ប្រធានអង្គភាពប្រឆាំងអំពើពុករលួយ (ACU) លោក ឱម យិនទៀង គំរាមនាំខ្លួនមន្ត្រីសង្គមស៊ីវិលដែលចូលមកសង្កេតការណ៍ករណី ACU សាកសួរមន្ត្រីអង្គការសង្គមស៊ីវិល ដោយពុំមានការអនុញ្ញាត។ នេះបើតាមអ្នករាយការណ៍ព័ត៌មាននៃមណ្ឌលព័ត៌មានស្ត្រីកម្ពុជា ដែលបានទៅដល់ទីនោះ។
អ្នករាយការណ៍បញ្ជាក់ថា កាលពីម៉ោងជិត៩ព្រឹកថ្ងៃពុធទី២៧មេសានេះ លោកស្រី ទ្រី ឈួន មេធាវី និងលោក នី សុខា ប្រធានផ្នែកស៊ើបអង្កេតនៃសមាគមអាដហុក បានចូលទៅបំភ្លឺនៅ ACU មុនគេទៅតាមការហៅរបស់ស្ថាប័ននេះ ករណីកញ្ញា ខុម ចាន់តារាទី ហៅស្រីមុំឆ្លើយដាក់កំហុស។
ប៉ុន្តែប្រភពដដែល ឱ្យដឹងថានៅពេលជាមួយគ្នានេះលោក ឱម យិនទៀង បានចេញមកគំរាម មន្ត្រីអង្គការសង្គមស៊ីវិលទាំងនោះថានឹងឱ្យសមត្ថកិច្ចនាំខ្លួន ប្រសិនបើពួកគេចូលACU ពុំមានការអនុញ្ញាត ហើយលោកក៏បានដេញអ្នកសង្កេតការណ៍ទាំងនោះ ទៅក្រៅរបងស្ថាប័ន។
អ្នកសង្កេតការណ៍ទាំងនេះ មានគ្នាប្រហែល១០នាក់បានចូលមកខាងក្នុង ACU ដើម្បីសង្កេតការណ៍ កាលដែល ACU សាកសួរមន្ត្រីអង្គការសង្គមស៊ីវិលទាក់ទិនកញ្ញា ស្រីមុំ ឆ្លើយដាក់ថា ណែនាំកញ្ញាឱ្យនិយាយកុហក សមត្ថកិច្ច រឿងខ្សែអាត់សំឡេង សាសង ស្នេហាជាមួយបុរសម្នាក់ដែលគេថាជាសំឡេងរបស់លោក កឹម សុខា ប្រធានស្ដីទីគណបក្សសង្គ្រោះជាតិ។
មន្ត្រីសង្គមស៊ីវិល ដែលត្រូវបាន ACU ឱ្យចូលខ្លួនមកបំភ្លឺករណីកញ្ញា ខុម ចាន់តារាទី ហៅស្រីមុំ មានលោក នី សុខា ប្រធានផ្នែកស៊ើបអង្កេត លោក ណៃ វង្សដា អនុប្រធានផ្នែកស៊ើបអង្កេត លោក យី សុខសាន្ត អនុប្រធានផ្នែកស៊ើបអង្កេត លោកស្រី លឹម មុន្នី អនុប្រធានផ្នែកសិទ្ធិស្ត្រីនិងកុមារនិង លោកស្រី ទ្រីឈួន មេធាវីការពារក្ដីកញ្ញាស្រីមុំ។
ពួកគាត់ ជាមន្ត្រីជាន់ខ្ពស់នៃសមាគមអាដហុក។ ក្រៅពីនេះមានលោកស្រី ធិតាឃឹះ នាយិកាអង្គការសលីលកា លោក នី ចរិយា អគ្គលេខាធិការរង គជប និងលោក ស៊ឺន សាលី មន្ត្រីសិទិ្ធមនុស្សអង្គការសហប្រជាជាតិ ក៍បានកោះហៅឡើងតុលាការផងដែរ។ ពួកគាត់ត្រូវចូលបំភ្លឺនៅរវាង ថ្ងៃទី២៧ -២៨ មេសានេះ ៕
