ភ្នំពេញ ៖ អង្គភាពប្រឆាំងអំពើពុករលួយ (ACU) បានសម្រេចបញ្ជូនខ្លួន លោក ស៊ាង ចែត មេឃុំស្រក មកពីគណបក្សសម រង្ស៊ី ទៅឱ្យតុលាការរាជធានីភ្នំពេញចោទប្រកាន់បន្ទាប់ពីឃុំខ្លួន គាត់ នៅក្នុងអង្គភាពនេះ៣ថ្ងៃមកហើយ។
តាម សេចក្ដីរាយការណ៍របស់ អ្នករាយការណ៍ព័ត៌មាននៃមណ្ឌលព័ត៌មានស្ត្រីកម្ពុជា ដែល បាន ទៅកាន់តុលាការរាជធានីភ្នំពេញគឺលោក ស៊ាង ចែត ត្រូវបាន អង្គភាពប្រឆាំងអំពើពុករលួយ នាំខ្លួន នៅម៉ោង ៨និង ៣០នាទីព្រឹកនេះ។
លោក ស៊ាង ចែត ជាមេឃុំស្រក មកពីគណបក្សសម រង្ស៊ី នៅសាលាស្រុកកំពង់សៀម ខេត្តកំពង់ចាម ត្រូវបានអង្គភាពប្រឆាំងអំពើពុករលួយ នាំខ្លួនមកភ្នំពេញ ដើម្បីសាកសួរពាក់ព័ន្ធនឹងលុយ ៥០០$ ដែលឈ្មោះ ខុម ចាន់តារាទី ហៅស្រីមុំ បានឆ្លើយដាក់។
អង្គភាពប្រឆាំងអំពើពុករលួយ បានចេញលិខិតកោះហៅមនុស្ស៨នាក់ គឺ៥នាក់ មកពីសមាគមការពារសិទ្ធិមនុស្សអាដហុក និង ៣នាក់មានលោក នី ចរិយា អគ្គលេខាធិការរង គជប លោក ស្រីធិតាឃឹះ នាយិការអង្គការសីលកា និងលោក ស៊ឺន សាលី មន្ត្រីអង្គការសហប្រជាជាតិ ផ្នែកសិទ្ធិមនុស្សនៅកម្ពុជា។
ពួកគាត់ត្រូវបានអង្គភាពប្រឆាំងអំពើពុករលួយ កោះហៅករណី ចោទថាបានណែនាំឱ្យ កញ្ញាខុម ចាន់តារាទី ហៅស្រីមុំ ភូតកុហក សមត្ថកិច្ច រឿងខ្សែអាត់សំឡេង សងសាងស្នេហាជាមួយបុរសម្នាក់ដែលគេថាជាសំឡេងរបស់លោក កឹម សុខា ប្រធានស្ដីទីគណបក្សសង្គ្រោះជាតិ ៕
