ក្រសួងធម្មការ និងសាសនាសម្រេចដកដំណែងព្រះមេគណខេត្តកំពង់ស្ពឺមួយអង្គ បន្ទាប់ពីវីឌីអូឃ្លីបមួយត្រូវបានបង្ហោះនៅលើបណ្តាញសង្គមហ្វេសប៊ុកពីសកម្មភាពព្រះអង្គឡើងច្រៀងនៅលើឆាកប្រគំតន្ត្រីអបអរបុណ្យចូលឆ្នាំខ្មែរ ។ អង្គការមួយធ្វើការលើកិច្ចការសាសនាព្រះពុទ្ធបានសាទរចំណាត់ការរបស់ក្រសួងធម្មការ ។
ព្រះអង្គបានច្រៀងនៅលើឆាកប្រគំតន្ត្រីអបអរបុណ្យចូលឆ្នាំខ្មែរ កាលពីថៃ្ងបញ្ចប់នៃពិធីបុណ្យហើយត្រូវបានបង្ហោះវិឌីអូឃ្លីបចំនួនជាង២នាទី នៅលើបណ្តាញសង្គមហ្វេសប៊ុក ។ ព្រះមេគណមួយអង្គនេះ ច្រៀងចម្រៀងចំនួន២បទគឺច្រៀងបទពង្សាវតារខ្មែរ និងបទគន់មើលក្នុងសួន ។ ព្រះនាមរបស់ព្រះអង្គត្រូវបានដឹងថា ព្រះនាម ឌូ វណ្ណឌឿន។
ក្រោយពីគេបានបង្ហោះវិឌីអូឃ្លីបនៅលើបណ្តាញសង្គមហ្វេសប៊ុកភ្លាម ក្រសួងធម្មការ និងសាសនា បានសម្រេចដកតំណែងព្រះមេគណខេត្តកំពង់ស្ពឺមួយអង្គនៅថ្ងៃព្រហស្បត្តិ៍នេះ ។ ក្រសួងប្រកាសថាការដកតំណែងនេះ ដោយសារព្រះអង្គបានប្រតិបត្តិខុសទៅនិងវិន័យសង្ឃ និងកំពុងធ្វើប៉ះពាល់ដល់វិស័យព្រះពុទ្ធសាសនាយ៉ាងធ្ងន់ធ្ងរ ។ អនុរដ្ឋលេខាធិការក្រសួងធម្មការ លោក សេង សុមុនី មានប្រសាសន៍បញ្ជាក់បន្ថែមលើសេចក្ដីសម្រេចនេះថាការដកតំណែងសង្ឃពិតជាបានធ្វើឡើងមែន។
លោក សេង សុមុនី ៖ «ព័ត៌មានដែលខ្ញុំទទួលបានព្រឹកនេះគឺ ខាងគណសង្ឃលោកបានសម្រេចឲ្យមេគណខេត្តលាលែងពីដំណែង ឈប់ដឹកនាំរដ្ឋបាលសង្ឃតទៅទៀតទេ» ។
អង្គការបណ្តាញព្រះសង្ឃឯករាជ្យ ដើម្បីយុត្តិធម៌សង្គមបានសម្តែងការខកចិត្តចំពោះសកម្មភាពច្រៀងរាំ របស់ព្រះមេគណអង្គនេះ ថាបានធ្វើឲ្យប៉ះពាល់ដល់កេរ្តិ៍ឈ្មោះព្រះសង្ឃទូទាំងប្រទេស ។ អង្គការនេះបានសាទរចំពោះចំណាត់ការរបស់ក្រសួងធម្មការ និងសាសនាបានជួយការពារកិត្តិយសព្រះពុទ្ធសាសនានៅក្នុងប្រទេសកម្ពុជា ។ ព្រះអង្គ ប៊ុត ប៊ុនតិញ ប្រធានបណ្តាញព្រះសង្ឈឯករាជ្យ ដើម្បីយុត្តិធម៌សង្គមបានថ្កោលទោសសកម្មភាពច្រៀងរបស់ព្រះមេគណខេត្តកំពងស្ពឺព្រះនាម ឌូ វណ្ណឌឿននេះថាបានទាញទម្លាក់វិស័យព្រះពុទ្ធសាសនាឲ្យធ្លាក់ចុះ ។
ព្រះអង្គ ប៊ុត ប៊ុនតិញ មានសង្ឃដីការថា «ទំងន់ទោសមិនសូវធ្ងន់ទេ ប៉ុន្តែអ្នកបួសនិងជាគំរូក្នុងសាសនា និងវប្បធម៌ជាតិហើយដល់ពេលធ្វើអញ្ចឹងវាខុសធ្ងន់ណាស់ ទោសនិងមិនត្រូវផ្សឹកអ្វីទេក៏ប៉ុន្តែទង្វើនិងអាក្រក់ចំពោះមហាជនដែលមើលឃើញ» ។
បើតាមកាសែតខេមបូឌាដេលីជាភាសាខ្មែរដែលស្រង់សម្ដីម្ចាស់តន្ត្រីសម័យលោក ប៊ុង ប៊ុណ្ណាគឺព្រះតេជគុណ ឌូ វណ្ណឌឿន បានច្រៀងចំរៀងចំនួន៦បទ និងរាំចង្វាក់រាំវង់ថែមទៀតផង ៕
