ភ្នំពេញ ៖ មេធាវីម្នាក់ក្នុងចំណោម៦នាក់ការពារក្ដីឱ្យមន្ត្រីសមាគមសិទ្ធិមនុស្សអាដហុក ៤រូប និងអគ្គលេខាធិការរងគណៈកម្មាធិការជាតិរៀបចំការបោះឆ្នោត (គជប) មួយរូប បានប្រាប់អ្នកសារព័ត៌មានថាមនុស្សទាំង៥រូបនេះត្រូវបានចោទពីបទសូកប៉ាន់សាក្សី និងសមគំនិតសូកប៉ាន់សាក្សី។
ប៉ុន្តែបើតាមគេហទំព័រFresh News គឺលោកព្រះរាជអាជ្ញារងលោក គុជ គឹមឡុង បានចោទជាផ្លូវការ ប្រឆាំងមនុស្ស៥នេះ គឺពីបទចោទមួយនេះ។ លោកបន្តថា មន្ត្រីអាដហុក៤នាក់ ចោទករណីសូកប៉ាន់ សាក្សី (កញ្ញា ខុម ចាន់តារាទី ហៅស្រីមុំ) ចំណែក លោក នី ចរិយាអគ្គលេខាធិការរង គជប ករណីសមគំនិតសូកប៉ាន់សាក្សី តាមមាត្រា៥៤៨ នៃក្រមព្រហ្មទណ្ឌ។
មន្ត្រីជាន់ខ្ពស់ សមាគមអាដហុកទាំង៤រូបនេះមានលោក នី សុខា លោក យី សុខសាន្ត លោក ណៃ រ៉ង់ដា និង លោកស្រី លឹម មុន្នី។ ជាមួយគ្នានេះ លោក សឺន សាលី ជាមន្ត្រីអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ក៏ត្រូវបានតុលាការចោទប្រកាន់ពីបទសមគំនិតក្នុងអំពើសូកប៉ាន់សាក្សី ផងដែរ។ បើយោង តាមមាត្រា៥៤៨ នៃក្រមព្រហ្មទណ្ឌគឺពួកគាត់នឹងមានទោសពី ៥ឆ្នាំទៅ១០ឆ្នាំ ៕
