ភ្នំពេញ ៖ បច្ចុប្បន្ននេះ វិស័យសំណង់នៅកម្ពុជាមានការកើនទ្បើងគួរឱ្យកត់សម្គាល់ ។ វិស័យសំណង់ មានសារៈសំខាន់ខ្លាំងណាស់ សម្រាប់ប្រជាពលរដ្ឋកម្ពុជា ដែលរស់នៅក្នុងទីក្រុង ។ នេះជាការលើកទ្បើងរបស់ លោក ប៉ែន សុផល រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ នៅក្នុងវេទិកាសំណង់ស្តីពី «សុខុមាលភាព និងសុវត្ថិភាពក្នុងការដ្ឋានសំណង់» នៅសណ្ឋាគារ Sofitel Phnom Penh Phokeethra ព្រឹកថ្ងៃទី ០៦ ខែ ឧសភា ឆ្នាំ២០១៦នេះ ។ លោក ជួន សារ៉េត រាយការណ៍ពីព័ត៌មាននេះ៖
រយៈពេល៣ខែចុងក្រោយនេះ វិស័យសំណង់នៅក្នុងប្រទេសកម្ពុជាមានការកើនទ្បើង រហូតដល់ ២៥៧% បើធៀបនឹងរយៈពេលដូចគ្នា ក្នុងឆ្នាំ២០១៥ ។ កំណើននៃវិស័យសំណង់នេះបានផ្តល់ផលវិជ្ជមានច្រើនជាងអវិជ្ជមាន។ នេះជាការលើកទ្បើងរបស់រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ លោក ប៉ែន សុផល ។
លោក ប៉ែន សុផល មានប្រសាសន៍ថា ការកើនទ្បើងនៃវិស័យសំណង់ គឺជារឿងសំខាន់សម្រាប់សេដ្ឋកិច្ចនៃប្រទេសកម្ពុជា ។ លោក ក៏បានបញ្ជាក់ផងដែរថាកំណើនប្រពលរដ្ឋដែលរស់នៅទីក្រុងនឹងកាន់តែមានការកើនទ្បើងផងដែរ ស្របពេលដែលវិស័យសំណង់នៅកម្ពុជាកំពុងមានសន្ទុះកើនទ្បើង ។
សូមស្តាប់ប្រសាសន៍របស់លោក ប៉ែន សុផល «ការព្យាករណ៍ដោយក្រសួងផែនការវិទ្យាស្ថានស្ថិតិ និងការសិក្សារបស់ក្រសួងរៀបចំដែនដី នៅក្នុងឆ្នាំ២០១៤ប្រជាជនរស់នៅទីក្រុងគឺមានតែ ៤ លានកន្លះទេ ប៉ុន្តែដល់ឆ្នាំ២០៣០ប្រជាជនក្នុងទីក្រុងនឹងកើនទៅដល់ ៧,៩២លាននាក់ដែលគិតទៅប្រហែលជិត៤លាននាក់ដែលកើនដូច្នេះតំរូវការលំនៅឋានយើងត្រូវការច្រើន» ។
ទាក់ទងនឹងវិស័យសំណង់នេះដែរ ប្រធានស្តីទីសមាគមអ្នកសាងសង់កម្ពុជា លោក ឆារស៍ វ៉ាន់ មានប្រសាសន៍ថា វិស័យសំណង់ដែលមានការកើនទ្បើងនៅក្នុងប្រទេសកម្ពុជានេះ សបញ្ជាក់ឱ្យឃើញថា សេដ្ឋកិច្ចនៅក្នុងប្រទេសកម្ពុជាក៏មានការរីកចំរើនផងដែរ ។ ដោយលោកបញ្ជាក់ថាបើប្រទេសណាមានវិស័យសំណង់កើនទ្បើងនោះមានន័យថា ប្រទេសនោះក៏មានកំណើនសេដ្ឋកិច្ចល្អប្រសើរដែរ «យើងយល់ឃើញថាប្រសិនជា នៅក្នុងប្រទេសនីមួយៗយើងមើលនៅក្នុងសេដ្ឋកិច្ចកំណើនពេលណាប្រសិនជាថានៅក្នុងសំណង់ដែលមានកើនមានន័យថា សេដ្ឋកិច្ចប្រទេសហ្នឹងគឺមានការរីកចម្រើន មានន័យថាអ្នកវិនិយោគគិនហ្នឹងគឺគាត់មានការទុកចិត្តយ៉ាងច្រើនបានគាត់យកដើមទុនហ្នឹងមកវិនិយោគនៅកម្ពុជា…» ។
ជុំវិញនឹងការកើនទ្បើងវិស័យសំណង់នៅក្នុងប្រទេសកម្ពុជានេះ លោក ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ធ្លាប់បានព្រមានទៅលើម្ចាស់សំណង់ វិស្វករ អ្នកគូសប្លង់អគារទាំងអស់ថា ប្រសិនបើ មិនគោរពទៅតាមបទដ្ឋានគតិយុត្តនៃការសាងសង់ និងច្បាប់សាងសង់ត្រឹមត្រូវទេនោះ ក្រសួងនឹងចាត់វិធានការណ៍ទៅតាមបញត្តិនៃច្បាប់ដែលបានចែង ។
យោងតាមរបាយការណ៍របស់ក្រសួងរៀបចំដែនដីនគរូបនីយកម្ម និងសំណង់ បានបង្ហាញថា បច្ចុប្បន្ននេះ ទុនវិនិយោគក្នុងវិស័យសំណង់ចាប់ពីឆ្នាំ២០១១ រហូតដល់ ឆ្នាំ២០១៤ មានអ្នកវិនិយោគក្នុងស្រុក និងក្រៅប្រទេសដែលបានបោះទុនរួមគ្នាវិនិយោគលើវិស័យសំណង់ជាមធ្យមចំនួន ២, ៧៧៣ លានដុល្លារអាមេរិក ហើយគិតត្រឹមឆ្នាំ២០១៥ ទុនវិនិយោគសរុបមានរហូតដល់ ២, ៩៣៦ លានដុល្លារអាមេរិក ៕
