ភ្នំពេញ ៖ បន្ទាប់ពីបង្ក្រាបលើពួកពាក់អាវខ្មៅឬហៅថាអ្នកធ្វើយុទ្ធនាការថ្ងៃចន្ទពណ៌ខ្មៅបានដោយជោគជ័យនៅថ្ងៃនេះសមត្ថកិច្ចបានចុះពិនិត្យរកមើលម៉ាស៊ីនបោះពុម្ពអាវយឺតពណ៌ខ្មៅ នៅស្នាក់ការសមាគមមួយនៅរាជធានីភ្នំពេញ។ ក្នុងពេលជាមួយគ្នានេះ សមត្ថកិច្ចក៏បានកោះហៅប្រធានសមាគមមួយរូបមកសាកសួរ ពាក់ព័ន្ធនឹងករណី យុទ្ធនាការថ្ងៃចន្ទពណ៌ខ្មៅ ។ មន្ដ្រីសិទ្ធិមនុស្សបានចាត់ទុកទង្វើរបស់សមត្ថកិច្ចនេះថា ជាសកម្មភាពថ្មីមួយទៀត បង្ក្រាបលើអង្គការសង្គមស៊ីវិលនៅកម្ពុជា ប៉ុន្ដែសមត្ថកិច្ចថាជាការត្រួតពិនិត្យធម្មតាតែប៉ុណ្ណោះ ។
សមត្ថកិច្ចក្រសួងមហាផ្ទៃនៅព្រឹកថ្ងៃទី ១១ ខែឧសភានេះ បានចុះត្រួតពិនិត្យស្នាក់ការសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ហៅកាត់ថា IDEA ពាក់ព័ន្ធនឹងយុទ្ធនាការពាក់អាវខ្មៅ ។
លោក វ៉ន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានប្រាប់ឱ្យដឹងថា ការចុះត្រួតពិនិត្យនេះបន្ទាប់ពីនាយកដ្ឋានកណ្តាលសន្តិសុខនៃក្រសួងមហាផ្ទៃបានហៅលោកទៅសាកសួរនៅប៉ុស្តិ៍ទឹកថ្លា ទាក់ទងនឹងយុទ្ធនាការ «ថ្ងៃចន្ទពណ៌ខ្មៅ» ។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធរូបនេះយល់ថា សកម្មភាពរបស់សមត្ថកិច្ចគឺជារូបភាពនៃការបំភិតបំភ័យដល់អង្គការសមាគមដែលធ្វើការតស៊ូមតិ ទាក់ទងនឹងសិទ្ធិនិងយុត្តិធម៌ ។
ស្របពេលពេលជាមួយគ្នានេះលោក វ៉ន ពៅ បញ្ជាក់ថាមានលិខិតចុះថ្ងៃទី ១០ ខែឧសភា ឆ្នាំ ២០១៦ របស់ប៉ុស្តិ៍នគរបាលរដ្ឋបាលទឹកថ្លា បានកោះហៅលោក ដើម្បីសួរនាំករណីមួយចំនួនពាក់ព័ន្ធយុទ្ធនាការអាវខ្មៅ ហើយបន្ទាប់មកសមត្ថកិច្ចបានមកពិនិត្យស្នាក់ការសមាគមរបស់លោក ។
ចំណែកលោក ព្រាប បុរី មន្ត្រីនាយកដ្ឋានកណ្តាលសន្តិសុខនៃក្រសួងមហាផ្ទៃ ដែលបានដឹកនាំការចុះត្រួតពិនិត្យនេះ មិនបានអះអាងពីការចុះត្រួតពិនិត្យនេះទេ ។
លោក ព្រាប បុរី ៖ «អត់ទេ ខ្ញុំគ្មានទៅទេ គ្រាន់ទៅសំណេះសំណាលជាមួយមិត្តភក្តិតើ មានអីទៅធ្វើការពារអីខ្ញុំ» ។
ទាក់ទិនបញ្ហានេះដែរ លោក អំ សំអាត ប្រធានផ្នែកស៊ើបអង្កេតរបស់អង្គការសិទ្ធិមនុស្សលីកាដូ មានប្រសាន៍ថាសកម្មនេះ គឺជាការគម្រាមកំហែងបំភិតបំភ័យ និងជាការរំលោភទៅលើសិទ្ធិរបស់អង្គការ សមាគម ។
លោកយល់ថាការហៅទៅសាកសួរ ក៏ដូចជាការចុះទៅឆែកឆេនេះ ធ្វើបានឱ្យប៉ះពាល់ដល់អង្គការសមាគមមួយចំនួន ។
ការកោះហៅលោក វ៉ន ពៅ និងការត្រូតពិនិត្យនេះធ្វើឡើងបន្ទាប់ពីមានយុទ្ធនាការ “ថ្ងៃចន្ទពណ៌ខ្មៅ” ក្នុងគោលបំណងទាមទារឱ្យមានការដោះលែងមន្ត្រីសិទ្ធិមនុស្ស០៤នាក់ និងអគ្គលេខាធិការរងគ.ជ.ប ម្នាក់ដែលត្រូវបានឃុំខ្លួន ក្រោយការចោទប្រកាន់របស់អង្គភាពប្រឆាំងអំពើពុករលួយពាក់ព័ន្ធរឿងរបស់នាង ខុម ចាន់តារ៉ាទី ហៅស្រីមុំ និងបុរសម្នាក់គេថាប្រធានស្តីទីគណបក្សសង្គ្រោះជាតិ លោក កឹម សុខា ៕
