ភ្នំពេញ ៖ សមាជិករដ្ឋសភា និងព្រឹទ្ធសភា បានជម្រុញឱ្យរដ្ឋាភិបាលពន្លឿន ធ្វើសេចក្តីព្រាងច្បាប់ស្តីពីការគ្រប់គ្រងគ្រឿងស្រវឹង ដោយសារតែមានការសំណូមពីក្រុមយុវជន និងមើលឃើញថា គ្រឿងស្រវឹងបង្កឱ្យមានផលប៉ះពាល់ដល់សង្គមជាដើម ។ ការជម្រុញនេះ បានធ្វើឡើងនៅក្នុងកម្មវិធីប្រគល់រង្វាន់ដល់ជ័យលាភី«ការបង្កើតវីដេអូស្តីពីផលប៉ះពាល់គ្រឿងស្រវឹងទៅលើយុវជន» នៅថ្ងៃទី០៤ ខែឧសភា ឆ្នាំ២០១៦នេះ នៅសណ្ឋាគារអ៊ីនធើខនធីណង់តាល់ រាជធានីភ្នំពេញ ។ កញ្ញាឆេង ណាតារាយការព័ត៌មាននេះ៖
សមាជិកព្រឹទ្ធសភាមួយរូប គឺលោក អាំ សំអាត លេខាធិការគណៈកម្មការទី៨ព្រឹទ្ធសភា បានទទូចឱ្យរដ្ឋាភិបាល ពន្លឿនអនុម័តសេចក្តីព្រាងច្បាប់ ស្តីពីគ្រឿងស្រវឹង ដោយរក្សានូវខ្លឹមសារ ដែលឈរលើសុខភាពសារធាណៈ ជាពិសេសបញ្ចូលនូវវិធានការបួនចំណុច ។
វិធានការបួនចំណុចដែលលោក អាំ សំអាត ចង់ឱ្យដាក់បញ្ចូលក្នុងសេចក្តីព្រាងច្បាប់នេះ ឱ្យខានតែបាន គឺការហាមឃាត់ការផ្សាយពាណិជ្ជកម្មគ្រឿងស្រវឹង ការតម្លើងពន្ធផលិតផលគ្រឿងស្រវឹង ការកំណត់ភាពងាយរកបាននូវគ្រឿងស្រវឹង និងការកំណត់អាយុអ្នកប្រើប្រាស់គ្រឿងស្រវឹង។ លោកចាត់ទុកថា វិធានការទាំងបួននេះ នឹងមានប្រសិទ្ធភាពអាចកាត់បន្ថយការប្រើប្រាស់គ្រឿងស្រវឹងនៅក្នុងប្រទេសកម្ពុជាបាន ។
លោកបញ្ជាក់បន្ថែមថា«ក្នុងនាមអ្នកធ្វើការពាក់ព័ន្ធនឹងច្បាប់ យើងខ្ញុំសូមទទួលយកនូវសំនូមពរល្អៗរបស់ក្មួយៗ ដើម្បីជាគំនិតសម្រាប់នៅពេលជជែកពិភាក្សាអនុម័តសេចក្ដីព្រាងច្បាប់ស្ដីពីការត្រួតពិនិត្យផលិតផលគ្រឿងស្រវឹង នៅពេលឆាប់ៗខាងមុខនេះ។….វាដល់ពេលហើយដែលកម្ពុជាត្រូវបង្ការនិងការពារយុវជនពីអន្តរាយនៃការសេពគ្រឿងស្រវឹង ដើម្បីអោយពួកគេក្លាយជាសរសរទ្រូងដ៏រឹងមាំសម្រាប់អភិវឌ្ឍន៍ប្រទេសកម្ពុជាតទៅថ្ងៃអនាគត ។»
