ភ្នំពេញ ៖ ជនជាប់ចោទ លោក នួន ជា អតីតប្រធានរដ្ឋសភានៃរបបកម្ពុជាប្រជាធិបតេយ្យ បានលើកឡើងថាវៀតណាមបានយល់ព្រមប្រគល់ កោះពូលូវ៉ៃឱ្យកម្ពុជាវិញតែលោកថា វៀតណាមព្យាយាមឈ្លានពានកម្ពុជា។ លោក នួន ជា បានលើកឡើងបែបនេះក្នុងសវនាការសាលាក្ដីខ្មែរ ថ្ងៃពុធទី២៧មេសានេះ ខណៈ លោក ឡាច ឡើង ផ្ដល់សក្ខីកម្ម អំពីទារុណកម្មនៅគុកទួលស្លែង។
លោក នួន ជា បានផ្ដល់ចំលើយថានៅដើមខែឧសភា ១៩៧៥ កងទ័ពវៀតណាមបានឈ្លានពានកម្ពុជាតាមឆ្នេរសមុទ្រនៃខេត្តកំពត ហើយបន្ថែមទៀតនោះវៀតណាមបាន ឈ្លានពាន និងបានចូលកាន់កាប់មូលដ្ឋានទ័ពខ្មែរនៅលើកោះពូលូវ៉ៃ។ ទោះជាយ៉ាងនេះក្ដីលោកអះអាងថាវៀតណាមបានប្រគល់កោះនោះមកឲ្យកម្ពុជាវិញ។
សូមជម្រាបថា បើតាមការចុះផ្សាយរបស់គហទំព័រ Wikipedia គឺកោះពូលូវ៉ៃមាន២គឺ ពូលូវ៉ៃ១ និងកោះ ពូលូវ៉ៃ២ ដោយមានទំហំផ្ទៃដីសរុប ជិត៤គីឡូម៉ែត្រក្រឡា។ វាស្ថិតនៅឯនាយបន្តិចនៃខេត្តកំពត នៃប្រទេសកម្ពុជា ៕
