ភ្នំពេញ៖ លោក សុខ ឥសាន អ្នកនាំពាក្យគណបក្សកាន់អំណាច បញ្ជាក់ប្រាប់អ្នកសារព័ត៌មាន ក្រោយផ្តល់សក្ខីកម្មនៅតុលាការក្រុងភ្នំពេញ ទាក់ទងបណ្ដឹងគណបក្សប្រជាជនកម្ពុជាប្ដឹងលោក អ៊ូ វីរៈ អ្នកវិភាគបញ្ហាសង្គម នៅថ្ងៃទី ០៦ ឧសភានេះថា គណបក្សប្រជាជនកម្ពុជា នឹងបន្តប្ដឹងលើជនណា ដែលហ៊ាននិយាយប៉ះពាល់កិតិ្តយស សេចក្តីថ្លៃថ្នូរលើគណបក្សប្រជាជន។ ចំពោះអ្នកវិភាគវិញយល់ថា សារព្រមានរបស់បក្សកាន់អំណាចពេលនេះ រឹតតែបង្ហាញថា ការវិភាគរបស់អ្នកវិភាគគឺត្រឹមត្រូវ ទើបបណ្តាលឱ្យមានប្រតិកម្មតបវិញពីបក្សកាន់អំណាចដើម្បីលាក់បាំងពីចំណុចខ្សោយរបស់ខ្លួនតែប៉ុណ្ណោះ។
នៅចំពោះមុខអ្នកសារព័ត៌មាននៅខាងក្រៅតុលាការរាជធានីភ្នំពេញ កាលពីព្រឹកថ្ងៃសុក្រនេះ អ្នកនាំពាក្យបក្សកាន់អំណាច ពន្យល់ថាការប្តឹងលោក អ៊ូ វីរៈ អ្នកវិភាគឯករាជ្យពេលនេះ គឺគណបក្សប្រជាជនមានភស្តុតាងច្បាស់លាស់ ព្រោះលោក អ៊ូ វីរៈ បានបរិហារកេរ្តិ៍តាមរយៈវិទ្យុអាស៊ីសេរីថា គណបក្សប្រជាជនកម្ពុជាជាអ្នកនៅពីក្រោយក្នុងរឿងអាស្រូវស្នេហារបស់លោក កឹម សុខា និងកញ្ញាស្រីមុំ។
ក្នុងបទសម្ភាសន៍ជាមួយវិទ្យុអាស៊ីសេរីកាលពីថ្ងៃទី ២៤ មេសា លោក អូ វីរៈ មានប្រសាសន៍ថា ជានយោបាយបក្សកាន់អំណាច គាបសង្កត់លោក កឹម សុខា និងហិរញ្ញវត្ថុរបស់លោក ពាក់ព័ន្ធនឹងសំណុំរឿងស្នេហាអាស្រូវជាមួយអ្នកនាង ខុម ចាន់តារាទី ហៅស្រីមុំ ដែលចំណុចនេះ គណបក្សកាន់អំណាចថា បរិហារកេរ្ត៍លើខ្លួន។ ករណីនេះ លោក អូ វីរៈ ត្រូវបានតុលាការកោះហៅចូលខ្លួននៅថ្ងៃទី ១២ ឧសភា ។
លោក អ៊ូ វីរៈ ប្រធានអង្គការវេទិកាអនាគតនិងជាវិភាគស្ថានការណ៍នយោបាយ ដែលកំពុងរងការចោទប្រកាន់ពីគណបក្សកាន់អំណាច ប្រាប់វិទ្យុស្ត្រីថា គណបក្សប្រជាជនអាចយល់ច្រឡំ ឬស្តាប់ច្រឡំពីអត្ថន័យដែលលោកបានវិភាគក្នុងវិទ្យុអាស៊ីសេរី ព្រោះលោកមិនបានបកស្រាយដូចអ្វីដែលលោក សុខ ឥសាន និងគណបក្សប្រជាជនកំពុងប្តឹងលោកនោះទេ។ យ៉ាងណាលោក អ៊ូ វីរៈ បញ្ជាក់ថា លោករក្សាជំហរមិនប្តឹងវាយបកវិញទេ ហើយក៏ស្នើសុំឱ្យតុលាការទម្លាក់ចោលនូវបទចោទនេះដើម្បីបញ្ចប់បញ្ហា។
