ភ្នំពេញ ៖ កាលពីដើមសប្តាហ៍នេះ ព្រះរាជអាជ្ញារងសាលាដំបូងរាជធានីភ្នំពេញ លោក សៀង សុខ បានចេញសេចក្តីថ្លែងការណ៍ទម្លាយរឿងកញ្ញា ខុម ចាន់តារាទី ហៅ ស្រីមុំ ថាបានទទួលស្គាល់ខ្សែអាត់សំឡេង និងទំនាក់ទំនងជាមួយមេបក្សប្រឆាំង ។ រឿងនេះគណៈមេធាវីនៃព្រះរាជាណាចក្រកម្ពុជាបានលើកឡើងថា សេចក្តីថ្លែងការណ៍នេះមិនខុសវិជ្ជាជិវៈតែអ្នកច្បាប់និងអ្នកវិភាគបញ្ហាសង្គមយល់ថា ខុសក្រមសីលធម៌វិជ្ជាជីវៈតុលាការ ហើយស្ថាប័នមេធាវីបង្ហាញជំហរមិនឯករាជ្យ ។
ប្រធានគណៈមេធាវីកម្ពុជាបានលើកឡើងថា សេចក្តីថ្លែងការណ៍របស់ព្រះរាជអាជ្ញារងសាលាដំបូងរាជធានីភ្នំពេញ ទម្លាយរឿងសម្ងាត់ករណី កញ្ញា ខុម ចាន់តារាទី ដែលស្ថិតនៅក្នុងនីតិវិធីស៊ើបអង្កេតគឺមិនខុសពីវិជ្ជាជីវៈតុលាការទ។ លោកសម្អាងថា តុលាការអាចសេចក្តីថ្លែងការណ៍ ដើម្បីកុំមតិមហាជនមានការភាន់ច្រឡំ។
«ច្បាប់អនុញ្ញាតឱ្យធ្វើសេចក្តីថ្លែងការណ៍ ប៉ុន្តែប្រសិនបើខ្លឹមសារសេចក្តីថ្លែងយ៉ាងណានោះ អាហ្នឹង ! វាអាស្រ័យករណីមួយៗ ប្រសិនជាសេចក្តីថ្លែងការណ៍ណាវាហួសកម្រិតដែលត្រូវបញ្ចេញ អាហ្នឹង ! ក៏វាខុសដែរ»។
កាលពីថ្ងៃម្សិលមិញនេះ សាលាដំបូងរាជធានីភ្នំពេញ បានចេញសេចក្ដីថ្លែងការណ៍ដោយលើកឡើងថា កញ្ញា ខុម ចាន់តារាទី ហៅ ស្រីមុំ ទទួលស្គាល់ថា ធ្លាប់មានទំនាក់ទំនងជាមួយលោក កឹម សុខា ប្រធានស្តីទីគនបក្សសង្គ្រោះជាតិ និងទទួលស្គាល់សំឡេងខ្សែអាត់មួយចំនួនជាសំឡេងរបស់កញ្ញា។
សេចក្តីថ្លែងការណ៍បន្តថា ទំនាក់ទំនងរវាងប្រធានស្តីទីគណបក្សសង្គ្រោះជាតិ ជាមួយកញ្ញា ស្រីមុំ មានការរៀបចំពីបុគ្គលមួយចំនួន ហើយតុលាការនឹងធ្វើការស៊ើបអង្កេតស្រាវជ្រាវអ្នកទាំងនោះ ។
សេចក្តីថ្លែងការណ៍ «ទំនាក់ទំនងរវាងឈ្មោះ ខុម ចាន់តារាទី ហៅ ស្រីមុំ និង ឈ្មោះ កឹម សុខា មានការរៀបចំពីបុគ្គលមួយចំនួន ដែលអយ្យអមសាលាដំបូងរាជធានីភ្នំពេញ កំពុងបន្តការស៊ើបអង្កេតនិងស្រាវជ្រាវដើម្បីអនុវត្តតាមនីតិវិធីច្បាប់» ។
ដោយឡែកអ្នកច្បាប់បានលើកឡើងថា សេចក្តីថ្លែងការណ៍នេះ ពិតជាខុសក្រមសីលធម៌វិជ្ជាជិវៈតុលាការ។
