ភ្នំពេញ ៖ ពលរដ្ឋរងគ្រោះដីធ្លីប្រមាណជាង ៣៤គ្រួសារឡើងមកប្រមូលផ្តុំតវ៉ារឿងទំនាស់ដីធ្លី និងបញ្ហាកង្វះទឹកប្រើប្រាស់ប្រចាំថ្ងៃនាថ្ងៃទី២៨ខែមេសា ឆ្នាំ២០១៦ នេះនៅខាងមុខសាលាខេត្តកំពង់ឆ្នាំង ដើម្បីទទូចឱ្យអាជ្ញាធរឆាប់ពន្លឿនការដោះស្រាយបញ្ហាទំនាស់ដីធ្លី និងជួយដោះស្រាយបញ្ហាកង្វះទឹកជូនប្រជាពលរដ្ឋឱ្យបានឆាប់។
ស្ត្រីម្នាក់ក្នុងចំណោមអ្នកឡើងមកតវ៉ានៅខាងមុខសាលាខេត្តកំពង់ឆ្នាំង អ្នកស្រី អុំ សុភា បាននិយាយថា អ្នកភូមិរបស់អ្នកស្រីមានទំនាស់ដីធ្លីនេះ អស់រយៈពេលជាង១២ឆ្នាំទៅហើយ មិនទាន់មានការដោះស្រាយនៅឡើយនោះទេ ទើបអ្នកស្រីឡើងមកតវ៉ា៖
អ្នកស្រីបានបន្តថា បញ្ហាដីធ្លីនេះបានធ្វើឱ្យពលរដ្ឋជួបការលំបាកទាំងទីជំរកផង និងជីវភាពរស់នៅប្រចាំថ្ងៃផង មិនតែប៉ុណ្ណោះពេលថ្មីនេះ ក៏កំពុងជួបការកង្វះទឹកប្រើប្រាស់ទៀតផង ។ អ្នកស្រីរូបនេះបានសង្កត់ធ្ងន់ៗ ថាបើអាជ្ញាធរនៅតែមានការដោះស្រាយជូនពួកគាត់ឱ្យបានឆាប់នោះទេ ពួកគាត់ឡើងមកសុំការអន្តរាគមន៍ពីសម្តេច ហ៊ុន សែន តែម្តង។
អ្នកស្រី អុំ សុភា ៖«ពេលនេះយើងនៅរងចាំមើលគាត់សិន បើគាត់មិនមកទេយើងនឹងនៅធ្វើសកម្មភាពបន្តទៀត បើត្រឹមថ្នាក់ខេត្តមិនអើរពើ យើងប្រហែលជានាំកម្លាំងយើងទៅដល់ផ្ទះនាយករដ្ឋមន្ត្រីតែម្តង»។
ទាក់ទងនឹងបញ្ហានេះ វិទ្យុស្រី្តមិនអាចទាក់ទង់អភិបាលខេត្តកំពង់ឆ្នាំងឆ្លើយតបបានទេ។
ចំនែកមន្ត្រីសម្របសម្រួលសិទ្ធមនុស្សលីកាដូប្រចាំខេត្តកំពង់ឆ្នាំង លោក គង់ ច័ន្ទមុនី មានប្រសាសន៏ថា រឿងនេះ ទាល់តែមានការជជែងពិភាក្សាជាមួយភាគីទាំងសង់ខាង ទើបមានដំណោះស្រាយល្អទាំងពីរភាគី ហើយបើមិនបានមានការពិភាក្សាគ្នាទេ គឺនៅតែមានភាគីម្ខាងតវ៉ារហូតគ្មានទីបញ្ចប់នោះទេ។
លោក គង់ ច័ន្ទមុនី ៖«ប៉ិនសំខាន់យើងតស៊ូមតិ ដើម្បីប្រើនិតីវិធីដាក់បណ្តឹងតវ៉ានឹងរហូតរឿងហ្នឹងនៅតែដើររឿងហ្នឹង»។
សូមរំលឹកថា ទំនាស់ដីធ្លីរវាងពលរដ្ឋសហគមន៍ឡពាងគឺជាមួយក្រុមហ៊ុនខេឌីស៊ី (KDC) របស់លោកស្រី ជា ខេង ភរិយាលោក ស៊ុយ សែម រដ្ឋមន្ត្រីក្រសួងរ៉ែនិងថាមពល កើតឡើងតាំងពីឆ្នាំ២០០៦៕
