ភ្នំពេញ ៖ ធនាគារជាតិកាណាដា នៅថ្ងៃទី៩ខែឩសភា ឆ្នាំ២០១៦ នេះបានប្រកាសចុះកិច្ចព្រមព្រៀងជាមួយនិងធនាគារ ABA នៅកម្ពុជា ដែលមានភាគហ៊ុនរហូតទៅដល់ ៩០% មានទឹកប្រាក់សរុបប្រមាណ ១៤៨លានដុល្លា ។ ការចុះកិច្ចព្រមព្រៀងនេះត្រូវបាន អ្នកជំនាញខាងវិស័យធនាគារទាំងពីរនេះសម្លឹងឃើញថា វិស័យសេដ្ឋកិច្ចកម្ពុជាកំពុងតែមានសន្ទុះខ្លាំងនិងមានធនធានធម្មជាតិអំណោយផល ស្របពេលដែលកម្ពុជាស្ថិតក្នុងសមាគមន អាស៊ាន ។
នេះជាលើកដំបូងហើយ ដែលស្ថាប័នហិរញ្ញវត្ថុបរទេសមួយនេះ បានកាន់កាប់ភាគហ៊ុនដ៏ធំក្នុងធនាគារកម្ពុជាហើយធ្វើឲ្យធនាគារ ABA មានការអភិវឌ្ឍកាន់តែខ្លាំង បន្ថែមទៅលើកម្រិតគុណភាពសេវាកម្មរបស់ខ្លួនមានស្រាប់ ។ តាមនីតិវិធី និងបទប្បញ្ញត្តិនានាធនាគារជាតិកាណាដា បានបង្កើតមូលធនរបស់ខ្លួនក្នុងធនាគារ ABA បន្ថែមតាមរយៈការទិញភាគហ៊ុន ពី៤០% ដល់៩០% ។
លោក Askhat Azhikhanov ជាអគ្គនាយកនៃធនាគារ ABA មានប្រសាសន៏ថា «កិច្ចព្រមព្រៀងជាមួយធនាគារជាតិកាណាដា គឺជាព្រឹត្តិការណ៏ប្រវត្តិសាស្ត្រដ៏សំខាន់ របស់ធនាគារABA ហើយក៏អាចនិយាយបានថាគឺជានិមិត្តរូប ដែលធនាគារជាតិកាណាដាបានក្លាយជាភាគហ៊ុនដ៏ធំ ខណៈមានការប្រារព្ធខួបគម្រប់២០ឆ្នាំរបស់ជាកម្ពុជាផងដែរ» ។
លោកក៏បានបន្ថែមទៀតថា ការទិញភាគហ៊ុនដោយធនាគារជាតិកាណាដា បានបង្ហាញឲ្យឃើញពីជំហរដ៏រឹងមាំក្នុងទីផ្សារ និងពីទំនុកចិត្តរបស់ដៃគូក្នុងយុទ្ធសាស្ត្រ និងការរីកចម្រើនរបស់ABA ហើយការចាប់ផ្ដើមបោះទុនចុងក្រោយនេះបានផ្ដល់ឲ្យនូវឱកាសទីផ្សារថ្មីដែលមិនធ្លាប់មានពីមុនមក និងលទ្ធភាពផ្ដល់ជូនបន្ថែមទៀត ដល់អតិថិជនដ៏មានតម្លៃរបស់កម្ពុជា ។
នៅក្នុងរយៈពេលប្រមាណជិតពីរឆ្នាំក្រោយពេលបានទទួលបានការវិនិយោគពីសំណាក់ ធនាគារជាតិកាណាដារួចមក ធនាគារ ABA បានបង្ហាញលទ្ធផលដ៏ល្អប្រសើរជាច្រើន ។ រហូតមកដល់សព្វថ្ងៃនេះ ធនាគារ ABA មានទ្រព្យសកម្មកើនដល់៩២៨លានដុល្លាអាមេរិក ហើយប្រាក់ចំណេញសុទ្ធរបស់ធនាគារ ABA បានកើនឡើងជាពីរដង ពោលគឺ៧,៥លានដុល្លាអាមេរិកនៅក្នុងឆ្នាំ២០១៤ កើនឡើងដល់ ១៦លានដុល្លាអាមេរិកនៅឆ្នាំ២០១៥កន្លងមកនេះ ។
