ភ្នំពេញ ៖ អង្គការតម្លាភាពអន្តរជាតិ អំពាវនាវឱ្យអាជ្ញាធរកម្ពុជា គោរពសិទ្ធការងារ និងបញ្ឈប់ការយាយី និងគំរាមកំហែងទៅលើសកម្មជនការពារសិទ្ធមនុស្ស។
សេចក្តីថែ្លងការណ៍នេះ ធ្វើឡើងបន្ទាប់ពីសាលាដំបូងរាជធានីភ្នំពេញ បានសម្រេចឃុំខ្លួន មន្ត្រីការពារសិទ្ធិមនុស្សសមាគមអាដហុកចំនួន៤រូប និង អគ្គលេខាធិការរង គ.ជ.ប មួយរូប បន្ទាប់អង្គភាពប្រឆាំងអំពើពុករលួយបានកោះហៅ ដើម្បីសាកសួរ និងឃាត់ខ្លួន។
មន្ត្រីអង្គការការពារសិទ្ធសមាគមអាដហុក ទាំងនោះត្រូវបានតុលាការចោទប្រកាន់ពីបទ សូកប៉ានសាក្សី និង អគ្គលេខាធិការរង គ.ជ.ប ពីបទសមគំនិត តាមមាត្រា ៥៤៨ និងមាត្រា ២៩ហើយពួកគាត់អាចប្រឈមជាប់ពន្ធធាគារពី ៥ឆ្នាំ ទៅ១០ឆ្នាំ ។
អនុប្រធានក្រុមប្រឹក្សាភិបាលរបស់អង្គការតម្លាភាពអន្តរជាតិ លោកស្រី អេលេណា ប៉ានហ្វីឡូវ៉ា(Elena Panfilova) មានប្រសាសន៍ថា អង្គការនេះមានការព្រួយបារម្ភយ៉ាងខ្លាំងនៅការជ្រៀតជ្រែក ផ្នែកនយោបាយ និងការគំរាមកំហែង អ្នកការពារសិទ្ធមនុស្ស និងអ្នកប្រឆាំងអំពើពុករលួយ ។
អង្គការអន្តរជាតិនេះ ហៅចំណាត់ការរបស់អង្គភាពប្រឆាំងអំពើពុករលួយ និងសាលាដំបូងរាជធានីភ្នំពេញ កំពុងយាយី និងព្យាយាមបំបិទសំលេងអ្នកការពារសិទ្ធមនុស្សនៅកម្ពុជា ៕
