ភ្នំពេញ ៖ ទិវាឆ្មបជាតិឆ្នាំនេះ ក្រោម ប្រធានបទស្ដីពី «ស្ដ្រីនិងទារក ជាបេះដូងរបស់ឆ្មប» ធ្វើឡើង ដើម្បីរំលឹកតួនាទីយ៉ាងសំខាន់របស់ពេទ្យឆ្មប ក្នុងការជួយសង្គ្រោះស្រី្ត និងទារក ចាប់តាំងមានគភ៌រហូតដល់សម្រាលកូន ។ នេះបើតាម សារព័ត៌មាន AKP ចុះផ្សាយនៅថ្ងៃនេះ ។
សារព័ត៌មាននេះ បានអោយដឹងថា លោក ម៉ម ប៊ុនហេង រដ្ឋមន្ត្រី ក្រសួងសុខាភិបាល បានថ្លែងថា ឆ្មបបានដើរជាតួនាទីយ៉ាងសំខាន់ ក្នុងការជួយស្ដ្រី និងទារក ចាប់តាំងពីស្ត្រីមានគភ៌ និងរហូតដល់ពេលសម្រាលកូន និង ក្រោយពីសម្រាលកូនរួចក្នុងរយៈពេល៤២ថ្ងៃគឺ ឆ្មប បានតាមដាន និងផ្ដល់ប្រឹក្សា រួមទាំង ការពិនិត្យថែទាំទារក ។ លោក ម៉ម ប៊ុនហេង ថ្លែងទៀតថា ឆ្មបទាំងអស់ត្រូវឆ្លងកាត់ការបណ្ដុះបណ្ដាលជំនាញតាមប្រព័ន្ធកម្មវីធីជាក់លាក់ ជាមួយនឹងការអនុវត្ដជំនាញគ្រប់គ្រាន់ក្នុងការថែទាំស្ដ្រី និងទារកពេលមានគភ៌ ដើម្បីក្លាយជាឆ្មបជំនាញពិតប្រាកដ ។
តាមរបាយការណ៍ស្ដីពីសមិទ្ធផលសុខាភិបាលឆ្នាំ២០១៥ បានបញ្ជាក់ថា បុគ្គលិកសុខាភិបាលជា ឆ្មប សរុបមានចំនួន៥៤១២នាក់ ក្នុងនោះ៥០៧៧នាក់កំពុងបម្រើការងានៅតាម បណ្ដារាជធានី-ខេត្ដ ។ ឆ្មបដែលបានចុះបញ្ជីក្នុងគណៈឆ្មបកម្ពុជា មានចំនួន៤៨០៥នាក់ ស្មើនឹង៨៨ភាគរយ និងឆ្មបជាសមាជិកសមាគមឆ្មបកម្ពុជា មានចំនួន៤១៥៦នាក់ ស្មើនឹង៧៦ភាគរយ ៕
