ភ្នំពេញ ៖ មេធាវី ការពារក្ដីឱ្យមន្ត្រីសមាគមសិទ្ធិមនុស្សអាដហុក ៤រូប និងអគ្គលេខាធិការរងគណៈកម្មាធិការជាតិរៀបចំការបោះឆ្នោត (គជប) មួយរូប បានប្រាប់អ្នកសារព័ត៌មានថាមនុស្សទាំង៥រូបនេះត្រូវបាន បញ្ជូនទៅឃុំខ្លួននៅពន្ធនាគារ។
តុលាការសម្រេច ឃុំខ្លួន មន្ត្រីជាន់ខ្ពស់ សមាគមអាដហុកទាំង៤រូបនេះមានលោក នី សុខា លោក យី សុខសាន្ត លោក ណៃ វង់ដា និង លោកស្រី លឹម មុនី ពីបទសូកប៉ាន់និង លោក នី ចរិយា មន្ត្រីគជបពីបទផ្សំគំនិត ករណីកញ្ញា ខុម ចាន់តារាទី ហៅស្រីមុំ ក្រោមក្រមព្រហ្មទណ្ឌមាត្រា ៥៤៨ មានស្ថានទំងន់ទោស ពី៥ឆ្នាំទៅ ១០ឆ្នាំ។ ជាមួយគ្នានេះ លោក សឺន សាលី ជាមន្ត្រីអង្គការសហប្រជាជាតិផ្នែក សិទ្ធិមនុស្សប្រចាំកម្ពុជា ក៏ត្រូវបានតុលាការចោទប្រកាន់ពីបទសមគំនិតក្នុងអំពើសូកប៉ាន់សាក្សីផងដែរ។ប៉ុន្តែលោក សឺន សាលី បានគេចខ្លួន។
អ្នករាយការណ៍ព័ត៌មាន នៃមណ្ឌលព័ត៌មានស្ត្រីកម្ពុជា ១០២ ដែលចុះស្រង់ព្រឹត្តិការណ៍នេះ នៅសាលាដំបូងរាជធានីភ្នំពេញបានឱ្យដឹងថា មន្ត្រីជាន់ខ្ពស់អាដហុកទាំង៤រូបនេះ ត្រូវនាំទៅ ឃុំខ្លួននៅព្រៃស។ ចំណែកលោក នី ចរិយា នាំទៅឃុំនៅស្នងការនគរបាល រាជធានីភ្នំពេញ។
សូមជម្រាបថា ដើមចមឱ្យមានករណីរបស់មន្ត្រីជាន់ខ្ពស់សមាគមអាដហុក ឃុំខ្លួននិងឡើងតុលាការ គឺករណី ការលួចថតសំឡេងតាមទូរស័ព្ទនិងការធ្លាយខ្សែអាត់សំឡេង សេ្នហាមួយ រវាង កញ្ញាស្រីមុំ និង បុរសម្នាក់ដែលគេថា លោក កឹម សុខា។ មុនដំបូង កញ្ញាស្រីមុំ បដិសេធ ខ្សែអាត់នេះ គឺនាង បដិសេធ ទាំងនៅ មុខសមត្ថកិច្ចប៉ូលិស នៅតុមូលនៃវិទ្យុអាសេរី និងវិដេអូ របស់សមាគមអាដហុក ប៉ុន្តែនៅពេលនាងឡើងបំភ្លឺកាលពីថ្ងៃទី១៩ មេសា នាងបានទទួលស្គាល់ថាជាសំឡេង របស់នាង ជាមួយលោក កឹម សុខា ហើយនាងប្រាប់តុលាការថា លោកកឹម សុខា និង មន្ត្រីសង្គមស៊ីវិល ណែនាំនាង កុហក់សមត្ថកិច្ច ករណីសំឡេងខ្សែអាត់នេះ ៕
