ភ្នំពេញ ៖ មន្ដ្រីច្បាប់នៃសមាគមអាដហុក បានឱ្យដឹងថាអង្គការរបស់លោក និងប្ដឹងទៅក្រុមប្រឹក្សាសិទ្ធិមនុស្សអង្គការសហប្រជាជាតិ(អ.ស.ប) ប្រសិនបើការដោះស្រាយតាមផ្ឡូវច្បាប់នៅកម្ពុជា មិនអាចឱ្យមន្ដ្រីរបស់អាដហុក រួចផុតពីការចោទប្រកាន់និងការឃុំខ្លួន។
ការថ្លែងរបស់លោក ឡាត់ គី ធ្វើឡើងនៅចំពោះមុខអ្នកសារព័ត៌មាន បន្ទាប់ពីលោក បានចូល ទៅស្ដាប់សន្និសីទសារព័ត៌មានរបស់អង្គភាពប្រឆាំងអំពើពុករលួយ(ACU) នៅមុននេះបន្ដិច ពាក់ព័ន្ធនឹងការស៊ើបសួរមន្ដ្រីអាដហុក៤រូប រួមនឹងលោក នី ចរិយា ម្នាក់ផងដែរ ដែលជាអគ្គលេខាធិការរងគ.ជ.ប។
លោក នី សុខា លោក ណៃ វង់ ដា លោក យី សុខសាន្ដ និងលោកស្រី លឹម មុនី ដែលជាមន្ដ្រី ជាន់ខ្ពស់នៃសមាគមអាដហុក ដែលពួកគាត់ត្រូវបានអង្គភាពប្រឆាំងអំពើពុករលួយ កោះហៅនិងឃុំខ្លួននៅACU ពាក់ព័ន្ធនឹងការឆ្លើយដាក់ កញ្ញា ខុម ចាន់តារាទី ហៅស្រីមុំ ថាបង្គាប់ឱ្យ កញ្ញា និយាយកុហក់សមត្ថកិច្ច ករណីខ្សែអាត់សម្លេងស្នេហារវាងកញ្ញានិងបុរសម្នាក់ដែលគេថា លោក កឹម សុខា ប្រធានស្ដីទីគណបក្សសង្គ្រោះជាតិ។
បើតាមលោក ឡាត់ គី គឺមន្ដ្រីអាដហុកទាំង៤រូបនេះ ត្រូវបានACU សម្រេចឃុំខ្លួនជាផ្លូវការតាំងពីម៉ោង៨យប់ កាលពីយប់ថ្ងៃទី២៨ខែមេសា ឆ្នាំ២០១៦ ហើយពួកគាត់អាចនិងត្រូវបញ្ចូនទៅតុលាការនៅថ្ងៃនេះ ប្រសិនបើ ACU ចោទប្រកាន់ពួកគាត់ដែរនោះ។
សូមជម្រាបថា ACU បានកោះហៅមន្ដ្រីសង្គមស៊ីវិល៨រូប ដែលកញ្ញា ខុម ចាន់តារាទី ឆ្លើយដាក់ គឺ មានអ្នកទាំង៥នេះ និងលោកស្រី ធីតា ឃឹះ លោកស្រី ទ្រី ឈួន ជាមួយមេធាវី សមាគមអាដហុក ប៉ុន្ដែពួកគាត់ទាំងពីរ បានសាកសួររួចហើយ ដោយអោយត្រឡប់ទៅកន្លែង ធ្វើការវិញ ។
ចំណែកឯ លោក សឺន សាលី មន្ដ្រីសិទ្ធិមនុស្សអង្គការសហប្រជាជាតិ ACU មិនទាន់កោះហៅអោយចូលខ្ឡួននៅថ្ងៃណាទេ ដោយសារតែមន្ដ្រីរូបនេះ រង់ចាំទទួល លិខិតមួយ ពីក្រសួងការបរទេសនៅកម្ពុជាជាមុនសិន ៕
