សាលាដំបូងរាជធានីភ្នំពេញ នឹងសួរចម្លើយមន្ត្រីជាន់ខ្ពស់សមាគមអាដហុក លោក នី ចរិយា នៅថ្ងៃទី១៣ ខែកក្កដា ខាងមុខ ដើម្បីឆ្លើយតបនឹងពាក្យបណ្តឹងពីបទបរិហារកេរ្តិ៍ របស់មន្ត្រីតុលាការខេត្តសៀមរាបពីររូប។ ពាក្យបណ្តឹងនេះធ្វើឡើងបន្ទាប់ពីលោក នី ចរិយា រិះគន់ទៅលើការសម្រេចរឿងក្តីមួយរបស់តុលាការខេត្តសៀមរាប ដែលបានចាប់ប្រជាពលរដ្ឋខ្មែរពីរនាក់ដាក់ពន្ធនាគារ ក្នុងរឿងជម្លោះដីធ្លី ជាមួយសហគមន៍ជនជាតិវៀតណាម។
លិខិតកោះហៅមេធាវីរបស់លោក នី ចរិយា មួយច្បាប់ដោយព្រះរាជអាជ្ញារងលោក សៀង សុខ នៃអយ្យការសាលាដំបូងរាជធានីភ្នំពេញ កាលពីថ្ងៃទី ២២ ខែមិថុនា មានខ្លឹមសារថា «ព្រះរាជអាជ្ញានឹងសួរចម្លើយលោកនី ចរិយា ពីដំណើររឿង ឈ្មោះ សុខ កែវបណ្ឌិត និងឈ្មោះ គី ឫទ្ធី ប្តឹងលោក នី ចរិយា ពីបទបរិហាកេរ្តិ៍ជាសាធារណៈ និងបទផ្សព្វផ្សាយនូវការអត្ថាធិប្បាយ ដើម្បីធ្វើសម្ពាធលើយុត្តាធិការ នៅថ្ងៃទី ១៣ ខែកក្កដា វេលាម៉ោង ៨:៣០ នាទីព្រឹក»។
ពាក់ព័ន្ធនឹងករណីនេះ លោក នី ចរិយា ប្រធានក្រុមស៊ើបអង្កេត នៃសមាគមអាដហុក បានប្រាប់វិទ្យុស្ត្រីនៅថ្ងៃទី២៩ ខែមិថុនានេះថា៖«ខ្ញុំនឹងចូលខ្លួនតាមការកោះហៅរបស់តុលាការដោយបង្ហាញជំហរមិនតក់ស្លុតនោះទេ។ មកទល់ពេលនេះ ខ្ញុំពុំទាន់ទទួលបានដីការកោះហៅនៅឡើយនោះទេ ប៉ុន្តែមេធាវីរបស់ខ្ញុំបីរូប គាត់បានទទួលលិខិតអញ្ជើញដើម្បីចូលបំភ្លឺនៅសាលារាជធានីភ្នំពេញនាថ្ងៃទី១៣ ខែកក្តដា ម៉ោងប្រាំបីកន្លះព្រឹក»។
សូមរំលឹកបន្តិចថា កាលពីថ្ងៃទី ១២ ខែឧសភា លោក នី ចរិយា បានលើកឡើងនៅក្នុងសន្និសីទសារព័ត៌ មានមួយ នៅទីស្នាក់ការសមាគមអាដហុកខេត្តសៀមរាប ដោយចោទព្រះរាជអាជ្ញារង លោក សុខ កែវបណ្ឌិត និងចៅក្រមស៊ើបសួរ លោក គី ឫទ្ធី ថាបានឃុបឃិតគ្នាប្រព្រឹត្តអំពើពុករលួយ យកដីពលរដ្ឋខ្មែរ ប្រគល់ឲ្យសហគមន៍ជនជាតិវៀតណាម និងបានចាប់ខ្លួនពលរដ្ឋពីរនាក់ដាក់ពន្ធនាគារ ដោយខុសពីនីតិវិធីច្បាប់។
