ភ្នំពេញ ៖ នាយករដ្ឋមន្ត្រីកម្ពុជាសម្តេច ហ៊ុន សែន បានចេញបញ្ជាដាច់ណាត់ឲ្យមន្ត្រីទាំងអស់ បើកយុទ្ធនាការដឹកទឹកចែកជូនប្រជាពលរដ្ឋ ដោយមិនត្រូវបណ្តោយឲ្យប្រជាពលរដ្ឋរងគ្រោះដោយសារខ្វះទឹកនោះទេ។ ការថ្លែងបែបនេះធ្វើឡើងក្នុងពិធីសម្ពោធផ្លូវជាតិលេខ៥៦ ក្នុងខេត្តបន្ទាយមានជ័យ នៅថ្ងៃទី២៦ខែមេសានេះ។ ជាការឆ្លើយតបអភិបាលខេត្តមួយចំនួនបានប្រាប់វិទ្យុស្ត្រីថា អាជ្ញាធរបាននឹងកំពុងចុះចែកទឹកជូនពលរដ្ឋជាបណ្តើរហើយ។
ថ្លែងក្នុងពិធីសម្ពោធផ្លូវជាតិលេខ៥៦ នៅក្រុងសេរីសោភ័ណ ខេត្តបន្ទាយមានជ័យ កាលពីព្រឹកមិញនេះសម្តេចនាយករដ្ឋមន្ត្រី ហ៊ុន សែន បានប្រកាសបើកយុទ្ធនាការដឹកទឹកចែកជូនប្រជាពលរដ្ឋ ដោយចេញបញ្ជាដល់អាជ្ញាធរគ្រប់ជាន់ថ្នាក់ទូទាំងប្រទេស ត្រូវចូលរួមយ៉ាងសកម្មដោយមិនត្រូវបណ្តោយឲ្យប្រជាពលរដ្ឋរងគ្រោះដោយសារខ្វះទឹកនោះទេ។
សម្តេចនាយករដ្ឋមន្រី្ត ក៏បានអំពាវនាវឲ្យក្រុមហ៊ុនផលិតទឹកបរិសុទ្ធ ចូលរួមបរិច្ចាកទឹកជូនប្រជាពលរដ្ឋ ដែលកំពុងខ្វះទឹកប្រើប្រាស់។ ក្រៅពីនេះ សម្តេចក៏ទទូចឲ្យកាកបាទក្រហមកម្ពុជា បង្វែរទិសដៅពីការជួយជំនួយផ្សេងៗ មកជាការផ្តល់ទឹកដល់ប្រជាពលរដ្ឋជំនួសវិញ។
ការចេញបញ្ជា និងការអំពាវនាវរបស់លោកនាយករដ្ឋមន្ត្រី ហ៊ុន សែន ខណៈនេះគឺស្របពេលដែលប្រទេសកម្ពុជាកំពុងមានសីតុណ្ហភាពក្តៅខ្លាំង ចន្លោះពី៣៧អង្សាសេ ដល់៤២អង្សាសេ ដែលបណ្តាល មកពីបាតុភូតអ៊ែលនីញូ(El Nino)។ ស្របពេលជាមួយគ្នានេះ នៅតាមប្រភពទឹកមួយចំនួនក្នុងប្រទេសកម្ពុជា ដូចជា បឹង ស្ទឹង ព្រែក ត្រពាំង និងអណ្តូង បានរីងស្ងួតជាបណ្តើរ ហើយពលរដ្ឋដែលរស់នៅតំបន់នោះក៏កំពុងប្រឈមនឹងកង្វះទឹកប្រើប្រាស់ប្រចាំថ្ងៃផងដែរ។
ទាក់ទងបទបញ្ជារបស់លោកនាយករដ្ឋមន្ត្រីនេះ លោក ស ថាវី អភិបាលខេត្ដឧត្ដរមានជ័យនិយាយថា នាពេលកន្លងមកគឺលោកនិងក្រុមការងារក៏បានព្យាយាមនាំយកទឹកទៅចែកជួនពលរដ្ឋដែលរងគ្រោះដោយសារខ្វះទឹកបានមួយចំនួនដែរតែសម្រាប់ភូមិស្រុកដែលរងគ្រោះខ្លាំង។ លោកថា នៅថ្ងៃនេះលោកនឹងកងកម្លាំងទាំងអស់ កំពុងតែដឹកជញ្ជូនទឹកយកទៅចែកជួនពលរដ្ឋរងគ្រោះក្នុងតំបន់ អូស្មាច់ ដែលមានចំងាយផ្លូវ ៤០គីឡូម៉ែត្រ ពីខេត្ដឧត្ដរមានជ័យស្ថិតនៅក្នុងក្រុងសំរោង។
