ភ្នំពេញ៖ នាព្រឹកថ្ងៃទី ០៧ ខែឧសភា សហភាពអឺរ៉ុបបានរៀបចំកម្មវិធីជិះកង់ក្នុងរាជធានី។ កម្មវិធីនេះ ធ្វើឡើងក្នុងគោលបំណងដើម្បីបង្កើនការយល់ដឹងអំពីបរិស្ថាន ការការពារប្រព័ន្ធអេកូឡូស៊ី និងបរិស្ថានធម្មជាតិរបស់ប្រទេសកម្ពុជានិងភពផែនដីទាំងមូល។ កម្មវិធីនេះ ទទួលបានការចាប់អារម្មណ៍យ៉ាងច្រើនពីយុវជន ក៏ដូចជាប្រជាពលរដ្ឋទូទៅ។
កម្មវិធីជិះកង់ក្រោមប្រធានបទ«រួមគ្នាដើម្បីផែនដី» រៀបចំដោយសហភាពអឺរ៉ុប សហការជាមួយគណៈកម្មការជាតិអូឡាំពិកកម្ពុជា និងសាលារាជធានីភ្នំពេញ។ កម្មវិធីនេះមានអ្នកចូលរួមប្រមាណជាង ៤ពាន់នាក់ ដែលរួមមានភ្ញៀវជាតិ អន្តរជាតិ មន្ត្រីរដ្ឋាភិបាល អង្គការសង្គមស៊ីវិល និងសិស្សនិស្សិតមកពីសាកលវិទ្យាល័យនានាក្នុងក្រុងភ្នំពេញ។
លោក George Edgar ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជាថ្លែងថា កម្មវិធីជិះកង់នៅថ្ងៃនេះរៀបចំឡើងគឺដើម្បីបង្ហាញពីវត្តមានសហភាពអឺរ៉ុបនៅប្រទេសកម្ពុជា និងបង្ហាញពីការយកដាក់ទុកដាក់ចំពោះបរិសា្ថន។
ឯករដ្ឋទូតរូបនេះ បានមានប្រសាសន៍បន្ថែមថា ការជិះកង់ គឺជាធម្យោបាយធ្វើដំណើរដ៏ល្អ គ្មានផ្សែង នឹងជួយដល់បរិស្ថាន។ លោកបន្តថា បំរែបំរួលអាកាសធាតុ គឺជាបញ្ហាដ៏ធំមួយ និងជាបញ្ហាប្រឈមសម្រាប់ប្រជាជនកម្ពុជានាពេលបច្ចុប្បន្ននេះ ហើយវានឹងកាន់តែអាក្រក់ បើមិនធ្វើអ្វីដើម្បីទប់ទល់នោះ។
ចំណែក កញ្ញា តៃ លីដា អនុប្រធានគណៈកម្មការស្ត្រីនិងកីឡា ដែលជាដៃគូសហការជាមួយសហភាពអឺរ៉ុប បានឱ្យដឹងថា កញ្ញា បានគៀងគរអ្នកចូលរួមជិតមួយពាន់នាក់ដើម្បីចូលរួមជិះកង់នៅថ្ងៃនេះ។ កញ្ញាបានឱ្យដឹងថា ការជិះកង់ពិតជាមានសារៈប្រយោជន៍ទាំងចំពោះសុខភាពនិងបរិសា្ថន។ ប្រសិនបើប្រជាពលរដ្ឋប្តូរពីការជិះយាន្ត ហើយមកជិះកង់ដើម្បីទៅធ្វើការរាល់ថ្ងៃវិញនោះនឹងអាចកាត់បន្ថយឧស្ម័នពុលក្នុងបរិស្ថានបានទៀតផង។
លោក សុខ បូនី មន្ត្រីក្រសួងសេដ្ឋកិច្ចនិងហិរញ្ញវត្ថុ បានលើកឡើងថា ចាប់តាំងពីមានការបង្កើតកម្មវិធីជិះកង់ពីឆ្នាំ ២០១៣ មក លោកតែងតែចូលរួមជារៀងរាល់ឆ្នាំ។ មូលហេតុដែលលោកចង់ចូលរួមកម្មវិធីនេះ ដោយសារចង់រួមចំណែកកាត់បន្ថយការប្រែប្រួលអាកាសធាតុ។ លោកនិយាយបន្តថា ការជិះកង់ជាសកម្មភាពមួយដែលជួយលើកកម្ពស់បរិស្ថាន និងជំរុញឱ្យអ្នកដទៃទៀតគិតគូរបញ្ហាបរិស្ថាន។ លើសពីនេះទៀត លោកសង្កេតឃើញថា កម្មវិធីជិះកង់នេះ មានអ្នកចូលរួមកើនឡើងជារាល់ឆ្នាំ ដែលបង្ហាញថា ប្រជាពលរដ្ឋនាំគ្នាស្រលាញ់បរិស្ថាន។
ចំណែកកញ្ញា ស៊ីញ ស្រីពេជ្រ និស្សិតឆ្នាំទី៤ នៃសាកលវិទ្យាភូមិន្ទកសិកម្ម ដែលបានចូលរួមក្នុងកម្មវិធីនេះដែរ បានឱ្យដឹងថា នេះជាលើកទី២ ហើយដែលកញ្ញាបានមកចូលរួមកម្មវិធីជិះកង់នៅក្នុងទីក្រុងភ្នំពេញនេះ។
ជាមួយនឹងអារម្មណ៍រំភើបរីករាយ និស្សិតផ្នែកកសិកម្មរូបនេះ បាននិយាយថា សកម្មភាពជិះកង់នៅថ្ងៃនេះ បានបង្ហាញឱ្យប្រជាពលរដ្ឋទាំងអស់ មិនថានៅទីក្រុងភ្នំពេញ និងតាមបណ្តាខេត្តនោះទេ ឱ្យពួកគាត់បានយល់ថា ការជិះកង់ជិះកង់ ពិតជាមានសារៈសំខាន់សម្រាប់បរិស្ថាន និងបង្ហាញពីការចូលរួមចំណែកក្នុងការថែរក្សាភពផែនដី។ កញ្ញាបន្តថា ភពផែនដីមានសារៈសំខាន់សម្រាប់មនុស្សគ្រប់គ្នា ដូចនេះ អ្នកដែលរស់នៅលើភពផែនដីទាំងអស់គួរតែនាំគ្នាចូលរួមថែរក្សទាំងអស់គ្នា។
សូមជម្រាបថា កម្មវិធីជិះកង់នៅថ្ងៃនេះ ចាប់ពីម៉ោង៦ព្រឹក ដោយចេញដំណើរពីពហុកីឡាដ្ឋានជាតិអូឡាំពិកទៅតាមដង់វិថីមួយចំនួនក្នុងទីក្រុងភ្នំពេញដោយឆ្លងកាត់តាមស្ថានទូតនានា ដែលជាសមាជិករបស់សហភាពអឺរ៉ុប៕
