ត្រឡប់ពីបំពេញទស្សនកិច្ចនៅតំបន់គោលដៅចំនួនពីរគឺ ខេត្តមណ្ឌលគិរី និងខេត្តរតនគិរី លោក George Edgar ឯកអគ្គរដ្ឋទូតសហភាពអឺរ៉ុប ទទូចឱ្យរដ្ឋាភិបាលកម្ពុជាពន្លឿននីតិវិធីចុះបញ្ជីដីធ្លីនៅកម្ពុជាសម្រាប់ជនជាតិដើមភាគតិច ។ ការថ្លែងរបស់ឯកអគ្គរដ្ឋទូត សហភាពអឺរ៉ុប ធ្វើឡើងតាមរយៈសន្និសីទសារព័ត៌មានកាលពីថ្ងៃម្សិលមិញ។ ក្នុងដំណើរទស្សនកិច្ចនេះលោក បានសង្កេតឃើញពីបញ្ហាប្រឈមជាច្រើនរបស់ជនជាតិដើមភាគតិចដូចជាការបាត់បង់ដីធ្លី ការបាត់បង់ធនធានព្រៃឈើដែលជាតំបន់រស់នៅដ៏សំខាន់របស់ជនជាតិដើមភាគតិច ។
លោក George Edgar បញ្ជាក់ថាដំណើរទសន្សកិច្ចរបស់លោកទៅកាន់តំបន់គោលដៅ ទាំងពីរនេះ កាលពីថ្ងៃទី០៤ដល់ថ្ងៃទី១០ ខែមេសា គឺ ដើម្បីអង្កេតមើលថាតើការអនុវត្តគម្រោងចុះបញ្ជីរដីធ្លីរបស់ប្រជាជននៅក្នុងខេត្តគោលដៅទាំងនោះបានកំរិតណា ។
គួរបញ្ជាក់ផងដែរថា ៖ ក្នុងកិច្ចសហប្រតិបត្តិការទ្វេភាគី ជាមួយរដ្ឋាភិបាលកម្ពុជា សហភាពអឺរ៉ុបបានគាំទ្រដល់ការអនុវត្តគោលនយោបាយអភិវឌ្ឍជាតិសំខាន់ៗរបស់ប្រទេសកម្ពុជា ។ សហភាពអឺរ៉ុប បានសម្រេចបែងចែកជំនួយឥតសំណងរបស់ខ្លួនដែលមានទឹកប្រាក់ចំនួន៤១០លានអឺរ៉ូ ក្រោមកម្មវិធីកិច្ចសហប្រតិបត្តិការទ្វេភាគីជាមួយប្រទេសកម្ពុជាសម្រាប់រយៈពេលចាប់ពីឆ្នាំ២០១៤ ដល់២០២០ ។ មូលនិធិទាំងនេះនឹងជួយរដ្ឋាភិបាលកម្ពុជានៅក្នុងការពង្រឹងវិស័យកសិកម្ម និងការគ្រប់គ្រងធនធានធម្មជាតិការផ្ដល់ការអប់រំកាន់តែមានគុណភាពព្រមទាំងអនុវត្តកំណែទម្រង់អភិបាលកិច្ចការគ្រប់គ្រងហិរញ្ញវត្ថុសាធារណៈ (PFM) វិមជ្ឈការ និងកំណែទម្រង់ការបោះឆ្នោត ។
ជុំវិញបញ្ហានេះអ្នកនាំពាក្យក្រសួងរៀបចំដែនដី នគររូបនីយកម្ម លោក ជៀម សុផលមករា បានឱ្យដឹង ការចុះបញ្ជីដីធ្លីនេះក្រសួងកំពុងមានដំណើរទៅមុខតាមនិតិវិធីហើយ តែមិនបានលឿននោះទេ ដោយសារជនជាតិដើមភាគតិចមួយចំនួនមិនបានប្រាប់ពីទីតាំងដីរស់នៅរបស់ពួកគេច្បាស់ច្បាស់លាស។
លោក ជៀម សុផលមករា ៖«គ្មានអ្វីក្រៅពីការសហការជាមួយបងប្អូនប្រជាពលរដ្ឋ ក៏ដូចជាបងប្អូនជនជាតិដើមភាគតិច ចឹងបើពួកគាត់យល់ដឹង ខ្ញុំលើកករណីមួយចំនួនពាក់ព័នកត្តាអត្តនោម័តបុគ្គល គាត់ចង្អុលដីសូម្បីតែព្រៃហ្នឹងថាជារបស់របស់គាត់ដែរ» ។
តែសម្រាប់មន្ត្រីសម្របសម្រួលគម្រោងកំណែទម្រង់ដីធ្លីនៃមជ្ឈមណ្ឌលសិទ្ឋមនុស្សកម្ពុជា លោក វណ្ណ សូផាត យល់ឃើញថា ដីធ្លីមួយចំនួនរបស់ជនជាតិដើមភាគតិចកំពុងតែមានជម្លោះជាច្រើនជាដូចខាងក្រុមហ៊ុនរំលោភដីធ្លីពីជនជាតិភាគិច និងដីសម្បទានសេដ្ឋកិច្ចជាដើម ។ លោកបន្តថា ដីធ្លីពួកគាត់តិចតួណាស់ដែល បានទទួលការចុះបញ្ជីរ ។
ក្នុងនាមជាដៃគូដ៏ធំបំផុតរបស់ប្រទេសកម្ពុជាលើផ្នែកជំនួយអភិវឌ្ឍន៍ សហភាពអឺរ៉ុប បានបញ្ចេញថវិកាជំនួយឥតសំណងជាង៤០លានអឺរ៉ូ ដើម្បីគាំទ្រ ដល់ការ អភិវឌ្ឍន៍ប្រទេសកម្ពុជាក្នុងឆ្នាំ២០១៥ និងគ្រោងបញ្ចេញប្រាក់ចំនួ ៥៩លានអឺរ៉ូ បន្ថែមទៀតនៅក្នុងឆ្នាំ២០១៦៕
