ភ្នំពេញ ៖ លោក នី ចរិយា អគ្គលេខាធិការរងគជប និងលោកស្រី ធីតា ឃីះ នាយិការអង្គការសីលកា បានចូលបំភ្លឺ នៅអង្គភាពប្រឆាំងអំពើពុករលួយ ករណីកញ្ញា ខុម ចាន់តារាទី ហៅស្រីមុំឆ្លើយដាក់ថាផ្ដល់គំនិតឱ្យនាង និយាយកុហកសមត្ថកិច្ចពាក់ព័ន្ធសំឡេងខ្សែអាត់ស្នេហាជាមួយបុរសម្នាក់ ដែលគេថាលោក កឹម សុខា។
តាមអ្នករាយការណ៍ព័ត៌មាននៃវិទ្យុស្ត្រី លោក នី ចរិយា និងលោកស្រី ធីតា ឃីះ បានចូលទៅភ្លឺនៅ ព្រឹកថ្ងៃព្រហស្បតិ៍នេះ ទៅតាមការកោះហៅរបស់អង្គភាពប្រឆាំងអំពើពុករលួយ ករណីកញ្ញាស្រីមុំ ឆ្លើយដាក់ ប៉ុន្តែពួកគាត់ត្រូវចូលទៅកាន់បន្ទប់ផ្សេងៗគ្នា ។
តាមប្រភពដដែលនេះ មន្ត្រីអង្កការអាដហុកចំនួន ៤នាក់ទៀតក៏បន្តចូលបំភ្លឺនៅព្រឹកនេះទៀត បើទោះជាពួកគេបានចូលបំភ្លឺកាលពីថ្ងៃម្សិលមិញក៏ដោយ ។
ទោះជាយ៉ាងណា មន្ត្រីសិទ្ធិមនុស្សម្នាក់របស់អង្គការសហប្រជាជាតិ ដែលត្រូវអង្គភាពប្រឆាំងអំពើពុករលួយ ករណីស្រីមុំឆ្លើយដាក់ដែរនេះ នៅមិនទាន់ចូលខ្លួនមកបំភ្លឺដោយសារតែគេត្រូវរង់ចាំលិខិតមួយពីក្រសួងការបរទេសបញ្ជាក់បន្ថែម។ នេះបើតាមប្រភពដដែលនេះ ។
កាលពីថ្ងៃទី ២៤ មេសា មេឃុំម្នាក់របស់គណបក្សប្រឆាំងដែលត្រូវកញ្ញាស្រីមុំ ឆ្លើយដាក់ថាយកប្រាក់ ៥០០ដុល្លារឱ្យនាង ហើយថាកុំឱ្យនាងនិយាយការពិតប្រាប់សមត្ថកិច្ច ត្រូវបានអង្គភាពប្រឆាំងអំពើពុករលួយ កោះហៅមកសាកសួរ ឥឡូវត្រូវបាននាំទៅឃុំខ្លួននៅពន្ធនាគារព្រៃស ករណីសូកប្រាក់កញ្ញាស្រីមុំ កុំឱ្យប្រាប់សមត្ថកិច្ចរឿងខ្សែអាត់សំឡេងស្នេហាជាមួយបុរសម្នាក់គេថា លោក កឹម សុខា ប្រធានស្ដីទីគណបក្សសង្គ្រោះជាតិ ៕
