ភ្នំពេញ ៖ អាជ្ញាធរខណ្ឌដង្កោរាជធានីភ្នំពេញ បានឃាត់ខ្លួនជនបរទេស២ រូបធ្វើការនៅក្នុង ស្ថាប័ន អង្គការសិទ្ធិមនុស្ស មួយនៅកម្ពុជា ខណៈពួកគេ ចុះសង្កេតការណ៍ យុទ្ធនាការសម្លៀកបំពាក់ ខ្មៅ ដើម្បីប្រឆាំងការឃុំខ្លួន មន្ត្រីសមាគមអាដហុក៤រូប និង មន្ត្រី គជប មួយរូប ករណី ខុម ចាន់តារាទី ហៅស្រីមុំ ។
តាមសេចក្ដីរាយការណ៍ របស់អ្នករាយការណ៍ព័ត៌មាន នៃមណ្ឌលស្ត្រីកម្ពុជា ជនបរទេស ទាំង២ រូបនេះ ធ្វើការឱ្យអង្គការការពារសិទ្ធិមនុស្ស លីកាដូ ។ ពួកគេចុះទៅសង្កេតការណ៍យុទ្ធនាការសម្លៀកបំពាក់ ខ្មៅ ដើម្បីប្រឆាំងការឃុំខ្លួន មន្ត្រីសង្គមស៊ីវិល និងមន្ត្រីគជប ។
តាមប្រភពដដែលនេះ អាជ្ញាធរបាន នាំខ្លួន ជនបរទេសទាំង២រូបនេះ ចូលទៅសាលា ខណ្ឌ ដង្កោ ខណៈអាជ្ញាធរ ប៉ង ឃាត់ ជនបរទេស ២រូបទៀត ប៉ុន្តែ ត្រូវបាន ពលរដ្ឋ ជាច្រើនសិបនាក់ ជួយការពារមិនមានការឃាត់ខ្លួន ។ តាមប្រភពដដែលនេះ ជនបរទេសទាំង២ រូបនេះ ត្រូវ បាននាំខ្លួនទៅនាយករដ្ឋអន្តោប្រវេសន៍ នៃក្រសួងមហាផ្ទៃ ។
បើតាមប្រភពគិតមកដល់ម៉ោង ១១និង៣០នាទី ព្រឹកថ្ងៃចន្ទទី ៩ឧសភា នេះ មនុស្ស ៨នាក់ត្រូវបានអាជ្ញាធរឃាត់ខ្លួន ក្នុងនោះស្រី្តបឹងកក់៣នាក់ ប្រធានសមាគម ធាងធ្នោត លោក អ៊ី សារ៉ុម លោក ថាវ គឹមសាន មន្ត្រីជាន់ខ្ពស់អង្គការលីកាដូ និង ស្ត្រី សរ ស៊ន សកម្មជនដីធ្លីនៃ សហគមបុរីកីឡា ។ តាមគម្រោងមន្ត្រីអង្គការសង្គមស៊ីវិល និងអ្នកប្រឆាំងការចាប់ខ្លួនមន្ត្រីជាន់ខ្ពស់សមាគមអាដហុក ត្រូវជួបជុំគ្នានៅខាងមុខពន្ធនាគាព្រៃសរ ដោយមានអ្នកចូលរួម ប្រមាណ៣០០នាក់ ៕