ចំណែកលោក ជីវ កក្តា សមាជិកគណៈកម្មការទី៨នៃរដ្ឋសភា បានថ្លែងថា ដោយសារតែកម្ពុជា នៅមិនទាន់មានច្បាប់ស្ដីពីការត្រួតពិនិត្យផលិតផលគ្រឿងស្រវឹង ទើបមានការផ្សាយពាណិជ្ជកម្មគ្រឿងស្រវឹងនៅគ្រប់ទីកន្លែង មានការលក់ទិញដោយសេរី។ លោកបន្តថា បញ្ហានេះគឺជាហានិភ័យដ៏ធំសម្រាប់ការអភិវឌ្ឍន៍កម្ពុជា ហើយបើនៅតែបណ្តែតបណ្ដោយមិនអោយមានច្បាប់គ្រប់គ្រងទេនោះ យុវជនដែលគេហៅថា ជាទំពាំងស្នងឬស្សី នឹងជាក្លាយទំពាំងរលួយ ដែលមិនអាចដុះចេញជាឬស្សីបានទេ។
សមាជិករដ្ឋសភារូបនេះ បានទទូចឱ្យរដ្ឋាភិបាលអនុម័តទៅលើសេចក្តីព្រាងច្បាប់ ស្ដីពីការត្រួតពិនិត្យគ្រឿងស្រវឹងអោយបានឆាប់ ដើម្បីបញ្ជូនមកក្រុមនីតិប្បញ្ញត្តិពិនិត្យ និងអនុម័ត។
ឆ្លើយតបនឹងការទទូចរបស់សមាជិករដ្ឋសភា និងព្រឹទ្ធសភា លោកស្រីវេជ្ជបណ្ឌិត រ៉ាយ រ៉ានី តំណាងក្រសួងសុខាភិបាល បានឱ្យដឹងថា សេចក្តីព្រាងច្បាប់ស្តីពីការគ្រប់គ្រងគ្រឿងស្រវឹងនេះ ក្រសួងបានព្រាងចប់សព្វគ្រប់ហើយ។ លោកស្រីបន្តថា ក្រសួងកំពុងប្រមូលទិន្នន័យបន្ថែមទៀត ដើម្បីពេលដាក់ឱ្យអនុវត្តច្បាប់កាន់តែមានប្រសិទ្ធភាព។
ទាក់ទងនឹងបញ្ហានេះ យុវជន សៅ ចាន់សុធារៈ និស្សិតឆ្នាំទី៣នៃវិទ្យាស្ថានស៊ីតិច ដែលទទួលបានជ័យលោភីលេខមួយ ពីការប្រកួតវីដេអូអប់រំស្តីពីផលប៉ះពាល់គ្រឿងស្រវឹងទៅលើយុវជន បានលើកឡើងថា ការសេពគ្រឿងស្រវឹង បានបង្កឱ្យមានផលប៉ះពាល់យ៉ាងច្រើន ដូចជាគ្រោះថ្នាក់ចរាចរណ៍ ការប្រើប្រាស់អំពើហឹង្សាក្នុងគ្រួសារ ការខាតបង់ថវិកា និងបាត់បង់ធនធានមនុស្សដែលជាសរសរទ្រូងជាតិ ជាដើម។ លោកចង់ឱ្យរដ្ឋាភិបាលពន្លឿនអនុម័តច្បាប់ ស្តីពីការគ្រប់គ្រងគ្រឿងស្រវឹង«បើច្បាប់នេះធ្វើបាន ល្អមែនទែនដូចខាងគាត់បានលើកហើយបួនចំណុច..។»
យោងតាមរបាយការណ៍របស់អង្គការសុខភាពពិភពលោក មានមនុស្ស៣លាន៣សែននាក់ បានស្លាប់បាត់បង់ជីវិតជារៀងរាល់ឆ្នាំ ដោយសារតែផលប៉ះពាល់ដែលបណ្តាលមកពីសេពគ្រឿងស្រវឹង ។ ផលប៉ះពាល់អវិជ្ជមានធំៗដែលបណ្តាលមកពីការសេពគ្រឿងស្រវឹងរួមមាន ខាតបង់សេដ្ឋកិច្ច អំពើហិង្សាក្នុងគ្រួសារ គ្រោះថ្នាក់ចរាចរណ៍ និងបង្កជាជំងឺឆ្លងជាង២០០មុខ។ របាយការនេះក៏បង្ហាញផងដែរថា រៀងរាល់មួយនាទី មានមនុស្សម្នាក់បានស្លាប់ ដោយសារគ្រឿងស្រវឹង ៕