លោក អំ សំអាត ប្រធានផ្នែកស៊ើបអង្កេតនៃសមាគមការពារសិទ្ធិមនុស្សលីកាដូ បានផ្តល់បទសម្ភាសន៍ដល់វិទ្យុស្ត្រីកាលពីម្សិលមិញថា សេចក្ដីថ្លែងការណ៍នោះ គឺខុសនឹងនីតិវិធីវិជ្ជាជីវៈតុលាការ ។ លោក សំអាត បានចាត់ទុកសេចក្តីថ្លែងការនោះ បានគំរាមគំហែងដល់ស្មារតីនិងសិទ្ធឯកជនរបស់កញ្ញា ស្រី មុំ យ៉ាងធ្ងន់ធ្ងរ។
លោក អំ សំអាត និយាយថា៖ «បើយើងគិតរឿងវិជ្ជាជីវៈរបស់តុលាការថាវាខុសទៅនិងក្រមសីលធម៌វិជ្ជាជីវៈមួយយ៉ាងធ្ងន់ធ្ងរនៅពេលដែលតុលាការធ្វើការទំលាយរឿងសម្ងាត់ជនណាម្នាក់… ។ បញ្ហានេះគឺជាប្រកាសជាសាធារណ៍មួយ ហើយជាការបំបាក់ស្មារតី ក៏ដូចជាការគំរាមគំហែង តាមពិតនេះជារឿងឯកជន»។
បើយ៉ាងនេះក្ដីប្រធានគណៈមេធាវីនៃព្រះរាជាណាចក្រកម្ពុជា លោក ប៊ុន ហ៊ុន និយាយថា ក្នុងនាមជាគណៈមេធាវី នឹងមិនចេញសេចក្តីថ្លែងការថ្កោលទោស និង ការសម្រេចរបស់តុលាការរាជធានីភ្នំពេញទេ ព្រោះមិនស្ថិតនៅក្នុងដែនសមត្ថកិច្ចរបស់ខ្លួន ។
«អត់ទេ! ខ្ញុំអត់មានកាតព្វកិច្ចអីទៅពាក់ព័ន្ធរឿងហ្នឹង នៅក្នុងស្ថាប័នគណមេធាវីកាតព្វកិច្ចសំខាន់គឺយើងការពារនឹងតាមដានការអនុវត្តវិជ្ជាជីវមេធាវី ហើយនឹងការរំលោភបំពានលើកការប្រកបវិជ្ជាជីវមេធាវីតែប៉ុណ្ណឹងទេ! អារឿងពាក់ព័ន្ធជាមួយរបស់តុលាការ ពាក់ព័ន្ធជាមួយរឿងក្តីនីមួយៗ មិនមែនជាសមត្ថកិច្ចរបស់គណមេធាវីដែលត្រូវលូកដៃនោះទេ»។
អ្នកសិក្សាពីការអភិវឌ្ឍសង្គមបានចាត់ទុកការលើកឡើងបែបនេះរបស់គណៈមេធាវី គឺស្ថិតនៅក្រោមសម្ពាធអ្នកនយោបាយ និងមិនឯករាជ្យ ។
លោក មាស នី មើលឃើញថាតាមពិតទៅតួនាទីរបស់តុលាការ និងគណៈមេធាវី គឺជាដៃគូសហការយ៉ាងជិតស្និតត្រួតពិនិត្យតាមដានដំណើរការនៃការអនុវត្តច្បាប់គ្នាទៅវិញទៅមក ។
«តាមពិតមេធាវី និង តុលាការ ជាដៃគូមួយដែលគេធ្វើឲ្យមានតុលាការ ចៅក្រម មេធាវី គឺ ដើម្បីរក្សាយុត្តិធម៌ឲ្យបានគ្រប់គ្រាន់ដល់គូភាគីដែលមានទំនាស់ អញ្ចឹងមេធាវីមានសិទ្ធក្នុងការតាមដាន ក្នុងរឿងអ្វីមួយដែលតុលាការខ្វះខាតគឺមេធាវីមានសិទ្ធិក្នុងការនិយាយ»។
គណៈមេធាវី មានតួនាទីចូលរួមក្នុងការលើកស្ទួយប្រព័ន្ធយុត្តិធម៌ តាមរយៈការផ្តល់មេធាវីជូនដល់ពលរដ្ឋដែលមិនចេះពីនីតិវិធីច្បាប់ ដើម្បីការពារខ្លួន និង ការពារសិទ្ធិពលរដ្ឋ ។ តួនាទីមួយទៀតដែរ គណៈមេធាវីត្រូវចូលរួមជាយោបល់ ឬ តវ៉ាផ្នែកផ្លូវច្បាប់ដើម្បីធានាឱ្យច្បាប់ចេញមកមានការអនុវត្តបានផលល្អ៕
