ភ្នំពេញ ៖ រដ្ឋបាលសាលារាជធានីភ្នំពេញ បានចេញលិខិតបដិសេធចំពោះសំណើសុំហែក្បូនរបស់ក្រុមពលរដ្ឋ យុវជន និងស្ត្រី បំណងឆ្ពោះទៅអង្គភាពប្រឆាំងអំពើពុករលួយ(ACU) នៅថ្ងៃទី០៧ខែ ឧសភា ស្អែកនេះ ។
លិខិតរដ្ឋបាលរាជធានីភ្នំពេញ ចុះល្ងាចថ្ងៃទី០៥ឧសភា បានសរសេរថា ការដង្ហែក្បួនតាមដងផ្លូវសាធារណៈ បណ្តាលឱ្យប៉ះពាល់ដល់សន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ។ សាលារាជធានីភ្នំពេញ បានព្រមានថា ប្រសិនបើពលរដ្ឋនៅតែអនុវត្តផ្ទុយពីស្មារតីនៃការសម្រេចនេះ ពួកគេត្រូវទទួលខុសត្រូវទាំងស្រុងចំពោះមុខច្បាប់ជាធរមាន ។
សូមបញ្ជាក់ថា ក្រុមប្រជាពលរដ្ឋ យុវជន និងស្ត្រី ប្រមាណ ២,០០០នាក់ គ្រោងហែញត្តិដាក់ទៅអង្គភាពប្រឆាំងអំពើពុករលួយ ហៅកាត់ថា ACU នៅថ្ងៃទី0៧ ខែឧសភា ឆ្នាំ២០១៦ ស្អែកនេះ ដើម្បីស្នើឱ្យបញ្ឈប់ការគំរាមកំហែង ធ្វើទុកបុកម្នេញលើសកម្មជនសិទ្ធិមនុស្ស និងមន្ត្រីអង្គការសង្គមស៊ីវិល តាមរយៈការចោទប្រកាន់ផ្សេងៗ និងបញ្ឈប់ការអនុវត្តតួនាទីរបស់ខ្លួន ដែលមានលក្ខណៈស្តង់ដាពីរ ៕
