ភ្នំពេញ៖ យុវជនកម្ពុជាមួយចំនួនបានបង្ហាញក្តីព្រួយបារម្ភយ៉ាងខ្លាំងពីការប្រកួតប្រជែងក្នុងទីផ្សារការងារ ខណៈដែលកម្លាំងពលកម្មក្នុងតំបន់អាស៊ាន ត្រៀមហូរចូលដើម្បីស្រូបយកទីផ្សារការងារក្នុងប្រទេស។ ក្រុមយុវជនដែលចូលរួមសិក្ខាសាលារៀបចំដោយអង្គការកម្មវិធីអភិវឌ្ឍន៍ធនធានយុវជននាថ្ងៃទី ០៨ ឧសភា បានលើកឡើងថា មូលហេតុដែលពួកមានការព្រួយបារម្ភនេះដោយសារជំនាញរបស់ខ្លួននៅមានកម្រិត ជាពិសេសបញ្ហាភាសាទំនាក់ទំនង។
កញ្ញា ភ សុវណ្ណដា ជានិស្សិតរៀនពីរជំនាញក្នុងពេលតែមួយបានប្រាប់ថា កញ្ញាមានការព្រួយបារម្ភចំពោះឱកាសទទួលបានការងារធ្វើក្រោយពីខ្លួនបញ្ចប់ការសិក្សានៅសាកលវិទ្យាវិល័យ។ កញ្ញាបន្តថា ការព្រួយបារម្ភនេះ ដោយសារកញ្ញាខ្លួនឯងផ្ទាល់មិនដឹងគួរត្រៀមខ្លួនបែបណា ដើម្បីចាប់អាជីពការងារដែលខ្លនឯងស្រឡាញ់ ហើយជំនាញនិងចំណេះដឹងនៅមានកម្រិតទៀត។
និស្សិតឆ្នាំទី៣ផ្នែកសង្គមវិទ្យា និង អក្សរសាស្ត្រអង់គ្លេសរូបនេះយល់ថា ឱកាសការងារសម្រាប់យុវជនក្នុងប្រទេសមិនមែនខ្វះខាតនោះទេ ប៉ុន្តែតែគ្រាន់យុវជនកម្ពុជាមួយចំនួនសមត្ថភាពមានកម្រិត ពិបាកក្នុងការប្រកួតប្រជែងយកការងារល្អ ដើម្បីទទួលបានប្រាក់ខែខ្ពស់។ ជាងនេះទៅទៀត ពួកគាត់អាចនឹងពិបាកក្នុងការប្រកួតប្រជែងជាមួយយុវជនក្នុងតំបន់អាស៊ាន។
ចំណែកនិស្សិតម្នាក់ទៀត គឺយុវជន នន រ៉ាឌូ និស្សិតឆ្នាំទី១ នៅសាកលវិទ្យាល័យអាស៊ីអឺរ៉ុប និយាយថា បញ្ហាប្រឈមរបស់យុវជនកម្ពុជា ដែលមិនអាចប្រកួតប្រជែងជាមួយយុវជនក្នុងតំបន់បានគឺសមត្ថភាព ជំនាញនិងភាសារសម្រាប់ទំនាក់ទំនង។
រ៉ាឌី បារម្ភថា នៅពេលមានលំហូរកម្លាំងពលរដ្ឋក្នុងតំបន់អាស៊ាន ចូលមកប្រទេសកម្ពុជាកាន់តែច្រើន នោះនឹងធ្វើឱ្យយុវជនកម្ពុជាបាត់បង់ឱកាសទទួលបានការងារល្អៗ។ បែបនេះក្តីនិស្សិតផ្នែកអក្សរសាស្ត្រអង់គ្លេសរូបនេះ បានប្រាប់ថា ខ្លួនបានត្រៀមខ្លួនរួចហើយក្នុងការប្រកួតប្រជែងជាមួយយុវជនក្នុងតំបន់ ក៏ដូចជាការពង្រឹងភាសាអង់គ្លេស។
