលការណែនាំដូចនេះ ពីលោក អ៊ុំ សំអាន នៅពេលលោក បានទៅសួរសុខទុក្ខកាលពីថ្ងៃអង្គារទី១០ឧសភា ។ លោកបានបន្ថែមថា លោក អ៊ុំ សំអាន ចង់ឆ្លើយនឹងសាកសួរផ្ទាល់ទៅសម្តេចនាយករដ្ឋមន្ត្រី ជាជាងអ្នកផ្សេងទៀត ។
លោក មាំុ ម៉ាជីកូ ៖ «កាលពីម្សិលមិញ ខ្ញុំបានទៅសួរសុខទុក្ខគាត់ ខ្ញុំបានជំរាបគាត់អំពីការឆ្លើយតបរបស់នាយករដ្ឋមន្ត្រីហ្នឹង គាត់ក៏បានផ្តាំផ្ញើវិញថា ប្រសិនណានៅពេលដែលគាត់រួចផុតពីការឃុំខ្លួន ហើយរួចផុតពីការពិន័យរដ្ឋបាលអាចចូលរួមប្រជុំវិញបានហ្នឹង គាត់ចង់ឱ្យសម្តេចនាយរដ្ឋមន្ត្រីចូលឆ្លើយបំភ្លឺដោយផ្ទាល់ចំពោះអង្គរដ្ឋសភា ជាជាងចាត់ឱ្យសមាសភាពរដ្ឋាភិបាលមកឆ្លើយជំនួយ ពីព្រោះក្នុងនាមគាត់ជាប្រមុខរាជរដ្ឋាភិបាល អញ្ចឹង!គាត់គឺជាអ្នកមានទំនួញខុសត្រូវខ្ពស់ក្នុងបញ្ហាហ្នឹង ។
សម្តេចនាយករដ្ឋមន្ត្រី ហ៊ុន សែន សរសេរថា នឹងបញ្ជូនតំណាងរដ្ឋាភិបាលទៅរដ្ឋសភាទាក់ទងនឹងសំណួររបស់លោក អ៊ុំ សំអាន នៅពេលដែលលោកមានវត្តមាននៅក្នុងកិច្ចប្រជុំសភា ។
សម្តេច ហ៊ុន សែន៖ «ចំពោះករណីនេះរាជរដ្ឋាភិបាលនឹងបញ្ជូនសមាសភាពរដ្ឋាភិបាលទៅបំភ្លឺដោយផ្ទាល់មាត់ជូនម្ចាស់សំណួរនៅរដ្ឋសភា តាមកាលបរិច្ឆេទសមរម្យណាមួយដែលរៀបចំដោយរដ្ឋសភា នៅពេលដែលឯកឧត្តម អ៊ុំ សំអាន មានវត្តមានក្នុងកិច្ចប្រជុំនោះ»។
លិខិតរបស់សម្តេចនាយករដ្ឋមន្ត្រី ផ្ញើជូនសម្តេច ហេង សំរិន ចុះថ្ងៃទី១៧មីនា គឺមុនលោក អ៊ុំ សំអាន ត្រូវបានចាប់ខ្លួននៅថ្ងៃទី១០មេសានៅខេត្តសៀមរាប ។ ចំណែកលិខិតដែលលោក អ៊ុំ សំអាន បានផ្ញើជូននាយករដ្ឋមន្ត្រីឱ្យឆ្លើយនឹងសំនួររួមមាន ៖
១/ហេតុអី្វបានជាកងទ័ពប្រជាជនវៀតណាមទទួលបានការគ្រប់គ្រងដីសម្បទានសេដ្ឋកិច្ចនៅខេត្តរតនគីរី?
២/តើវត្តមានកងទ័ពប្រជាជនវៀតណាមនៅលើដីសម្បទានសេដ្ឋកិច្ចដែលគ្រប់គ្រងដោយកងទ័ពប្រជាជនវៀតណាមនៅខេត្តរតនគីរីឬទេ?
៣/តើរាជរដ្ឋាភិបាលមានគម្រោងដកហូតដីសម្បទានសេដ្ឋកិច្ច ដែលគ្រប់គ្រងយកងទ័ពប្រជាជនវៀតណាមនៅខេត្តរតនគីរីឬទេ?
