ភ្នំពេញ៖ អ្នកជំនាញផ្នែកជំងឺមហារីកមាត់ស្បូនបានថ្លែងថា ជំងឺនេះគឺជាជំងឺកាចសាហាវបំផុតដែលជាប់ចំណាត់ថ្នាក់លេខ២ នៅទូទាំងពិភពលោកក្នុងចំណោមជំងឺមហារីកផ្សេងៗ បន្ទាប់ពីជំងឺមហារីកសុដន់ និងជាប់ចំណាត់ថ្នាក់លេខ១ នៅប្រទេសកម្ពុជា។ ការថ្លែងរបស់ក្រុមអ្នកជំនាញនេះ គឺធ្វើឡើងនៅក្នុងកម្មវិធីដើម្បីរំលឹកគុណដល់អ្នកម្ដាយក្រោមប្រធានបទ «ខ្ញុំស្រឡាញ់អ្នកម្ដាយរបស់ខ្ញុំ» នៅសណ្ឋាគារ កាំបូឌីយ៉ាណា រាជធានីភ្នំពេញកាលពីថ្ងៃសៅរ៍ ដើម្បីចូលរួមអបអរសាទរទិវាអ្នកម្ដាយសម្រាប់ឆ្នាំ ២០១៦ នេះ ។ កម្មវិធីនេះរៀងចំឡើងដោយក្រុមហ៊ុន GSK។
ជម្ងឺមហារីកមាត់ស្បូន ត្រូវបានអ្នកជំនាញចាត់ចំណាត់ថ្នាក់លេខ ២ ក្នុងចំណោមជំងឺមហារីកនៅទូទាំងពិភពលោកបន្ទាប់ពីជម្ងឺមហារីកសុដន់។ ក្នុងចំណោមប្រទេសទាំងអស់នៅតំបន់អាស៊ីអាគ្នេយ៍ ប្រទេសកម្ពុជាជម្ងឺមហារីកមាត់ស្បូនជាប់ចំណាត់ថ្នាក់លេខ១ ដែលបណ្ដាលឲ្យស្ដ្រីជាមាតាប្រឈមមុខនឹងអត្រាមរណៈខ្ពស់ក្នុងមួយឆ្នាំៗ។
លោកស្រីវេជ្ជបណ្ឌិត ឯក ម៉េងលី ប្រធានផ្នែកសម្ភពគ្លីនិកលុច្ស មានប្រសាសន៍ក្នុងវេទិកាអ្នកម្ដាយក្រោមប្រធានបទ«ខ្ញុំស្រឡាញ់អ្នកម្ដាយរបស់ខ្ញុំ» ថា ស្ដ្រីគឺជាជនងាយរងគ្រោះខ្លាំងបំផុតក្នុងការឆ្លង ការផ្ទុក និងការចម្លងជម្ងឺមហារីកមាត់ស្បូន ឬ មេរោគ HPV ពិសេសគឺនៅក្នុងប្រទេសកម្ពុជា ព្រោះជំងឺនេះប្រឈមខ្ពស់ជាងប្រទេសដដៃក្នុងតំបន់អាស៊ីអាគ្នេយ៍។
លោកស្រីវេជ្ជបណ្ឌិតបន្តថា កត្ដាដែលបណ្ដាលឲ្យស្ដ្រីកើតជំងឺមហារីកមាត់ស្បូនដោយសារតែស្ដ្រីប្រញាប់ប្រឡូក និងការរួមភេទនៅវ័យក្មេងពេក ដៃគូរួមភេទច្រើន មានកូនច្រើន និងកង្វះអនាម័យសុខភាពផ្លូវភេទជាដើម។
លោកស្រី ឯក ម៉េងលី បានបញ្ជាក់ទៀតថា ជំងឺមហារីកមាត់ស្បូនឆ្លងតាមរយៈការរួមភេទ និងការប៉ះពាល់ដោយផ្ទាល់រវាងស្បែកនិងស្បែក មិនមែនឆ្លងតាមរយៈដំណរពូជឡើយ។ លោកស្រីបន្ថែមថា ៖ «អញ្ចឹងបើយើងមើលទៅលើស្ថានភាពទូទៅនៃមហារីកហ្នឹងកើតទៅលើស្ដ្រីគឺចំណាត់ថ្នាក់លេខមួយក្នុងប្រទេសកម្ពុជា បន្ទាប់ពីជំងឺមហារីកដោះ»។
ដូចគ្នានេះដែរ លោក ប៉ិច សុធី ប្រធានគ្លីនិកសម្ភពសោភា ក៏បានបង្ហាញពីតួលេខនៃអត្រាអ្នកស្លាប់និងឆ្លងជំងឺមហារីកមាត់ស្បូនក្នុងប្រទេសកម្ពុជានិងក្នុងផ្នែកអ៊ឺរ៉ុបផងដែរ។ លោកបន្ដថា នៅលើពិភពលោកជារៀងរាល់មួយនាទីស្រី្ដម្នាក់ត្រូវបានរកឃើញថាឆ្លងជំងឺមហារីកមាត់ស្បូន ហើយរៀងរាល់ពីរនាទី ស្រី្ដម្នាក់ត្រូវបានស្លាប់ដោយសារជំងឺនេះ។
