ភ្នំពេញ ៖ ប្រជាសហគមន៍ស្ទឹងមានជ័យប្រមាណជា ៤០នាក់ នៅព្រឹកថ្ងៃទី០៥ខែឧសភា ឆ្នាំ២០១៦នេះ បានដាក់លិខិតទៅក្រសួងរៀបចំដែនដីនគរូបនីយកម្ម និងសំណង់ និងសាលារាជធានីភ្នំពេញ ឱ្យពិនិត្យពីផែនការ និងស្នើឱ្យមានការអភិវឌ្ឍន៍នៅនឹងកន្លែង ។ លោក ជួន សារ៉េតមានសេចក្តីរាយការណ៍៖
ប្រជាសហគមន៍ស្ទឹងមានជ័យមាន៨សហគមន៍ បានសម្តែងការព្រួយបារម្មចំពោះការបណ្តេញចេញនៅថ្ងៃអនាគត ខណៈដែលពួកគេទទួលបានព័ត៌មានថា អភិបាលរាជធានីភ្នំពេញនឹងធ្វើការអភិវឌ្ឍន៍តំបន់មាត់ប្រទ្បាយស្ទឹងមានជ័យ ។ ដោយសារតែមានការព្រួយបារម្មណ៍នេះហើយពួកគេបានសម្រេចទ្បើងមកដាក់លិខិតឱ្យស្ថាប័នខាងលើពិនិត្យទៅលើផែនការអភិវឌ្ឍន៍របស់ពួកគេនៅនឹងកន្លែង ។
អ្នកស្រី ហន សុខន ពលរដ្ឋសហគមន៍ស្ទឹងមានជ័យ បានលើកឡើងថា មូលហេតុដែលក្រុមសហគមន៍ចង់ឱ្យមានការអភិវឌ្ឍន៍តំបន់មាត់ប្រទ្បាយស្ទឹងមានជ័យ នៅនឹងកន្លែងនេះដោយសារតែកន្លងមក ពួកគាត់ធ្លាប់ទទួលបានព័ត៌មានថា ថ្នាក់លើនឹងធ្វើការអភិវឌ្ឍន៍តំបន់ប្រទ្បាយស្ទឹងមានជ័យ ជាពិសេសតំបន់នេះប៉ះពាល់សោភ័ណ្ឌភាពទីក្រុងផង ។ អ្នកស្រី ហន សុខន បន្ថែមទៀតថាតំណាងស្ថាប័នរបស់ក្រសួងដែនដីនគរូបនីយកម្មបានទទួលយកលិខិតរបស់ពួកគាត់រូចហើយ ដោយសន្យាថានឹងផ្តល់ដំណឹងនៅសប្តាហ៍ក្រោយ។
បន្ទាប់ពីមន្ត្រីខាងក្រសួងរៀបចំដែនដីនគរូបីយកម្ម និងសំណង់ ទទួលយកលិខិតរបស់ពួកគេរួចមក ក្រុមពលរដ្ឋបានធ្វើដំណើរបន្តទៅសាលារាជធានីភ្នំពេញ ដើម្បីដាក់លិខិតឱ្យអភិបាលសាលារាជធានីភ្នំពេញ ពិនិត្យមើលពីប្លង់អភិវឌ្ឍន៍តំបន់មាត់ប្រទ្បាយស្ទឹងមានជ័យ ដោយស្នើមានការអភិវឌ្ឍន៍នៅនឹងកន្លែង ។
ឆ្លើយតបនឹងការស្នើសុំរបស់ប្រជាសហគមន៍ស្ទឹងមានជ័យ អភិបាលរាជធានីភ្នំពេញលោក ប៉ា សុជាតិវង្ស ប្រាប់ទៅពលរដ្ឋកុំឱ្យមានការព្រួយបារម្មណ៍ពីបញ្ហានេះ ។ ដោយលោក ប៉ា សុជាតិវង្ស សន្យាថា នៅថ្ងៃច័ន្ទក្រោយនេះ លោកនឹងបញ្ជូនមន្ត្រីជំនាញរបស់ខ្លួនទៅសិក្សាពីតំបន់មាត់ប្រទ្បាយស្ទឹងមានជ័យ តាមសំណើរបស់ប្រជាសហគមន៍ស្ទឹងមានជ័យ ។
សូមបញ្ជាក់ថា ប្រជាសហគមន៍ស្ទឹងមានជ័យដែលបានយកលិខិតដាក់ឱ្យស្ថាប័នរដ្ឋចំនួន២រួមមាន ក្រសួងដែនដីនគរូបនីយកម្ម និងសំណង់ និង សាលារាជធានីភ្នំពេញ នៅព្រឹកមិញនេះ ទទួលបានភាពវិជ្ជមានច្រើន ព្រោះស្ថាប័នទាំង២សុទ្ធតែបានទទួលយកលិខិតនោះហើយបានសន្យាថានឹងជួបពិភាក្សាជាមួយពួកគេនៅសប្តាហ៍ក្រោយនេះ ៕
