ភ្នំពេញ ៖ កាលពីព្រឹកថ្ងៃអង្គារទី ១០ ឧសភានេះ សហគមន៍ថ្មគោលបានប្រមូលផ្តុំគ្នាដាក់ញត្តិទៅទីស្តីការគណៈរដ្ឋមន្ត្រី ដើម្បីជំរុញឱ្យជួយពន្លឿនការចុះហត្ថលេខាលើសៀវភៅផែនការឱ្យបានឆាប់ ដើម្បីឱ្យមានភាពងាយស្រួលដល់ សហគមន៍ក្នុងការសម្រេចចិត្ត ថាតើត្រូវចាកចេញឬស្នាក់នៅបន្តនៅកន្លែងដដែលទៀត ។ នៅពេលដាក់ញត្តិនេះ មានមន្ត្រីម្នាក់មកទទួល ប៉ុន្តែមិនបានបញ្ជាក់ថាត្រូវធ្វើតាមដែរទេ ។
តំណាងអ្នកដាក់ញត្តិអ្នកស្រី ភួង សុភាព បាននិយាយថា សហគមន៍របស់អ្នកស្រីទទួលរងការបង្កហេតុពីរដ្ឋាភិបាលជាង ០៤ឆ្នាំដែលជាហេតុធ្វើឱ្យប៉ះពាលដល់សេដ្ឋកិច្ចគ្រួសារចំនួន ៥៣១ គ្រួសារមិនអាចចេញទៅរកស៊ីបាន ។
អ្នកស្រីបានបន្តថាមកដល់ពេលនេះដីរបស់សហគមន៍អ្នកស្រីមិនមានតម្លៃនោះទេ បើរដ្ឋាភិបាល មិនបានអើពើរចុះហត្ថលេខាលើសៀវភៅផែនការនោះ ហើយជាងនេះទៅទៀតខាងអាកាសយាន្តអន្តជាតិភ្នំពេញនឹងដាក់ដីនៅជុំវិញនោះចូលក្នុងបញ្ជីខ្មៅ ។
ដូចគ្នានោះដែរលោក គង់ ផល្លា អ្នកតំណាងសហគមន៍ថ្មគោលផងដែរ បាននិយាយថាដោយសារតែ រង់ចាំ ដ៏យូរនេះហើយធ្វើឱ្យ ការប្រកបរបររបស់ពួកគាត់កាន់តែលំបាក ហើយមានអ្នកចំណាកស្រុកទៀតផង ។
នៅពេលជាមួយគ្នានេះ ទីប្រឹក្សាអមទីស្តីការគណៈរដ្ឋមន្ត្រីទទួលបន្ទុកពាក្យបណ្តឹង លោក សេង សាវន បានចេញមកទទួលញត្តិរបស់សហគមនថ្មគោលដោយ លោកថានឹងយកញតិ្តទៅជូនថ្នាក់លើធ្វើការពិចារណា ។
លោក សេង សាវន ៖« ម្ចាស់ដីឯកភាពទទួល១០០ ភាគរយយល់ ហើយនឹងពិភាក្សាជាមួយថ្នាក់ដឹកនាំ ប៉ុន្តែបើមកអ៊ីញ្ចីងធ្វើឱ្យសង្គមជាតិ ហើយបើលោកស្រីមកមានកូនឧទាហរណ៏គាត់ឈឺអីនរណាទទួលខុសត្រូវ» ។
លោកបានបន្តទៀតថា បើលើក្រោយចង់មកដាក់ញតិអីទៀត មិនចាំបាច់នាំគ្នាមកច្រើននោះទេ មកតែម្នាក់ឯងបានហើយ។ សូមបញ្ជាក់ថា សហគមន៍ថ្មគោល មានទីតាំងនៅ ភូមិថ្មគោល សង្កាត់ចោមចៅ ខណ្ឌពោធិ៍សែនជ័យរាជធានីភ្នំពេញ ៕