បន្ទាប់មកសមាគមនអាដហុក បានដាក់ពាក្យប្តឹងប្រឆាំងមន្ត្រីតុលាការខេត្តសៀមរាបទាំងពីររូបនេះទៅកាន់តុលាការកំពូល និងក្រសួងយុត្តិធម៌ ព្រមទាំងស្ថាប័នពាក់ព័ន្ធមួយចំនួនទៀត ដោយចោទប្រកាន់ពីបទ អនុវត្តខុសនីតិវិធី ក្នុងការចាប់ និងឃុំខ្លួនពលរដ្ឋពីរនាក់នៅភូមិជប់រំដេង ឃុំកន្ទួត ស្រុកស្វាយលើ។
បន្ទាប់ពីមានការចោទប្រកាន់នោះ មន្ត្រីតុលាការខេត្តសៀមរាប បានចេញសេចក្តីបំភ្លឺច្រានចោលការចោទប្រកាន់នេះដោយលើកឡើងថា ខ្លួនបានធ្វើទៅតាមនីតិវិធីច្បាប់ ហើយបានចាត់ទុកការលើកឡើងរបស់សមាគមអាដហុកថា មានលក្ខណៈញុះញង់ នាំឲ្យមានការរើសអើងពូជសាសន៍ និងផ្សព្វផ្សាយព័ត៌មាន ធ្វើឲ្យមានការយល់ច្រឡំធ្ងន់ធ្ងរទៅលើស្ថាប័នអនុវត្តច្បាប់។
មណ្ឌលព័ត៌មានស្រី្តកម្ពុជាមិនអាចស្វែងរកការឆ្លើយបំភ្លឺពីសំណាក់លោក សុខ កែវបណ្ឌិត និងលោកគី ឬទ្ធី បានទេនៅថ្ងៃច័ន្ទនេះ។
ឆ្លើយតបទៅនឹងការប្តឹងចោទប្រកាន់ពីសំណាក់មន្រ្តីតុលាការខេត្តសៀមរាបនេះ លោក នី ចរិយា បញ្ជាក់ផងដែរថា ការប្តឹងមកលើករូបលោកនេះ គឺជាសិទ្ធិសេរីភាពរបស់មន្ត្រីតុលាការខេត្តសៀមរាបប៉ុន្តែលោកបានបញ្ជាក់ថា លោកបានត្រៀមភស្តុតាងដើម្បីបង្ហាញដល់ព្រះរាជអាជ្ញារួចរាល់ហើយ ជុំវិញរឿងមន្រ្តីតុលាការចាប់មនុស្សដោយបំពានច្បាប់នេះ។ «ខ្ញុំមានភស្តុតាងសម្រាប់ដាក់ជូនព្រះរាជអាជ្ញា ដើម្បីបង្ហាញថាអ្វីដែលខ្ញុំនិយាយគឺខ្ញុំមានភស្តុតាងរបស់ខ្ញុំទាក់ទងនឹងការចាប់មនុស្សដោយបំពានច្បាប់»។
សូមបញ្ជាក់ថា ការខ្វែងគំនិតគ្នារវាងមន្ត្រីសមាគមការពារសិទ្ធិមនុស្សអាដហុក ជាមួយនឹងមន្រ្តីតុលាការខេត្តសៀមរាប អំពីរឿងចាប់ឃុំខ្លួនអ្នកភូមិជប់រំដេង ឃុំកន្ទួត ស្រុកស្វាយលើ ២នាក់ ដែលមានទំនាស់ដីធ្លីជាមួយសហគមន៍ដីសម្បទានវៀតណាម មានរយៈពេលជាងកន្លះខែមកហើយដោយមិនអាចសម្របសម្រួលគ្នាក្រៅប្រព័ន្ធតុលាការបានទេ៕
