ភ្នំពេញ ៖ អង្គការក្រៅរដ្ឋាភិបាលបានជុំរុញឱ្យរដ្ឋាភិបាលបង្កើនថវិកាលើវិស័យអប់រំ ២០% នៃថវិកាជាតិឬ៤% នៃផលិតផលក្នុងស្រុកសរុប ។ អង្គការក្រៅរដ្ឋាភិបាល ទាំងនេះលើកទ្បើងថា ការបង្កើនថវិកាទៅលើវិស័យអប់រំ គឺបង្កើនគុណភាពអប់រំ។ ការថ្លែងបែបនេះធ្វើទ្បើងនៅក្នុងសន្និសីទសារព័ត៌មានស្តីពី «យុទ្ធនាការសប្តាហ៍សកម្មភាព ជាសកលសម្រាប់ការអប់រំ២០១៦ ដោយផ្តោតទៅលើការផ្តល់ហិរញ្ញប្បទានលើវិស័យអប់រំ»នាព្រឹកថ្ងៃទី ២៥ ខែមេសា ឆ្នាំ២០១៦នេះនៅភោជនីយដ្ឋានទន្លេបាសាក់២។
អង្គការក្រៅរដ្ឋាភិបាលបានលើកទ្បើងថាគោលបំណងសំខាន់ដែលពួកគេធ្វើសន្និសីទសារព័ត៌មាននៅថ្ងៃនេះគឺក្នុងគោលបំណងជម្រុញឱ្យរដ្ឋាភិបាលកម្ពុជាបង្កើនថវិកាជាតិសម្រាប់វិស័យអប់រំដើម្បីធានាឱ្យមានសមភាព បរិយាប័ន (ការអប់រំបញ្ចូលគ្នា) និងគុណភាពអប់រំ ។
នាយកប្រតិបត្តិភាពជាដៃគូអប់រំនៃអង្គការក្រៅរដ្ឋាភិបាលលោក ជិន ច័ន្ទវាសនា មានប្រសាសន៍ថា រាជរដ្ឋាភិបាលត្រូវបម្រុងថវិកាទុកសម្រាប់វិស័យអប់រំយ៉ាងតិច២០%នៃថវិកាជាតិ។ លោក ជិន ច័ន្ទវាសនាបន្តថា មូលហេតុដែលអង្គការក្រៅរដ្ឋាភិបាលទទូចនេះក្នុងគោលបំណងដើម្បីលើកកម្ពស់ទៅលើវិស័យអប់រំដែលជាវិស័យមួយរួមចំណែកកសាងធនធានមនុស្ស និងឈានទៅដល់ការអភិវឌ្ឍប្រទេសជាតិ។
ចំណែកឯនាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ បានលើកឡើងដែរថាការបង្កើនថវិកាទៅដល់វិស័យអប់រំគឺជាយន្តការដោះស្រាយឱ្យគុណភាពអប់រំនៅកម្ពុជាមានភាពល្អប្រសើរ ។ លោក សន ជ័យបន្តថា ទន្ទឹមនឹងការបង្កើនថវិកាទៅដល់វិស័យអប់រំនេះ ក្រសួងសាមីត្រូវប្រើប្រាស់ថវិកាទាំងនោះឱ្យចំខ្ទង់នៃការចំណាយជៀសវាងប្រើប្រាស់ថវិកាខុសទិសដៅ ។
លោក សន ជ័យថា ប្រសិនបើរដ្ឋាភិបាលបង្កើនថវិកាលើវិស័យអប់រំ២០%នោះវិស័យអប់រំនឹងមានការប្រែប្រូលនៅចំនុចមួយចំនួនដូចជា៖ «ទី០១គឺចំនួននៃការចុះឈ្មោះចូលរៀនហ្នឹងវាអាចមានការកើនទ្បើង ទី០២ គឺបរិយាកាសនៃការរៀនទោះបីសាលាល្អប៉ុណ្ណាក៏ដោយ គ្រូល្អប៉ុណ្ណាក៏ដោយប៉ុន្តែបរិយាកាសរៀនសូត្រមិនបានល្អទេ មិនអាចលើកកម្ពស់គុណភាពអប់រំបាននោះទេ…» ។
ឆ្លើយតបនឹងការលើកទ្បើងខាងលើនេះដែរ អ្នកនាំពាក្យក្រសួងអប់រំលោក រស់ សាលីន បានផ្តល់សម្ភាសន៍ជាមួយវិទ្យុថានៅក្នុងឆ្នាំនេះក្រសួងអប់រំបានទទួលថវិកាពីរាជរដ្ឋាភិបាលប្រមាណជា ១៨ % បើធៀបនឹងឆ្នាំកន្លងមកនេះក្រសួងអប់រំទួទួលបានតែ១៦ ទៅ១៧%ប៉ុណ្ណោះ ។ លោកបន្តថាការបង្កើនថវិកាដល់ក្រសួងអប់រំនោះនឹងជួយសម្រួលដល់ការងាររបស់ក្រសួងអប់រំឱ្យកាន់តែមានប្រសិទ្ធិភាពថែមទៀត ។
បើយោងតាមគោលដៅទី០៤នៃការអភិវឌ្ឍប្រកបដោយចេរភាពលើវិស័យអប់រំដែលចេញដោយអង្គការសហប្រជាជាតិកាលពីឆ្នាំ២០១៥កន្លងមកនេះបានកំណត់នៅគោលដៅមួយចំនួនទៅដល់គ្រប់បណ្តាប្រទេសនៅលើពិភពលោកត្រូវអនុវត្តមានដូចជា៖ នៅត្រឹមឆ្នាំ២០៣០ ធានាថាស្ត្រី និងបុរសទាំងអស់បានទទួលស្មើគ្នានូវការអប់រំកម្រិតឧត្តមសិក្សា បច្ចេកទេស វិជ្ជជាជីវៈដែលមានគុណភាព នៅត្រឹមឆ្នាំ២០៣០ លុបបំបាត់វិសមភាពយេនឌ័រក្នុងវិស័យអប់រំ និងធានាថាការទទួលបានភាពស្មើគ្នានៅគ្រប់កម្រិតអប់រំ និងបណ្តុះបណ្តាលសម្រាប់ក្រុមងាយរងគ្រោះ រួមទាំងមនុស្សពិការជនជាតិដើមភាគតិច និងកុមារស្ថិតក្នុងស្ថានភាពលំបាកជាដើម ៕