តែយ៉ាងណាលោក សុខ ឥសាន បញ្ជាក់ថា លោកបានប្រគល់ភស្តុតាងជូនតុលាការរួមហើយ ដោយលោកយល់ថា ការវិភាគរបស់លោក អ៊ូ វីរៈ គឺហួលព្រំដែននៃសិទ្ធិបញ្ចេញមតិដែលមានចែងក្នុងរដ្ឋធម្មនុញ្ញ ដោយសារការបកស្រាយនេះ គឺមានចេតនាបំផ្លាញមុខមាត់បក្សប្រជាជន។ លោក សុខ ឥសាន បន្តថា ការប្តឹងលោក អ៊ូ វីរៈ ពេលនេះគឺស្របតាមប្រទេសដែលមាននីតិរដ្ឋ ហើយលោកមិនចង់ឱ្យមានវប្បធម៌និទណ្ឌភាពក្នុងសង្គមកម្ពុជានោះទេ។
លោក មាស នី អ្នកសិក្សាពីការអភិវឌ្ឍសង្គម និយាយថា សារព្រមានរបស់បក្សកាន់អំណាចពេលនេះ រឹតតែបង្ហាញថា ការវិភាគរបស់អ្នកវិភាគគឺត្រឹមត្រូវ ដែលបណ្តាលឱ្យមានប្រតិកម្មតបវិញពីបក្សកាន់អំណាច ។
លោក មាស នី ទទួលស្គាល់ថា ការវិភាគមិនមែនចេះតែត្រឹមត្រូវជានិច្ចនោះទេ តែការវិភាគកន្លងមក គឺឈរលើឧត្តមគតិ ស្របតាមហេតុការណ៍ដែលបានកើតឡើងជាក់ស្តែងក្នុងសង្គម។
សូមរំលឹកថា កាលពីព្រឹកថ្ងៃទី ២៥ ខែមេសា សម្ដេចនាយករដ្ឋមន្ត្រី ហ៊ុន សែន បានសរសេរនៅលើហ្វេសប៊ុក របស់លោក ថា មិនអត់ឱនចំពោះជនណាដែលមួលបង្កាច់បង្ខូចកិត្តិយសគណបក្សប្រជាជនកម្ពុជា ទៀតឡើយ។ លោកថាគណបក្សប្រជាជនគោរពសិទ្ធិបញ្ចេញមតិ ប៉ុន្តែប្រឆាំងដាច់ខាតចំពោះអ្នកមូលបង្កាច់បង្ខូចកិត្តិយសនិងសេចក្ដីថ្លៃថ្នូរបក្ស។
ក្រោយពីការប្រកាសរបស់សម្ដេចនាយករដ្ឋមន្ត្រី ហ៊ុន សែន នៅតាមទំព័រហ្វេសប៊ុក (Facebook) ហើយនោះ គឺនៅល្ងាចថ្ងៃទី ២៥ ខែមេសា គណបក្សប្រជាជនកម្ពុជា បានសម្រេចប្ដឹងលោក អ៊ូ វីរៈ ប្រធានអង្គការវេទិកាអនាគត និងជាអ្នកឃ្លាំមើលស្ថានការណ៍នយោបាយ ទៅកាន់អយ្យការអមសាលាដំបូងរាជធានីភ្នំពេញ។ នៅក្នុងពាក្យបណ្ដឹងនោះ ទាមទារឲ្យតុលាការផ្ដន្ទាទោស និងទាមទារសំណងជំងឺចិត្តចំនួន ៤០០លានរៀល។ លោក អូ វីរៈ អះអាងថានឹងឡើងទៅបំភ្លឺចំពោះការចោទរបស់បក្សកាន់អំណាច៕
