ភ្នំពេញ៖ សាលាដំបូងរាជធានីភ្នំពេញ បានសម្រេចបដិសេធសំណើសុំនៅក្រៅឃុំរបស់លោក អ៊ុំ សំអាន តំណាងរាស្ត្រគណបក្សសង្គ្រោះជាតិ ដែលត្រូវបានសម្ថកិច្ចចាប់ឃុំខ្លួនពីបទបង្កការ ញុះញង់ពាក់ព័ន្ធនឹងបញ្ហាព្រំដែនជាមួយប្រទេសវៀតណាម ។ ជុំវិញបញ្ហានេះ ក្រុមអង្គការសិទ្ធិមនុស្សលើកឡើងថា តំណាងរាស្ត្របក្សប្រឆាំងរូបនេះមានលក្ខណៈសម្បត្តិគ្រប់គ្រាន់អាចនៅក្រៅឃុំបាន ។ លោក ធូ វិរៈ រាយការណ៍ព័ត៌មាននេះ៖
កាលពីថ្ងៃទី២១ខែមេសា មេធាវីការពារក្ដីរបស់លោក អ៊ុំ សំអាន គឺ លោក ជួង ជូងី បានដាក់បណ្ដឹងទៅតុលាការក្រុងភ្នំពេញ ដើម្បីស្នើសុំដោះលែងកូនក្ដីរបស់លោកឲ្យនៅក្រៅឃុំ បណ្តោះ អាសន្ន ប៉ុន្តែត្រូវសាលាដំបូងរាជធានីភ្នំពេញបដិសេធសំណើរនេះនៅរសៀលថ្ងៃទី២២ខែមេសាម្សិលមិញ ។
លោក ជួង ជូងី មេធាវីការពារក្តី លោក អ៊ុំ សំអាន ថ្លែងប្រាប់វិទ្យុស្ត្រីថាការសម្រេចបដិសេធ មិនឲ្យកូនក្តីលោកនៅក្រៅឃុំពេលនេះគឺមិនត្រឹមត្រូវឡើយ ។ លោកបន្តថាលោកគ្រោងនឹងដាក់ពាក្យប្តឹងទៅសាលាឧទ្ធរណ៍បន្តទៀតប្រសិនកូនក្តីរបស់លោកស្នើសុំ ។
លោក ជួង ជូងី ថ្លែងយ៉ាងដូច្នេះថា «ការសម្រេចនិងមិនត្រឹមត្រូវទេព្រោះបទចោទលោក អ៊ុំ សំអាន ជាបទបញ្ឈឹមតុលាការមិនចាំបាច់ឃុំខ្លួនទេ ហើយកូនក្តីខ្ញុំមានអភ័យឯកសិទ្ធិតំណាងរាស្ត្រ និងមានទីលំនៅច្បាស់លាស់កូនខ្ញុំមិនរត់ទៅណាទេ» ។
ជុំវិញបញ្ហានេះ ក្រុមអង្គការសង្គមស៊ីវិល ធ្វើការពាក់ព័ន្ធនឹងសិទ្ធិមនុស្សលើកឡើងថា ករណី លោក អ៊ុំ សំអាន តំណាងរាស្ត្រមណ្ឌលសៀមរាបរូបនេះ ជារឿងនយោបាយ ហើយបើគ្មានការសម្របសម្រួលផ្នែកនយោបាយរវាងគណប្រជាជនកម្ពុជា ជាមួយគណបក្សសង្គ្រោះជាតិទេនោះ លោក អ៊ុំ សំអាន ព្រមទាំងមន្ត្រីនិងសកម្មជនបក្សប្រឆាំងសរុប១៦នាក់ ផ្សេងទៀត ដែលកំពុងឃុំខ្លួននៅក្នុងពន្ធនាគារព្រៃស គ្មានសង្ឃឹមមានសេរីភាពឡើយ ។
លោក លី សុផាណា ព្រះរាជអាជ្ញារងអយ្យការអមសាលាដំបូងរាជធានីភ្នំពេញថ្លែងប្រាប់វិទ្យុស្ត្រី នៅរសៀលថ្ងៃសុក្រយ៉ាងខ្លីថា ចៅក្រមស៊ើបសួរ នៃសាលាដំបូងរាជធានីភ្នំពេញបានសម្រេច បដិសេចសំណើរសុំនៅក្រៅឃុំរបស់លោក អ៊ុំ សំអាន ។
