ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ បានកំណត់ថា ប្រសិនបើពិធីបុណ្យជាតិទាំងឡាយណា ដែលត្រូវប៉ះចំថ្ងៃអាទិត្យ ក្រសួងនឹងអនុញ្ញាត ឱ្យមន្ត្រីរាជការ ឬគ្រឹះស្ថានទាំងអស់ លើកថ្ងៃឈប់សម្រាកនៅថ្ងៃចន្ទ មួយថ្ងៃទៀត។
ជាក់ស្តែង កាលពីដើមសប្តាហ៍នេះ «ទិវាពលកម្មអន្តរជាតិ» ជាថ្ងៃដែលគ្រប់ប្រទេសទាំងអស់ ទូទាំងពិភពលោកត្រូវបានអនុញ្ញាតឱ្យឈប់សម្រាក ។ ជាការកត់សម្គាល់ ថ្ងៃទិវាពលកម្មអន្តរជាតិ ឆ្នាំនេះ ប៉ះចំថ្ងៃអាទិត្យ ក្រសួងក៏បានលើកមួយ ដោយអនុញ្ញាតឱគ្រប់គ្រឹះស្ថាន ឬមន្ត្រីរាជការទាំងអស់ លើកថ្ងៃឈប់សម្រាកសង នៅថ្ងៃចន្ទ មួយថ្ងៃទៀត ។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ករណីនៃការឈប់សងនេះគឺ ច្បាប់ការងារបានកំណត់តាំងពីឆ្នាំ១៩៩៧ មក ។ លោកថា រាល់ការឈប់ទាំងឡាយណាដែលប៉ះចំថ្ងៃអាទិត្យ គឺត្រូវបានឈប់សង១ថ្ងៃ គឺលើកមកថ្ងៃចន្ទ។ រីឯការឈប់សម្រាករបស់មន្ត្រីរាជការ គឺផ្អែកទៅលើអនុក្រឹត្យរបស់រាជរដ្ឋាភិបាល ៕
