ភ្នំពេញ ៖ អុ្នកនយោបាយម្នាក់ដែល កំពុងស្ថិតនៅក្នុងសំនុំរឿងនយោបាយស្នេហា មានឈ្មោះក្ដីក្ដាំង នៅ តុលាការបានបន្តសន្យា រស់នៅក្បែរប្រជាពលរដ្ឋជានិច្ចទោះជារលកកំដៅនយោបាយ ធ្វើឱ្យមានការព្រួយបារម្ភអំពី ភាពងាយគ្រោះថ្នាក់ដល់ខ្លួនក៏ដោយ។
លោក កឹម សុខា ប្រធានស្ដីទីគណបក្សសង្គ្រោះជាតិ បានថ្លែងទៅកាន់អ្នកគាំទ្រ ជាច្រើនពាន់នាក់ នៅក្នុងវេទិកាមួយ កាលពីថ្ងៃម្សិលមិញ នៅខេត្តស្វាយរៀងថា រយៈពេលចុងក្រោយនេះ ទោះបីមានកម្ដៅនយោបាយយ៉ាងណាក៏ដោយ តែទឹកចិត្តរបស់លោក នៅតែស្ថិតនៅជាមួយ ពលរដ្ឋជានិច្ច។
លោក កឹម សុខា បានលើកឡើងដូចនេះថា ៖«សកម្មជនគណបក្សសង្គ្រោះជាតិគ្រប់លំដាប់ថ្នាក់ ជាពិសសេសថ្នាក់មូលដ្ឋាននៅតែមានភាពរឹងមាំ ហើយប្រជាពលរដ្ឋខ្មែរកាន់តែច្រើនទៅៗ បានផ្ដល់នូវភាពកក់ក្ដៅ និងក្ដីសង្ឃឹមមកលើគណបក្សសង្គ្រោះជាតិ»។
នៅប៉ុន្មានថ្ងៃមកនេះ បណ្ដាញសង្គម និងសារព័ត៌មានមួយចំនួន ចុះផ្សាយថាលោក កឹម សុខា បានភៀសខ្លួនទៅក្រៅប្រទេសខណៈលោក ត្រូវបានកញ្ញា ធី សុវណ្ណថា យុវតីល្បីឈ្មោះ លើបណ្ដាញសង្គម ប្ដឹងលោកពីបទបរិហាកេរ្តិ៍ ដោយទាមទារសំណងផ្លូវចិត្ត ១លានដុល្លារអាមេរិក។
បន្ថែមលើនេះទៀត ស្ត្រីម្នាក់ដែលគេថា គូស្នេហាសន្ទនា ជាមួយលោក គឺកញ្ញា ខុម ចាន់តារាទី ហៅស្រីមុំ បានប្ដឹងលោក ទារជម្ងឺចិត្ត ៣០ម៉ឺនដុល្លារ ករណីបោកនាង ថាទិញផ្ទះឱ្យនាងហើយ រួមការឆ្លើយ ដាក់ របស់កញ្ញា ផ្ដើមឱ្យមានការចោទសួរ អំពីសុវត្ថិភាព ធ្វើនយោបាយ របស់លោក កឹម សុខា។
ថ្លែងនៅ ក្នុងវេទិកានោះលោក កឹម សុខា បានសន្យាដូចនេះថា៖«ខ្ញុំត្រូវតែនៅជាមួយសកម្មជនគណបក្សសង្គ្រោះជាតិគ្រប់លំដាប់ថ្នាក់ ដើម្បីភាពរឹងមាំរបស់គណបក្សយើង។ខ្ញុំត្រូវតែនៅជិតស្និទ្ធជាមួយប្រជាពលរដ្ឋ ដើម្បីផ្ដល់នូវភាពកក់ក្ដៅ និងក្ដីសង្ឃឹម ដល់ពួកគាត់»។
លោក កឹម សុខា ធ្លាប់ជាប់ពន្ធនាគារម្ដង កាលពីឆ្នាំ២០០៥ កាលលោកជាប្រធានមជ្ឈមណ្ឌលសិទិ្ធមនុស្សកម្ពុជា ហើយបទចោទប្រឆាំងលោកគឺករណី បរិហាកេរ្តិ៍ ដោយសារផ្ទាំងបដា ទិវាសិទ្ធិមនុស្ស ១០ធ្នូឆ្នាំ២០០៥ រិះគន់រដ្ឋាភិបាល គណបក្សប្រជាជនកម្ពុជា ៕