លោក ជាង សុខា នាយកប្រតិបត្តិអង្គការកម្មវិធីអភិវឌ្ឍធនធានយុវជនបានថ្លែងថា វាជារឿងពិបាកដែលយុវជនកម្ពុជាទៅប្រកួតប្រជែងការងារជាមួយប្រជាជនក្នុងតំបន់អាស៊ាន ដោយសារតែជំនាញទាំង ០៨ដែលរដ្ឋាភិបាលកម្ពុជានិងអាស៊ានបានព្រមព្រៀងជាមួយគ្នានោះ ប្រទេសកម្ពុជាមានធនធានតិចតួចណាស់ ខណៈដែលធនធានរបស់ប្រទេសជាសមាជិកអាស៊ានដូចជា ថៃ ម៉ាឡេស៊ី សឹង្ហបុរីជាដើម មានជំនាញបែបនេះខ្ពស់។
ជំនាញទាំង ០៨ នោះរួមមាន សេវាកម្មវិស្វកម្ម សេវាកម្មគិលានុបដ្ឋាក សេវាកម្មស្ថាបត្យកម្ម គុណវឌ្ឍផ្នែកការវាស់ស្ទង់ អ្នកឯកទេសផ្នែកវេជ្ជសាស្ត្រ សេវាកម្មគណនេយ្យ និងអ្នកឯកទេសខាងទេសចរណ៍។
លោកពន្យល់ថា នៅពេលដែលកម្ពុជាមានធនធានលើជំនាញទាំង ០៨ នេះតិចតួច នោះធនធានរបស់ប្រទេសក្នុងតំបន់នឹងហូរមកប្រទេសកម្ពុជាហើយស្រូបយកទីផ្សារពលកម្មក្នុងស្រុក។
លោក យិម ពុទ្ធា នាយកគ្រប់គ្រងដៃគូអាជីវកម្មអ៊ីនស្បាយអ៊ីន មានប្រសាសន៍ថា ដើម្បីប្រកួតប្រជែងជាមួយកម្លាំងពលកម្មក្នុងតំបន់អាស៊ានបាន យុវជនកម្ពុជាគួរតែពង្រឹងភាសាអង់គ្លេសនិងជំនាញដែលគាត់កំពុងសិក្សា ហើយបើសិនជាអាចគួរតែចេះភាសាក្នុងតំបន់មួយទៀតដើម្បីពង្រឹងលក្ខណៈសម្បត្តិរបស់ខ្លួន។
យ៉ាងណាមិញ លោកថា សមត្ថភាពយុវជនកម្ពុជាបច្ចុប្បន្ន កុំថាឡើយទៅប្រកួតប្រជែងជាមួយកម្លាំងពលកម្មក្នុងតំបន់ សូម្បីតែទីផ្សារការងារក្នុងប្រទេសក៏ពួកគេជួបបញ្ហាប្រឈមផងដែរ ដោយសាមិនទាន់ស្គាល់ខ្លួនឯងបានច្បាស់។ មួយវិញទៀតបញ្ហាភាសាអង់គ្លេសក៏ជាកត្តារាំងស្ទះផងដែរ។ លោកថាមានយុវជនតិចតួចប៉ុណ្ណោះដែលបានប្រើប្រាស់ភាសាអង់គ្លេសបានល្អប្រសើរ។សំលេង
បើតាមរបាយការណ៍របស់អង្គការកម្មវិធីអភិវឌ្ឍន៍ធនធានយុវជនបានបង្ហាញថា អត្រាយុវជនកម្ពុជាដែលធ្វើការងារធៀបទៅនឹងប្រជាជនអាស៊ីអាគ្នេយ៍និងប៉ាស៊ីហ្វិកមានប្រមាណ ៤៥.៥% ។ យុវជនដែលធ្វើការងារដោយកម្លាំងពលកម្មលើពិភពលោកមានត្រឹមតែ ៤១.២% តែយុវជននៅកម្ពុជា ដែលធ្វើការដោយប្រើកម្លាំងពលកម្មមានកម្រិតខ្ពស់រហូត ៨៥.១% ៕
