ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានធ្វើដំណើរតាមរថភ្លើងពីភ្នំពេញទៅកាន់ខេត្តព្រះសីហនុ នៅព្រឹកថ្ងៃទី៣០ ខែមេសា ឆ្នាំ ២០១៦ នេះ ។ តាមរយៈហ្វេសប៊ុកផ្លូវការ សម្តេចនាយករដ្ឋមន្ត្រី ហ៊ុន សែន បានទទូចឱ្យប្រជាពលរដ្ឋអាជីវករ ពាណិជ្ជករ ជ្រើសរើសការធ្វើដំណើរនិងដឹកជញ្ជូនទំនិញតាមមធ្យោបាយផ្លូវដែក ជំនួសការធ្វើដំណើរតាមមធ្យោបាយផ្សេងៗ ព្រោះចំណាយថវិកាតិច ហើយមានសុវត្ថិភាព និងប្រសិទ្ឋិភាពខ្ពស់។
សម្តេចនាយករដ្ឋមន្ត្រីបានសរសេរបន្ថែមថា ៖ « រថភ្លើងនិងផ្លូវដែកត្រូវបានបំផ្លាញស្ទើរទាំងស្រុងដោយសារសង្គ្រាមកាលពីជាង ៤០ ឆ្នាំកន្លងទៅនេះ។ នៅពេលនេះការរៀបចំជួសជុល និងកសាងផ្លូវដែកត្រូវបានរៀបចំឡើងវិញ ដើម្បីជំរុញការធ្វើដំណើរនិងដឹកជញ្ជូនទំនិញពីកំពង់ផែក្រុងព្រះសីហនុពីតំបន់ឧស្សាហកម្ម តំបន់សេដ្ឋកិច្ចពិសេសនានាមកកាន់ទីក្រុងភ្នំពេញ និងពីភ្នំពេញទៅកាន់បណ្តាខេត្តជាច្រើនទៀតដូចជាពោធិ៍សាត់ បាត់ដំបង និងបន្ទាយមានជ័យជាដើម» ។
សម្តេច ហ៊ុន សែន ថ្លែងយ៉ាងដូច្នេះថា ពេលនេះមានជម្រើសធ្វើដំណើរតាមរថភ្លើងឡើងវិញហើយ ។ មានផ្លូវរថភ្លើងវិញ ដោយសារប្រទេសជាតិមានសុខសន្តិភាពទើបរាជរដ្ឋាភិបាលមានឱកាសកសាងផ្លូវគមនាគមន៍ដឹកជញ្ជូនគ្រប់បែបយ៉ាងដើម្បីសម្រួល និង បម្រើផលប្រយោជន៍ជូនប្រជាពលរដ្ឋ ក៏ដូចជាពាណិជ្ជករជាតិនិងអន្តរជាតិឱ្យកាន់តែទូលំទូលាយ។
