ភ្នំពេញ ៖ ដើម្បីអប់អរសាទរខួបអនុស្សាវរីយ៍លើកទី១៣០ ទិវាពលកម្មអន្តរជាតិ ១ឧសភា ឆ្នាំ២០១៦នេះ ក្រសួងការងារ និងបណ្តុះបណ្តាលវិជ្ជាជីវ: នឹងរៀបចំវេទិកាទំនាក់ទំនងវិជ្ជាជីវ:កម្ពុជា ក្រោមប្រធានបទ “ លើកកម្ពស់អង្គការវិជ្ជាជីវ: និងស្ថិរភាពផលិតកម្មដើម្បីបង្កើតផលិតភាព និងការងារ ។ នេះបើតាមសេចក្តីប្រកាសព័ត៌មានរបស់ក្រសួងការងារនៅថ្ងៃទី ២២ មេសា ។ វេទិកានេះបើកអោយមានការចូលរួមយ៉ាងទូលំទូលាយ ពីគ្រប់ភាគីពាក់ព័ន្ធក្នុងវិស័យការងារ មានដូចជា ៖ តំណាងក្រសួង ស្ថាប័នរដ្ឋពាក់ព័ន្ធ អង្គការវិជ្ជាជីវ: កម្មករនិយោជិត និយោជក អង្គការអន្តរជាតិខាងកាងារ (ILO) និងអង្គការសង្គមស៊ីវិល ដើម្បីពិភាក្សាគ្នាស្វែងរកដំណោះស្រាយរួមគ្នាលើបញ្ហាកង្វល់ ឬសំនូមពរជាអាទិភាពរបស់កម្មករនិយោជិត និងនិយោជក ។ ក្រៅពីនេះក្រសួង ក៏បានសហការជាមួយសមាគមរោងចក្រកាត់ដេរនៅកម្ពុជា(GMAC) ស្ថានីយទូរទស្សន៍ PNN អង្គការវិជ្ជាជីវ: និងដៃគូរពាក់ព័ន្ធនានា នឹងរៀបចំកម្មវិធីសម្រស់ឯកវាយនភណ្ឌឆ្នាំ ២០១៦ នៅថ្ងៃទី១ខែឧសភាផងដែរ ៕
