ភ្នំពេញ៖ ប្រជាពលរដ្ឋភូមិខ្នងក្រពើលិច និង ខាងកើតនៃខេត្តត្បូងឃ្មុំ ប្រមាណជាង ១០០នាក់ បានប្រមូលផ្តុំគ្នា នៅមុខក្រសួងដែនរៀបចំដែនដីនគរូបនីយកម្មនិងសំណង់រាជធានីភ្នំពេញ នាព្រឹកថ្ងៃទី ២៧ ខែមេសានេះ ដើម្បីដាក់ញតិ្តជំរុញឲ្យក្រសួងពន្លឿនការចេញប័ណ្ណកម្មសិទិ្ធកាន់កាប់ដីធ្លីឲ្យពួកគាត់ដែលកំពុងរស់នៅសព្វថ្ងៃ ។
ប្រជាពលរដ្ឋប្រមាណជាង ១០០ នាក់ តំណាងឲ្យប្រាពលរដ្ឋ ៥២៤ គ្រួសាររស់នៅភូមិខ្នងក្រពើលិច និងខ្នងក្រពើកើត ឃុំត្រមូង ស្រុកមេមត់ ខេត្តត្បូងឃ្មុំ បានឡើងមករាជធានីភ្នំពេញ ដើម្បីដាក់ញត្តិជំរុញឲ្យក្រសួងរៀបចំដែនដីនគរូបនីយកម្មនិងសំណង់ពន្លឿនចេញប័ណ្ណកម្មសិទ្ធិកាន់កាន់ដីធ្លីឲ្យពួកគាត់ ។
តំណាងពលរដ្ឋ អ្នកស្រី ង៉ូវ ណៃអេង មានប្រសាសន៍ថា ប្រជាពលរដ្ឋដែលបានមកដាក់ញ្ញត្តិនៅក្រសួងរៀបចំដែនដីនេះ គឺមានគោលបំណងជំរុញឲ្យក្រសួងចេញប័ណ្ណកម្មសិទ្ធិរស់នៅស្របច្បាប់ ។ អ្នកស្រីថា ដីដែលប្រជាពលរដ្ឋកំពង់តែរស់នៅសព្វថ្ងៃនេះមានតែសម្រង់ព័ត៌មាននៃការរស់នៅតែប៉ុណ្ណោះ ប៉ុន្តែការវាស់វែងពីអាជ្ញាធរមិនទាន់មានលិខិតបញ្ជាក់ជាកម្មសិទ្ធិនៅឡើយទេ ។ អ្នកស្រីបន្តទៀតថា ពួកគាត់បានរស់នៅលើដីនោះតាំងពីយូរណាស់មកហើយ ។
លើសពីនេះទៀត អ្នកស្រីបញ្ជាក់ថា ពួកគាត់ធ្លាប់បានដាក់ញ្ញត្តិជាច្រើនដងមកហើយ ប៉ុន្តែនៅតែមិនទាន់មានដំណោះនោះទេ ។
លោក កៅ អិត ជាប្រជាពលរដ្ឋមានទំនាស់ដីធ្លីលើកឡើងថា រឿងរ៉ាវនេះរូបលោករួមទាំងពលរដ្ឋដទៃទៀត ចាប់ផ្តើមតវ៉ាតាំងពីឆ្នាំ ២០០៨ មកម្ល៉េះ ប៉ុន្តែគ្មានដំណោះអាជ្ញាធរឡើយរហូតមកទល់ពេលនេះ។
លោក សេង ឡូត ជាអ្នកនាំពាក្យក្រសួងរៀបចំដែនដីនគរូបនីយកម្មនិងសំណង់ បានចេញមកទទួលញត្តិពីពលរដ្ឋ ដោយបានសន្យាថា នឹងឆ្លើយតបនៅពេលល្ងាចនេះក្រោយបញ្ចប់កិច្ចប្រជុំ ។
