ភ្នំពេញ ៖ នាយកប្រតិបត្តិអង្គការក្រុមប្រឹក្សាយុវជនកម្ពុជា លោក អ៊ឹម សុធី បានលើកទ្បើងថា យុវជនដែលគ្មានជំនាញវិជ្ជាជីវៈនឹងធ្វើឱ្យប៉ះពាល់ដល់សេដ្ឋកិច្ចសង្គម។ ការថ្លែងបែបនេះធ្វើនៅក្នុងកិច្ចប្រជុំពិគ្រោះយោបល់លើកទី០៤ នៃក្រុមការងារសម្របសម្រួលបច្ចេកទេសសម្រាប់បណ្តុះបណ្តាលជំនាញវិជ្ជាជីវៈនិងការងារយុវជន ក្រោមប្រធានបទ«ធ្វើការងាររួមគ្នាដើម្បីអភិវវឌ្ឍយុវជននៅកម្ពុជា» នា ព្រឹកថ្ងៃទី ២៨ ខែមេសា នេះ។លោក ជួន សារ៉េត រាយការណ៍ពីព័ត៌មាននេះ ៖
យុវជនដើរតួនាទីយ៉ាងសំខាន់ក្នុងការអភិវឌ្ឍប្រទេសជាតិ តែបើយុវជន មិនបានយកចិត្តទុកដាក់ទៅលើការសិក្សាជំនាញវិជ្ជាជីវៈរបស់ខ្លួននោះប្រាកដណាស់ថាសង្គមមិនរីកចម្រើនជឿនលឿនដែរ។ ចំណែកឯកកម្ពុជា បច្ចុប្បន្ននេះ យុវជនកាន់តែមានកំណើនច្រើន គឺពីមួយឆ្នាំទៅមួយឆ្នាំ ហើយពួកគេពុំមានជំនាញវិជ្ជាជីវៈ ក៏ដូចជាអត់ការងារធ្វើនោះ សង្គមជាតិនឹងពុំអាចមានការរកីចម្រើនបានលឿននោះទេ។ នេះជាការលើកទ្បើងរបស់លោកលោក អ៊ឹម សុធី តំណាងអង្គការយុវជនមួយដែលធ្វើការពាក់ព័ន្ធនឹងយុវជន។នាយកប្រតិបត្តិអង្គការក្រុមប្រឹក្សាយុវជនកម្ពុជា លោក អ៊ឹម សុធី រូបនេះ បានផ្តល់បទសម្ភាសន៍ជាមួយវិទ្យុស្ត្រីនៅថ្ងៃនេះថា តាមការសង្កេតរបស់លោកឃើញថា យុវជននាពេលកន្លងមកមិនបានយកចិត្តទុកដាក់ទៅលើការសិក្សាជំនាញវិជ្ជាជីវៈច្រើននោះទេ។
លោក អ៊ឹម សុធី បន្ថែមទៀតថា យុវជនដែលមានជំនាញវិជ្ជាជីវៈនាពេលបច្ចុប្បន្ន មានប្រមាណ៥០% ខណៈកន្លងមកនេះយុវជនមានជំនាញវិជ្ជាជីវៈមានប្រមាណតែ៤០% ។ លោកថា យុវជនផ្ទាល់ក៏ដូចជាដៃគូពាក់ព័ន្ធត្រូវចូលរួមដោះស្រាយពីកង្វះខាតជំនាញវិជ្ជាជីវៈនេះទៅដល់យុវជន ដទៃទៀត
ពាក់ព័ន្ធនឹងការលើកទ្បើងខាងលើនេះដែរ នាយករងវិទ្យាស្ថានអភិវឌ្ឍន៍សហគ្រិនភាពកម្ពុជា-ឥណ្ឌា លោក ម៉ិល ផូ បានផ្តល់បទសម្ភាសន៍ជាមួយអ្នកសារព័ត៌មានថា ការសិក្សាជំនាញវិជ្ជាជីវៈជារឿងសំខាន់ដែលយុវជនត្រូវយកចិត្តទុកដាក់។
លោក ម៉ិល ផូ បានឱ្យដឹងថាប្រសិនយុវជនមិនបានយកចិត្តទុកដាក់ច្រើនទៅលើការសិក្សាជំនាញវិជ្ជាជីវៈមានន័យថា យុវជនភាគច្រើនពួកគេចូលចិត្តសិក្សាវគ្គបណ្តុះបណ្តាលរយៈពេលវែងដូចជាថ្នាក់បរិញ្ញាបត្រ ឬថ្នាក់បរិញ្ញាបត្ររងជាដើម។ លោក ម៉ិល ផូ ទទូចឱ្យយុវជនដែលគ្មានការងារធ្វើ ឬសិស្ស-និស្សិតដែលបានបោះបង់ការសិក្សាចោលត្រូវក្រទ្បេកមើលពីការសិក្សាជំនាញវិជ្ជាជីវៈព្រោះថាជំនាញវិជ្ជាជីវៈជាតំរូវការទីផ្សារនៅក្នុងប្រទេសកម្ពុជាសព្វថ្ងៃ។
ឆ្លើយតបនឹងការលើកទ្បើងខាងលើនេះ ទីប្រឹក្សាស្ថាប័នទីភ្នាក់ងារជាតិមុខរបរ និងការងារ (NEA) កញ្ញា អ៊ូច ជាច័ន្ទមល្លិកា បានផ្តល់បទសម្ភាសន៍ជាមួយអ្នកសារព័ត៌មាននៅថ្ងៃនេះដែរថាស្ថាប័ននេះ មានតួនាទីសំខាន់ចំនួន២ គឺជួយស្វែងរកការងារជូនប្រជាពលរដ្ឋ និងផ្តល់ព័ត៌មានទីផ្សារការងារផងដែរ។
កញ្ញា មល្លិកាបន្តថាដើម្បីចូលរួមចំណែកក្នុងការលើកកម្ពស់ជំនាញវិជ្ជាជីវៈទៅដល់យុវជន ស្ថាប័នបានផ្តល់ជាវគ្គបណ្តុះបណ្តាលដើម្បីជួយគាំទ្រ ទៅដល់យុវជនដែលត្រៀមស្វែងរកការងារធ្វើ។
សូមបញ្ជាក់ថាការបង្កើតឱ្យមានកិច្ចប្រជុំខាងលើនេះមានគោលបំណងដើម្បីចែករំលែកព័ត៌មានពីសមិទ្ធិផលនៃការអនុវត្តគម្រោងក្នុងត្រីមាសទីមួយ និងផែនការសកម្មភាពប្រចាំត្រីមាសទីពីររបស់ដៃគូនីមួយៗទាក់ទងជំនាញវិជ្ជាជីវៈ និងការពិភាក្សាពិគ្រោះយោបល់លើសេចក្តីព្រាងសម្រេចចុងក្រោយនូវការផ្ដត់គំនិតនៃវេទិកាសម្របសម្រួល និង ផែនការសកម្ម ដែលមានអ្នកចូលរួមប្រមាណ៥០រូប មកពីស្ថាប័នរដ្ឋ អង្គការ និងស្ថាប័នមួយចំនួនទៀត ៕