បើយោងតាមរបាយការណ៍របស់សហរដ្ឋអាមេរិកបង្ហាញថា មនុស្សជាង ១៣ ពាន់នាក់បានឆ្លងជំងឺនេះ ហើយមនុស្សជាង ៧ ពាន់នាក់បានស្លាប់នៅលើពិភពលោក។ ដោយឡែកសម្រាប់ប្រទេសកំពុងអភិវឌ្ឍន៍នៅផ្នែកភាគឥសាន្ដនៃសហភាពអ៊ឺរ៉ុបមានមនុស្សប្រមាណជា ៣ ម៉ឺន ៤ពាន់នាក់ឆ្លងនិងស្លាប់ ហើយមនុស្សប្រមាណជាង ៩ម៉ឺន ៧ពាន់នាក់ ឆ្លងនិងស្លាប់នៅទូទាំងតំបន់អ៊ឺរ៉ុបទាំងមូល។
ចំណែកនៅប្រទេសអាព្រិកមនុស្សប្រមាណ ៩២ ម៉ឺននាក់បានឆ្លង និង មនុស្សប្រមាណជាង ៥ ម៉ឺន ៧ពាន់អ្នកបានស្លាប់ជារៀងររាល់ឆ្នាំ។
លោកសាស្ដ្រាចារ្យ ប៉ិច សុធី បានបន្ថែមថាក្នុងប្រទេសកម្ពុជាអត្រាមរណៈស្ដ្រីដែលជាមាតាក្នុងមួយឆ្នាំៗត្រូវបានគេរកឃើញថាមានចំនួនរហូតទៅដល់ ៧៩៥ នាក់ មានន័យថា ស្ដ្រីស្លាប់ដោយជម្ងឺមហារីកមាត់ស្បូននេះ ០២ នាក់ក្នុងមួយថ្ងៃ។ លោកក៏បានបញ្ជាក់ពីវិធីការពារមួយចំនួនផងដែរ ដោយស្ដ្រីជាម្ដាយឬក៏ស្ដ្រីត្រូវតែទៅស្វែងរកចាក់វ៉ាក់សាំងការជម្ងឺ HPV ពីវេជ្ជបណ្ឌិតដែលមានជំនាញពិតប្រាកដ។ ស្ត្រីត្រូវពិនិត្យសុខភាពមាត់ស្បូនឲ្យបានជាប្រចាំតាមការណែនាំរបស់គ្រូពេទ្យ។ លោកបន្ថែមថា ស្ដ្រីចាប់ពីអាយុ ០៩ ឆ្នាំឡើងទៅ គឺអាចចាក់វ៉ាក់សាំងការពារជម្ងឺមហារីកមាត់ស្បូននេះបានហើយ ហើយចំពោះស្ដ្រីដែលរៀបការរួចក៏អាចចាក់វ៉ាក់សាំងនេះបានដូចគ្នាផងដែរ ។
ជាមួយគ្នានេះលោក ហេង វិរដ្ឋ វេជ្ជបណ្ឌិតឯកទេសផ្នែកជម្ងឺមហារីកនិងជំងឺទូទៅបានលើកឡើងថា ស្ដ្រីកើតជំងឺមហារីកមាត់ស្បូន អាចមានវិធីសាស្ដ្រក្នុងការព្យាបាលជំងឺដ៏កាចសាហាវមួយនេះបាន។ ប៉ុន្តែលោកថា ប្រសិនជាកើតហើយបើទោះបីជាការព្យាបាលជាស្បះស្បើយក៏ពិតមែន តែអាចប្រឈមនឹងការខ្សោយសុខភាពផ្លូវភេទខុសពីពេលដែលមិនទាន់កើតជំងឺ។
លោកវេជ្ជបណ្ឌិត ហេង វិរដ្ឋ បាបបញ្ជាក់ថា គ្រូពេទ្យគឺមានកាតព្វកិច្ចព្យាបាលអ្នកជម្ងឺគ្រប់គ្នា ប៉ុន្តែក្នុងនាមលោកជាវេជ្ជបណ្ឌិតមួយរូបសុំសំណូមពរដល់ពលរដ្ឋទាំងអស់ ពិសេសស្ដ្រីត្រូវតែយកចិត្ដទុកលើសុខភាពខ្លួន ដោយចំណាយពេលខ្លះដើម្បីពិនិត្យសុខភាព បង្ការជាមុន គឺប្រសើរជាងពេលកើតហើយទើបព្យាបាល។
សូមជម្រាបថាប្រទេសកម្ពុជាមានប្រជាជនប្រមាណ ៥.៤៥ លាននាក់ដែលជាស្ដ្រីអាយុ ១៥ ឆ្នាំ និង អាយុច្រើនជាងនេះកំពុងតែរងគ្រោះដោយការវិវត្ដនៃជំងឺមហារីកមាត់ស្បូន។ ហើយជារៀងរាល់ឆ្នាំមានស្ដ្រីចំនួន ១៥១២ នាក់មានរោគសញ្ញានៃជំងឺនេះ។ ជំងឺមហារីកមាត់ស្បូនជាប់ចំណាត់ថ្នាក់លេខ១ ក្នុងចំណោមជំងឺមហារីកដែលកើតលើស្ដ្រីចន្លោះអាយុពី ១៥ ទៅ ៤៤ ឆ្នាំ ៕