ចំណែកអភិបាលខេត្ដបន្ទាយមានជ័យ លោក សួន បវរ មានប្រសាសន៍ថា ខេត្ដនេះប្រជាពលរដ្ឋកំពុងរងគ្រោះដោយកង្វះទឹកស្ទើរតែទាំងស្រុង លើកលែងតែស្រុកភ្នំស្រុកមួយប៉ុណ្ណោះ ដែលគ្មានបញ្ហាចោទព្រោះស្រុកនេះនៅក្បែរអាងកំពីងពួយអាចយកទឹកប្រើប្រាស់បាន។ លោក សួន បវរ បន្ថែមថា ពេលនេះស្ទឹងសិរីសោភ័ណ្ឌរីងទឹកអស់ហើយ ដែលជាផលវិបាកសម្រាប់ពលរដ្ឋក្នុងខេត្ដរកទឹកប្រើប្រាស់។ លោកថាជាសំណាងដែលក្រុមការងារលោក បានរកឃើញប្រភពទឹកថ្មីមួយទៀត ដែលអាចយកមកប្រើប្រាស់បាន គឺស្ទឹងកណ្ដុរ ដែលជាដៃស្ទឹងរបស់ស្ទឹងសេរីសោភ័ណ្ឌអាចប្រើប្រាស់បានរយៈពេលជាង១០ថ្ងៃទៀត ទំរាំរង់ចាំទឹកបូមមកពីអាងកំពីងពួយ។ អភិបាលខេត្ដបានបញ្ជាក់ថា បន្ទាប់ពីបូមទឹកមកពីអាងកំពីងពួយហើយ ខេត្ដនេះលែងខ្វះទឹកសម្រាប់ឲ្យប្រជាពលរដ្ឋប្រើប្រាស់បន្ដទៀតឡើយ។
លោក អ៊ំ ម៉ារ៉ា អភិបាលខេត្ដព្រះវិហារ បានប្រាប់វិទ្យុស្ដ្រីឲ្យដឹងដែរថា ខេត្ដនេះមានការជួបការខ្វះទឹកតិចតួចប៉ុណ្ណោះ ដែលមិនមានអ្វីជាបញ្ហាចោទជាចម្បងនោះឡើយ។ លោកបន្ថែមថា ថ្វីត្បិតតែមិនមានជួបប្រទះនឹងកង្វះខាតទឹកប្រើប្រាស់ក្ដី រូបលោកនឹងមន្ដ្រីទាំងអស់ក៏បានយកចិត្ដទុកដាក់ចុះដល់មូលដ្ឋាន ជួបប្រជាពលរដ្ឋដើម្បីជួយជុសជុលអណ្ដូងដែលខូចឲ្យប្រើប្រាស់បានឡើងវិញ។ ហើយក៏បានស្ដារអណ្ដូង និងប្រឡាយផ្សេងៗដើម្បីស្ដុកទឹកប្រើប្រាស់ផងដែរ។
សូមរំលឹកថា ក្រសួងធនធានទឹកនឹងឧតុនិយម បានចេញសេចក្តីប្រកាសព័ត៌មានជាបន្តបន្ទាប់ពាក់ព័ន្ធនឹងការឡើងកម្តៅសីតុណ្ហភាពនេះ។
ចំណែកឯ ក្រសួងសុខាភិបាលវិញ ក៏បានអំពាវនាវដល់ប្រជាពលរដ្ឋត្រូវប្រុងប្រយ័ត្នចំពោះសុខភាព ពិសេសកុមារ និងមនុស្សចាស់។ តាមក្រសួងសុខាភិបាល ដើម្បីការពារសុខភាពពេលអាកាសធាតុក្ដៅខ្លាំង ប្រជាពលរដ្ឋត្រូវតែងូតទឹកត្រជាក់ និងជ្រកក្រោមម្លប់ឲ្យបានច្រើន ចៀសវាងនៅក្រោមថ្ងៃផ្ទាល់។ ជាងនេះទៀតប្រជាពលរដ្ឋត្រូវស្លៀកសម្លៀកបំពាក់ស្ដើង ស្រាល និងមានពណ៌ភ្លឺ ពិសេសត្រូវទទួលទានទឹកឲ្យបានច្រើនជាងពេលធម្មតា ដើម្បីរក្សាជាតិទឹកនៅក្នុងរាងកាយឲ្យបានគ្រប់គ្រាន់។ បើទោះជា យ៉ាងនេះក្ដី រដ្ឋាភិបាល មិនទាន់ប្រកាសអាសន្នជាផ្លូវការឡើយ ៕
