ភ្នំពេញ ៖ ក្រសួងយុត្តិធម៌បញ្ជាក់ថា ក្រសួងមិនទាន់ទទួលបានលិខិតផ្លូវការរបស់គណបក្សសង្គ្រោះជាតិ កោះហៅរដ្ឋមន្ត្រីក្រសួងយុត្តិធម៌ទៅសាកសួរនៅឡើយទេ ។ នេះបើតាមការសរសេរនៅលើទំព័រហ្វេសប៊ុកផ្លូវការរបស់លោក គឹម សន្តិភាព អ្នកនាំពាក្យក្រសួងយុត្តិធម៌។
លិខិតរបស់គណបក្សសង្គ្រោះជាតិចុះថ្ងៃទី០៤ខែឧសភា ផ្ញើជូនសម្តេច ហេង សំរិន ប្រធានរដ្ឋសភា ស្នើឱ្យលោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ ឆ្លើយបំភ្លឺផ្ទាល់មាត់នៅវិមានរដ្ឋសភា នៅព្រឹកថ្ងៃព្រហស្បតិ៍ ណាមួយនៅពេលឆាប់ៗខាងមុខនេះ ។
នៅក្នុងលិខិតនេះបានសរសេរទៀតថា ការកោះហៅនេះ គឺដើម្បីសាកសួរអំពី គោលការណ៍ច្បាប់ និងគោលនយោបាយព្រហ្មទណ្ឌរបស់រដ្ឋាភិបាល ពាក់ព័ន្ធនឹងការឃុំខ្លួនជនត្រូវចោទបណ្តោះអាសន្ន និងការប្តឹងបរិហារ និងអំណាចធ្វើអធិបញ្ជារបស់រដ្ឋមន្ត្រីក្រសួងយុត្តិធម៌ជាដើម ៕
