ភ្នំពេញ ៖ ខ្ញុំជា ឈុត វុទ្ធី គឺជាខ្សែភាពយន្តនិយាយអំពីសកម្មភាពវិរៈភាពរបស់ លោក ឈុត វុទ្ធី សកម្មជនការពារព្រៃឈើដ៏ល្បីនៅកម្ពុជាដែលត្រូវបានបាញ់សម្លាប់កាលពីថ្ងៃទី២៦មេសាឆ្នាំ២០១២ បានចាក់បញ្ចាំងដូចបំណង ទោះជាសមត្ថកិច្ចអាជ្ញាធរខណ្ឌសែនសុខ រារាំងក៏ដោយ។ គោលបំណងនៃការចាក់បញ្ចាំងខ្សែភាពយន្តនេះ គឺដើម្បីរំឭកខួប ៤ឆ្នាំនៃការបាញ់សម្លាប់ សកម្មជនបរិស្ថានរូបនេះ ថ្ងៃទី២៦មេសា ២០១២-២៦មេសា ២០១៦។
ខ្សែភាពយន្តនេះ ត្រូវបានចាក់បញ្ចាំងនៅផ្ទះសាមគ្គីដែលជាបណ្តុំអង្គការ ការពារសិទ្ធិមនុស្ស កម្មករ និងកសិករ អង្គការបណ្តាញយុវជនកម្ពុជា សមាគមឯករាជ្យសេដ្ឋកិច្ចក្រៅប្រព័ន្ធ។
មនុស្សចូលរួមមើលខ្សែភាពយន្តនេះ មានគ្នាប្រហែលជិត១០០នាក់។ ខណៈការចាក់បញ្ចាំងបានជាងពាក់កណ្តាល អធិការរងខណ្ឌសែនសុខ លោក សក់ ចាន់កញ្ញារិទ្ធ បានមកហាមឃាត់ដោយលើកឡើងថា មិនបានសុំច្បាប់អនុញ្ញាតពីអាជ្ញាធរ។
លោក សក់ ចាន់កញ្ញារិទ្ធ បានថ្លែងយ៉ាងដូចនេះថា«ខ្ញុំចុះមកនេះខ្ញុំចង់មើលច្បាប់ តើគាត់ប្រមូលផ្តុំនេះគាត់មានច្បាប់អនុញ្ញាតហើយឬនៅ។ ឥលូវនេះខ្ញុំអត់ទាន់និយាយអីទេខ្ញុំសូមមើលច្បាប់គាត់សិន ខ្ញុំអត់ទាន់មានចំណាត់ការអីទាំងអស់។ ធម្មតាបងឯងប្រមូលផ្តុំនៅកន្លែងទីតាំងមួយ បងឯងត្រូវឱ្យអាជ្ញាធរដឹង។….ខ្ញុំអាចឱ្យគាត់ឈប់សិន ឱ្យមានច្បាប់អីត្រឹមត្រូវ»។
បើទោះបីជា អាជ្ញាធរបានរារាំងក៏ដោយ តែអង្គការបណ្តាញយុវជនកម្ពុជា មិនបញ្ឈប់តាមការបង្គាប់របស់អាជ្ញាធរនោះទេ។ ទីបំផុតពួកគេបានចាក់បញ្ចាំងបានចប់សព្វគ្រប់។
លោក ស ម៉ូរី អនុប្រធានអង្គការបណ្តាញយុវជនកម្ពុជាបានថ្លែងថា គ្រាន់តែជាការជួបជុំមួយដើម្បីប្រារព្ធពិធីនៃការរំឭកការបាញ់សម្លាប់សកម្មជនការពារព្រៃឈើលោកឈុត វុទ្ធី និងចាក់បញ្ចាំងភាពយន្តស្ដីពីវិរៈរបស់គាត់ ដែលមិនត្រូវសុំច្បាប់អនុញ្ញាតពីអាជ្ញាធរឡើយ។ លោកបន្តថា ម្យ៉ាងវិញទៀត ការចាក់បញ្ចាំងនេះ គឺធ្វើឡើងនៅផ្ទះឯកជន មិនមែននៅទីសាធារណៈទេ។
ក្នុងពិធីនេះ ក៍មានកូនលោក ឈុត វុទី្ធ ចូលរួមផងដែរ គឺយុវជន ឆឺយ ឧត្តមរស្មី។
យុវជន ឧត្តមរស្មី បានសម្តែងការខកចិត្ត និងសោកស្តាយចំពោះការហាមឃាត់មិនចាក់បញ្ចាំងរឿងដែលនិយាយពីវិរៈឪពុករបស់លោក ដែលបានលះបង់ជីវិតដើម្បីការពារព្រៃឈើនៅក្នុងប្រទេសកម្ពុជា។
លោកបញ្ជាក់ថា ឥលូវនេះលោកកំពុងត្រៀមដាក់សំនុំរឿងឪពុកលោកទៅតុលាការអន្តរជាតិICC តាមរយៈអង្គការសង្គមស៊ីវិលមួយចំនួន និងមេធាវីរបស់លោក។
នេះជាលើកទីបីហើយ ដែលខ្សែភាពយន្តរឿង«ខ្ញុំជា ឈុត វុទ្ធី»ត្រូវបានចាក់បញ្ចាំង នៅទីឯកជន ដូចជានៅអង្គការធាងត្នោត និងមជ្ឈមណ្ឌលសិទ្ធិមនុស្សកម្ពុជា។
ភាពយន្តរឿង«ខ្ញុំជាឈុត វុទ្ធី»ត្រូវបានផលិតឡើងដោយកញ្ញាហ្វ្រាន ឡាំប្រីកស៍ ជាជនជាតិអង្គគ្លេស។ ខ្សែភាពយន្តមានរយៈពេលជិតមួយម៉ោងនេះ ត្រូវបានក្រសួងវប្បធម៌ និងវិចិត្រសិល្បៈហាមឃាត់មិនឱ្យចាក់បញ្ចាំងម្តងរួចហើយ ដែលបានធ្វើឡើង នៅផ្ទះមេត្តា សង្កាត់ចតុមុខ កាលពីថ្ងៃទី២០ មេសាផងដែរ។
លោក ឈុត វុទ្ធី ជាប្រធានក្រុម អភិរក្សធនធានព្រៃឈើ នៅកម្ពុជាត្រូវបានបាញ់សម្លាប់ នៅស្រុកមណ្ឌលសីម៉ា ខេត្តកោះកុង កាលពីថ្ងៃ២៦មេសា ឆ្នាំ ២០១២ ខណៈលោកដើរចេញពីល្បាតព្រៃនៅតំបន់នោះ ហើយមានជំលោះជាមួយក្រុមប្រដាប់អាវុធនៅតំបន់នោះ ។ លោកត្រូវបានចាត់ទុកថាជាជើងឯកការពារព្រៃឈើ នៅកម្ពុជា យ៉ាងសកម្ម ៕
