ភ្នំពេញ ៖ អង្គការក្នុងស្រុកមួយឈ្មោះថា AIP បានរៀបចំឱ្យមានកម្មវិធីប្រកួតប្រជែងលើពានរង្វាន់អ្នកសារព័ត៌មានឆ្នើម ជូនដល់អ្នកសារព័ត៌មានគ្រប់ស្ថាប័នទាំងអស់ នៅថ្ងៃទី៤ ខែឧសភា ២០១៦នេះ រហូតដល់ថ្ងៃទី១៧ខែមិថុនា ឆ្នាំ២០១៦ ។
ការប្រកាសបើកកម្មវិធីប្រឡងប្រណាំងពានរង្វាន់អ្នកសារព័ត៌មានឆ្នើម លើការសរសេរទាក់ទងនិងច្បាប់ចរាចរណ៍ ពិសេសពាក់ព័ន្ធនឹងការលើកកម្ពស់ការពាក់មួកសុវត្ថិភាព នៅថ្ងៃនេះ គឺដើម្បីលើកទឹកចិត្តដល់អ្នកសារព័ត៌មានដែលមានគំនិតច្នៃប្រឌិត ក្នុងការតែងនិពន្ធ អត្ថបទសារព័ត៌មានទាំងការសរសេរ សម្លេងនិងរូបភាពប្រកបដោយប្រសិទ្ធភាព ពាក់ព័ន្ធលើការជំរុញ ការអនុវត្តច្បាប់ស្ដីពីចរាចរណ៍ផ្លូវគោកថ្មី ។
នៅក្នុងកម្មវិធីប្រកាសបើកការប្រកួតប្រជែង លើពានរង្វាន់អ្នកសារព័ត៌មានឆ្នើម នៅឯ ភោជនីយដ្ឋានទន្លេបាសាក់២នេះ លោក គឹម បញ្ញា នាយកអង្គការមូលនិធិបង្ការបួសអាស៊ីប្រចាំនៅកម្ពុជា បានឱ្យដឹងថា គោលបំណងសំខាន់ដែលអង្គការមូលនិធិបង្ការបួសអាស៊ី(AIP) រួមនិងដៃគូពាក់ព័ន្ធ ចាំបាចរៀបចំឱ្យមានកម្មវិធីប្រឡងប្រណាំងនេះ ដល់អ្នកសារព័ត៌មាន ក៏ព្រោះតែ ចង់ជំរុញឲ្យការអនុវត្តច្បាប់ចរាចរណ៍ផ្លូវគោកថ្មី កាន់តែខ្លាំងក្លា និងម៉ឺងម៉ាត់ ។
នាយកអង្គការមូលនិធិបង្ការបួសអាស៊ីរូបនេះ បន្ដថា នៅទូទាំងពិភពលោក ការអនុវត្តច្បាប់ដោយមន្ដ្រីនគរបាលចរាចរណ៍ត្រូវបានគេចាត់ទុកថា ជាវិធានការដ៏មានប្រសិទ្ធភាពបំផុត ក្នុងការឈានឆ្ពោះទៅរកការកាត់បន្ថយគ្រោះថ្នាក់ចរាចរណ៍ ។ ប៉ុន្ដែនៅពេលដែលមន្ដ្រីនគរបាលចរាចរណ៍បំពេញតួនាទីរបស់ខ្លួន តាមរយៈ ការរឹតបន្ដឹងការអនុវត្តច្បាប់ គឺប្រជាពលរដ្ឋចាប់ផ្ដើមរអ៊ូរទាំនិងប្រតិកម្មចំពោះសកម្មភាព ការអនុវត្តច្បាប់របស់មន្ដ្រីនគរបាលចរាចរណ៍ ។ ករណីបែបនេះ ត្រូវបានស្នើឲ្យផ្អាកជាបណ្ដោះអាសន្ន ឬព្យួរចោលរយៈខ្លី ឬវែង ដើម្បីចៀសវាងប្រតិកម្មខ្លាំងពីពលរដ្ឋ ។
ទន្ទឹមនឹងនេះដែរ អនុប្រធាននាយកដ្ឋានសណ្ដាប់ធ្នាប់សុវត្ថិភាពចរាចរណ៍ផ្លូវគោកនៃក្រសួងមហាផ្ទៃ លោក ទី ឡុង ដែលមានវត្តមាននៅទីនោះ បានលើកឡើងដែរថា ការប្រឡងប្រណាំងស្នាដៃសរសេរអត្ថបទរបស់អ្នកសារព័ត៌មាននេះគឺ មានសារៈសំខាន់ណាស់ ដើម្បីជំរុញនិងលើកទឹកចិត្ត អោយអ្នកសារព័ត៌មាន ចូលរួមគោរពច្បាប់ និងជួយកាត់បន្ថយគ្រោះថ្នាក់ ទៅថ្ងៃអនាគតឲ្យនៅត្រឹមកម្រិតទាប។
តែបែបនេះក្តីនាយកអង្គការមូលនិធិបង្ការបួសអាស៊ី(AIP)ដដែលបានបន្ថែមថា ថ្វីបើមានការអប់រំផ្សព្វផ្សាយជាបន្ដបន្ទាប់ ចាប់តាំងពីឆ្នាំ២០០៦ ក៏ច្បាប់ស្ដីពីចរាចរណ៍ផ្លូវគោកថ្មីដែលក្នុងនោះបានកំណត់ថា អ្នករួមដំណើរតាមទោចក្រយានយន្ដ ព្រមទាំងកុមារអាយុចាប់ពី៣ឆ្នាំឡើងទៅ ត្រូវតែពាក់មួកសុវត្ថិភាព ក៏ការអនុវត្តនេះមិនទាន់មានប្រសិទ្ធភាព។ តាមរបាយការណ៍របស់ អង្គការនេះគឺលទ្ធផលនៃការអនុវត្តរបស់អ្នករួមដំណើរតាមម៉ូតូ ព្រមទាំងកុមារ គិតត្រឹមខែវិច្ឆិកា ឆ្នាំ២០១៥ មានប្រមាណតែ១៥ភាគរយប៉ុណ្ណោះ ៕