ពាក់ព័ន្ធក្នុងរឿងនេះ លោក ផៃ ស៊ីផាន អ្នកនាំពាក្យនៃទីស្តីការគណរដ្ឋមន្ត្រី លើកឡើងថា លោកនាយករដ្ឋមន្ត្រី ហ៊ុន សែន នឹងរងចាំឆ្លើយបំភ្លឺរាល់ការចោទសួររបស់លោក អ៊ុំ សំអាន ជានិច្ចនៅពេលដែលលោក អ៊ុំ សំអាន បានរួចផុតពីទោស នឹងវិលត្រលប់មកធ្វើការជាតំណាងរាស្ត្រវិញ ។ លោក ផៃ ស៊ីផាន បញ្ជាក់ថា ចំពោះការចូលបំភ្លឺ ឬមិនចូលបំភ្លឺដោយវត្តមាននាយករដ្ឋមន្ត្រី គឺជាសិទ្ធិរបស់សម្ដេចផ្ទាល់ ។ តែករណីនេះ លោកក៏ធ្លាប់បានការបំភ្លឺបានខ្លះៗហើយ ជូនរដ្ឋសភាដោយសម្ដេចហ៊ុនសែន ។
លោក ផៃ ស៊ីផាន៖«ដូច្នេះអាស្រ័យហេតុដូចនេះ បានជាសម្តេចនាយកសម្តេចលោករង់ចាំដើម្បីពន្យល់ម្តងទៀតផ្ទាល់មាត់ រីឯការលើកដេញដោលសួរអាហ្នឹងជាផ្សេងមួយទៀត ។ ការរង់ចាំដើម្បីដោះស្រាយនៅក្នុងអ្វីដែលកើតឡើង គឺនៅពេលដែលលោក អ៊ុំ សំអាន អាចចេញពីពន្ធធនាគារមក ហើយមកធ្វើកិច្ចជាតំណាងរាស្ត្រវិញ នោះសម្តេចនឹងបើកការសន្ទនាក្នុងរឿងនេះ» ។
រឿងព្រំដែនជាមួយប្រទេសវៀតណាម ត្រូវបានអ្នកវិភាគ នយោបាយ ចាត់ទុកថាជាបញ្ហាសំខាន់និង ជារបៀបវារៈនយោបាយ របស់គណបក្សប្រឆាំងដែលមិនអាចអត់បានឡើយ ។
លោក សូ ចន្ថា សាស្ត្រចារ្យវិទ្យាសាស្ត្រនយោបាយ លើកឡើងថាសម្ដេចនាយករដ្ឋមន្ត្រីគួរតែត្រូវបានចូលទៅបំភ្លឺដោយផ្ទាល់ រាល់ចម្ងល់របស់តំណាងរាស្ត្រ ព្រោះនាយករដ្ឋមន្ត្រីជាបុគ្គលសំខាន់ ដែលប្រជាជនចង់ដឹងពីជំហររបស់រដ្ឋាភិបាលក្នុងរឿងទឹកដី ។
លោក សូចន្ថា៖ «អ្នកតំណាងរាស្ត្រទូទៅ ក៏ដូចជាប្រជាពលរដ្ឋខ្មែរចង់លឺពីប្រសាសន៍របស់នាយករដ្ឋមន្ត្រីផ្ទាល់ ថាតើបញ្ហាទឹកដីហ្នឹងវាដូចម្ត៉េច? ថាតើចំណេញខ្មែរឬក៏ចំណេញប្រទេសជិតខាងនោះបាទ! » ។
បើតាមលិខិតរបស់លោកអ៊ុំសំអាន ផើ្ញជូនសម្ដេចនាយករដ្ឋមន្ត្រីចុះថ្ងៃទី៤មីនាឆ្នាំ២០១៦ ដោយស្រង់ សម្រង់ព័ត៌មានរបស់កាសែតខេមបូឌាឌដេលី ចុះផ្សាយថ្ងៃទី២៨ធ្នូឆ្នាំ២០១៥ សរសេរថា ដីសម្បទាននោះ ដំបូងប្រគល់ឱ្យក្រុមហ៊ុន កសិ-ឧស្សាហកម្មមួយ តែច្រើនឆ្នាំក្រោយធ្លាក់ចូលក្រោមការគ្រប់គ្រងមួយរបស់កងពល១៥ ជាសាខានៃប្រជាជនវៀតណាមមកពីខេត្តយ៉ាឡាយ ។ លិខិតរបស់លោក អ៊ុំ សំអាន បន្តថាដីសម្បទានសេដ្ឋកិច្ចនេះ មានទំហំ ជិត៤ម៉ឺនហិចតា ។
សូមជម្រាបថាលោក អ៊ុំ សំអាន កំពុងជាប់ឃុំនៅពន្ធនាគារព្រៃស ពីបទញុះញង់ឲ្យប្រព្រឹត្តបទឧក្រិដ្ឋ ជាអាទិ៍និងបទញុះញង់ ឲ្យមានការរើសអើងតាមមាត្រា៤៩៥និង៤៩៦នៃក្រមព្រហ្មទណ្ឌ ករណីលោកចោទថារដ្ឋាភិបាលប្រើប្រាស់ផែនទីក្លែងក្លាយ កំណត់ខ័ណ្ឌសីមាព្រំដែនគោកជាមួយប្រទេសវៀតណាម ។ បើតាមមាត្រានេះ លោកនឹងមានទោស ពី៦ខែទៅ២ឆ្នាំ ៕
