ភ្នំពេញ៖ កញ្ញា ធី សុវណ្ណថា បានប្រាប់អ្នកសារព័ត៌មាននៅថ្ងៃទី ២៧ ខែមេសានេះថា កញ្ញាចង់ឱ្យតុលាការផ្តន្ទាទោសលោក កឹម សុខា តាមអំណាចរបស់តុលាការ ។ ការស្នើនេះបន្ទាប់ពីកញ្ញា ធី សុវណ្ណថា ដឹងថាអ្នកនាង ខុម ចាន់តារាទី ហៅ ស្រីមុំ បានសារភាពប្រាប់តុលាការថា ពិតជាបាននិយាយក្នុងខ្សែអាត់សំឡេងជាមួយលោក កឹម សុខា មែន ដែលនាំឱ្យប៉ះពាល់កេរ្តិ៍ឈ្មោះកញ្ញា ធី សុវណ្ណថា ។ ករណីនេះ លោក កឹម សុខា នៅតែមិនប្រតិកម្មតបឡើយ ។ លោក កែវ សុខា រាយការណ៍ពីព័ត៌មាននេះ ៖
កញ្ញា ធី សុវណ្ណថា និយាយប្រាប់អ្នកសារព័ត៌មានថា កញ្ញាទទូចឱ្យតុលាការផ្តន្ទាទេសលើកលោក កឹម សុខា ប្រធានស្តីទីគណបក្សសង្គ្រោះជាតិ តាមអំណាចឆន្ទានុសិទ្ធិរបស់តុលាការ តែកញ្ញាទាមទារសំណង១លានដុល្លារពីលោក កឹម សុខា។
កញ្ញា ធី សុវណ្ណថា បន្តថា មូលហេតុដែលស្នើបែបនេះ ក៏ព្រោះតែអ្នកនាង ខុម ចាន់តារាទី បានសារភាពនៅតុលាការថា ពិតជាបាននិយាយក្នុងខ្សែអាត់សំឡេងជាមួយលោក កឹម សុខា ពិតប្រាកដមែន។
កញ្ញា ធី សុវណ្ណថា ថ្លែងដូចនេះ បន្ទាប់ពីកញ្ញាបានចូលបំភ្លឺចំពោះពាក្យបណ្ដឹងរបស់កញ្ញាដែលប្ដឹង លោក កឹម សុខា ពីបទបរិហារកេរ្តិ៍ និងតាមការកោះហៅរបស់លោក កែវ សុខជាតិ ព្រះរាជអាជ្ញារងសាលាដំបូងរាជធានីភ្នំពេញ ។
កញ្ញា ធី សុវណ្ណថា មានឈ្មោះល្បីលើប្រព័ន្ធសង្គមហ្វេសប៊ុករូបនេះបញ្ជាក់ថា ការចង់ឱ្យតុលាការចាត់ការលើកលោក កឹម សុខា ក៏ព្រោះតែកញ្ញាយល់ថាក្នុងខ្សែអាត់សំឡេងនោះ លោក កឹម សុខា បានចោទកញ្ញា ធី សុវណ្ណថា ថាបានបោកប្រាស់យកប្រាក់មូលនិធិពីក្រៅប្រទេសមកទិញឡានជិះផ្ទាល់ខ្លួន។
កញ្ញាបន្តថា ការលើកឡើងរបស់លោក កឹម សុខា ក្នុងខ្សែអាត់សំឡេងនោះធ្វើឱ្យប៉ះពាល់កេរ្តិ៍ឈ្មោះកញ្ញា ព្រោះបច្ចុប្បន្នកញ្ញាគឺជាប្រធានអង្គការជួយក្មេងកំព្រាក្រីក្រ ព្រមទាំងប៉ះពាល់ដល់សកម្មភាពនយោបាយរបស់កញ្ញាផងដែរ។
វិទ្យុស្ត្រីមិនទាន់អាចសុំការបំភ្លឺពីលោក កឹម សុខា ប្រធានស្ដីទីគណបក្សសង្គ្រោះជាតិ និង លោក យឹម សុវណ្ណ អ្នកនាំពាក្យគណបក្សសង្គ្រោះជាតិបាននៅឡើយនោះទេ ពីព្រោះលោកទាំងពីរមិនទទួលទូរស័ព្ទ។
ទោះយ៉ាងណាទាំងលោក កឹម សុខា និង គណបក្សសង្គ្រោះជាតិទាំងមូលធ្លាប់បានប្រកាន់ជំហរមិនឈ្លោះ មិនឆ្លើយ មិនឆ្លង ពាក់ព័ន្ធរឿងអាសូវស្នេហាដែលបក្សប្រឆាំងលើកឡើងជារឿយៗថា ជាការរៀបចំរបស់អ្នកនយោបាយ និងជារឿងឥតប្រយោជន៍។
សូមបញ្ជាក់ថានាង ធី សុវណ្ណថា បានប្ដឹងលោក កឹម សុខា « អំពីអំពើបរិហារ្តិ៍តាមរយៈខ្សែអាត់សំឡេងផ្សព្វផ្សាយក្នុងសារព័ត៌មាន Freshnews កាលពីថ្ងៃទី ០១ ខែមីនា ឆ្នាំ ២០១៦ និងតាមហ្វេសប៊ុកឈ្មោះ រឿងពិត CNRP » ។
ក្នុងសំណុំរឿងអាសូវស្នេហាក្នុងខ្សែអាត់សំឡេងដែលគេថាជាការឆ្លើយឆ្លងរបស់លោក កឹម សុខា និងអ្នកនាង ខុម ចាន់តារាទី ហៅ ស្រីមុំ នេះ បានរាលដាលដល់មនុស្សមួយចំនួន ក្នុងនោះរួមមានសមាជិកអង្គការសង្គមស៊ីវិល សកម្មជនបក្សប្រឆាំង និងអ្នកវិភាគសង្គមផងដែរ ។ អំពីរឿងនេះ មន្ត្រីជាន់ខ្ពស់សមាគមអាដហុកចំនួន ០៥ នាក់ បានឡើងបំភ្លឺនៅអង្គភាពប្រឆាំងអំពើពុករលួយក្រោមការកោះហៅមកសាកសួរពាក់ព័ន្ធផ្ដល់គំនិតឱ្យកញ្ញាស្រីមុំ និយាយកុហកសមត្ថកិច្ច ៕