លោក លី សុផាណានិយាយថា «ខាងចៅក្រមស៊ើបសួរនៃសាលាដំបូបានបដិសេចការសំណើរសុំនៅក្រៅឃុំ មិនអនុញ្ញាតឲ្យនៅក្រៅឃុំទេ» ។
នៅក្នុងកិច្ចប្រជុំគណៈរដ្ឋមន្ត្រីនាវិមានសន្តិភាពនៅថ្ងៃទី ២២ ខែមេសាម្សិលមិញ សម្តេច ហ៊ុន សែន នាយករដ្ឋមន្ត្រីកម្ពុជាថ្លែងថា ការឃាត់ខ្លួនតំណាងរាស្ត្រ អ៊ុំ សំអាន គឺត្រឹមត្រូវតាមនីតិវិធីច្បាប់ ចំពោះករណីព្រហ្មទណ្ឌជាក់ស្តែង ។ សម្ដេចថ្លែងទៀតថា ករណីរបស់ លោក អ៊ុំ សំអាន ស្ថិតនៅក្នុងបន្ទុក នៃការញុះញង់ធ្វើឲ្យមានភាពស្មុគ្រស្មាញ និងជម្លោះជាមួយប្រទេសជិតខាង ។
ប៉ុន្តែមន្ត្រីបក្សប្រឆាំងលើកឡើងថា សកម្មភាព លោក អ៊ុំ សំអាន គឺជាអ្នកស្នេហាជាតិពិតប្រាកដក្នុងចិត្តរបស់ពលរដ្ឋ ។
លោក អំ សំអាត ប្រធានផ្នែកស៊ើបអង្កេតនៃសមាគមការពារសិទ្ធិមនុស្សលីកាដូបាននិយាយថា តំណាងរាស្ត្រគណបក្សសង្គ្រោះជាតិ លោក អ៊ុំ សំអាន គួរតែត្រូវបានតុលាការដោះលែងឲ្យនៅក្រៅឃុំបណ្តោះអាសន្ន ដោយសារតំណាងរាស្ត្របក្សជំនាស់រូបនេះ មានលក្ខណៈសម្បត្តិគ្រប់គ្រាន់អាចស្ថិតនៅក្រៅឃុំបាន ។ លោកមានជំនឿថា ករណី លោក អ៊ុំ សំអាន ប្រសិនបើស្ថានភាពនយោបាយនៅកម្ពុជាមិនមានភាពថមថយកំដៅផ្នែកនយោបាយទេ តំណាងរាស្ត្រ និងសកម្មជនបក្សប្រឆាំងទាំង១៦រូបកំពុងស្ថិតនៅក្នុងពន្ធធាគារព្រៃស គ្មានសង្ឃឹមអាចនឹងមានសេរីភាពឡើយ ។
កន្លងមក សម្ដេច ហ៊ុន សែន ព្រមានជាច្រើនលើកថានឹងចាប់ខ្លួនជនណាដែលនៅតែនិយាយថា រដ្ឋាភិបាលប្រើផែនទីក្លែងក្លាយចំពោះការបោះបង្គោលព្រំដែនជាមួយប្រទេសវៀតណាម ។
លោក អ៊ុំ សំអាន តំណាងរាស្ត្រគណបក្សប្រឆាំងដែលសកម្មបញ្ហាព្រំដែន ត្រូវបានអាជ្ញាធរចាប់ខ្លួនកាលពីម៉ោងជាង ១២ យប់ថ្ងៃអាទិត្យ ទី១០ខែមេសា បន្ទាប់ពីលោកវិលត្រឡប់ពីសហរដ្ឋអាមេរិក មកដល់ខេត្តសៀមរាប ។ លោកក៏ត្រូវបានតុលាការសម្រេចឃុំខ្លួនបណ្ដោះអាសន្ននៅពន្ធនាគារព្រៃស បន្ទាប់ពីព្រះរាជអាជ្ញាខេត្តនេះចោទប្រកាន់លោកក្រោមបទចោទញុះញង់ នាំឲ្យមានការរើសអើង និងប្រព្រឹត្តបទឧក្រិដ្ឋជាអាទិ៍ នៃក្រមព្រហ្មទណ្ឌ កាលពីថ្ងៃទី១២ខែមេសា ៕