លោក ល្វីស វាឆុង ជាប្រធាន និងជានាយកប្រតិបត្តិ ធនាគារជាតិកាណាដា មានប្រសាសន៏ថា «ធនាគារជាតិកាណាដា មានមោទនភាពដែលបានក្លាយជាម្ចាស់ភាគហ៊ុនដ៏ធំរបស់ធនាគារ ABA» ។
លោកបានបន្ថែមទៀតថា កម្ពុជាមានទស្សនវិស័យវែងឆ្ងាយនិងមានកំណើនសេដ្ឋកិច្ចល្អប្រសើរ ហើយធនាគារ ABA ក៏មានជំហរច្បាស់លាស់ក្នុងការទាញយកឱកាសដ៏ល្អនេះក្នុងការបន្តកំណើនចំណូលរបស់ខ្លួន ។
សូមបញ្ជាក់ថា ធនាគារជាតិកាណាដាបានបង្កើងឡើងតាំងពីឆ្នាំ១៨៥៩ ដោយសហគ្រិន និងសម្រាប់សហគ្រិន ។ បច្ចុប្បន្ន នេះគេបានបង្ហាញចេញលទ្ធផលផ្លែផ្កាដែលមិនធ្លាប់មានពីមុនមក គឺជាក់ស្ដែងផ្នែកដ៏សំខាន់មួយនៃប្រព័ន្ធរបស់ធនាគារកាណាដា គឹមានបុគ្គលិកកំពុងបម្រើការងារដ៏ច្រើន ដែលផ្ដល់សេវាជូនអតិថិជនគ្រប់ប្រភេទ រាប់តាំងពី បុគ្គលិកឯកជន ពាណិជ្ជកម្ម និងសាជីកម្មធំៗ ។
កម្ពុជាត្រូវបានទទួលស្គាល់ថា ជាប្រទេសដែលមានទស្សនវិស័យសេដ្ឋកិច្ចមានសន្ទុះខ្លាំងនិងមានធនធានធម្មជាតិអំណោយផល ស្របពេលដែលកម្ពុជាស្ថិតក្នុងសមាគមអាស៊ាន ដែលរួមមាន វប្បធម៌ជាសហគ្រិន ឫជាអ្នកផ្ដួចផ្ដើមអាជីវកម្ម និងជាបណ្ដាញអាជីវកម្ម ។ ទាំងអស់នេះជាហេតុផល ដែលទាក់ទាញធនាគារជាតិកាណាដាចូលមកប្រទេសកម្ពុជា ។
បើនិយាយពីយុទ្ធសាស្ត្ររបស់ធនាគារ ABAវិញ គឺបន្តពង្រឹងបណ្ដាញសាខា ដោយបច្ចុប្បន្នមាន សាខា៣៨ អាចផ្ដល់លទ្ធភាពផ្ដល់សេវាពេញលេញ និងអនុវត្តតាមយុទ្ធសាស្ត្ររបស់ធនាគារជាតិកាណាដា ដោយ ផ្ដោតយកចិត្តទូកដាក់ដាច់ដោយឡែកទៅលើសេវាផ្ដល់កម្ចី សម្រាប់សហគ្រាសធនតូចបំផុត តូច មធ្យម និងទៅលើផ្ដល់មូលនិធិចំពោះអតិថិជនលក់រាយ សាជីវកម្ម និងស្ថាប័ន ។
ធនាគារនេះនឹងបន្តលើកកម្ពស់គុណភាពសេវា ព្រមទាំងបង្កើនដំណោះស្រាយសេវាធនាគារឌីជីថលប្រកបដោយបច្ចេកវិទ្យាទំនើបផងដែរ ដូចជាការបង្កើតកម្មវិធីប្រើប្រាស់សេវាធនាគារតាមទូរស័ព្ទចល័ត សេវាធនាគារតាមអ៊ីនធឺណិត និងសេវាស្វ័យបម្រើជាច្រើនទៀត ៕
