ភ្នំពេញ ៖ សាលាឧទ្ទរណ៍គ្រោងនឹង បើកសវនាការលើបណ្ដឹងសុំនៅក្រៅឃុំរបស់លោក អ៊ុំ សំអាន តំណាងរាស្ត្រគណបក្សសង្គ្រោះជាតិ មណ្ឌលខេត្តសៀមរាប នៅថ្ងៃទី១៧ខែឧសភា សប្ដាហ៍ក្រោយនេះ ។
មេធាវីការពារក្តីអោយលោក អ៊ុំ សំអាន គឺលោក ជួង ជូងី បានឱ្យវិទ្យុស្ត្រីដឹងនៅថ្ងៃទី១១ខែឧសភា ឆ្នាំ២០១៦ នេះថាសាលាឧទ្ទរណ៍មានគម្រោង បើកសវនាការរលើបណ្ដឹងសុំនៅក្រៅឃុំ របស់តំណាងរាស្ត្រគណបក្សសង្គ្រោះជាតិ លោក អ៊ុំ សំអាន នាសប្ដាហ៍ក្រោយនេះ ។ លោកបានបន្តថា តុលាការមិនគួរឃុំខ្លួនកូនក្តីរបស់លោក នោះទេព្រោះលោក អ៊ុំ សំអាន មានអភ័យឯកសិទ្ធិ និងមិនបានប្រព្រឹត្តិបទល្មើសអ្វីធំដុំនោះទេ ។ លោកថា៖ «តាមខ្ញុំជាមេធាវី ជាអ្នកច្បាប់ គឺគាត់អត់មានកំហុសផង ហើយម្យ៉ាងទៀត គាត់មានអភ័យឯកសិទ្ធិអត់ត្រូវចាប់គាត់ទេ» ។
លោក ជួង ជូងីបានទទួចឱ្យតុលាឯករាជ្យគោរពគោលការណ៏ និងអព្យាក្រឹត្យ ដោយមិនត្រូវប្រើអំណាចនោះទេ ។ «ខ្ញុំចង់ឱ្យគ្រប់ផ្នែក ទាំងរដ្ឋាភិបាល ទាំងរដ្ឋសភា ទាំងតុលាការបំពេញការងាររបស់ខ្លួនឱ្យឯករាជ្យកុំឱ្យរង់ឥទ្ឋិពលទៅវិញទៅមក ហើយទី២ឱ្យបំពេញឱ្យបានត្រឹមត្រូវតាមផ្លូវច្បាប់កុំប្រើអំណាច់ធ្វើអ្វីតាមអំនើងចិត្តរបស់ខ្លួន វាអាចផ្តល់ឱ្យមានផលលំបាកធ្ងន់ធ្ងរទៅៗសម្រាប់សង្គម» ។
លោក អ៊ុំ សំអាន ត្រូវបានតុលាការសាលាដំបូងរាជធានីភ្នំពេញ ចោទប្រកាន់ ពីបទមជ្ឈឹមដែលច្បាប់កំណត់ដាក់ពន្ធធនាគារស្មើ ឬលើសពីមួយឆ្នាំ ។
សូមរំលឹកថា លោក អ៊ុំ សំអាន ត្រូវបានសមត្ថកិច្ចចាប់ខ្លួនកាលពីយប់ថ្ងៃអាទិត្យ ឈានចូលថ្ងៃទី១១មេសា នៅខេត្តសៀមរាប មុនបញ្ជូនខ្លួនមកនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែននៃក្រសួងមហាផ្ទៃ ។ ក្រោយបញ្ចប់ការសាកសួររយៈពេល ១ថ្ងៃកន្លះ លោក អ៊ុំ សំអាន ត្រូវបានគេបញ្ជូនខ្លួនភ្លាមៗ ទៅគុកព្រៃស ដើម្បីរង់ចាំសវនាការបន្ត ៕
