ឯកអគ្គរដ្ឋទូតនៃសហភាពអឺរ៉ុបប្រចាំកម្ពុជា លោក George Edgar ថ្លែងថាសហភាពអឺរ៉ុប មានគម្រោងផ្ដល់ជំនួយទឹកប្រាក់បន្ថែម១ភាគ៣ នៃចំនួនទឹកប្រាក់សរុប១០លានអឺរ៉ូ ដល់សាលាក្ដីខ្មែរក្រហមនៅក្នុងឆ្នាំនេះ ។ ការថ្លែងរបស់លោក George Edgar បានធ្វើឡើងនៅក្នុងសន្និសីទសារព័ត៌មានកាលពីរសៀលថ្ងៃពុធ ទី២០ មេសា ឆ្នាំ២០១៦ នៅឯស្នាក់ការកណ្ដាលរបស់ EU ប្រចាំកម្ពុជា គឺបន្ទាប់ពីលោកទើបបញ្ចប់ទស្សនកិច្ច របស់លោកនៅខេត្តរតនគិរី និងខេត្តមណ្ឌលគិរី ។
លោក George Edgar បានបញ្ជាក់ថាថវិកាដែលសហភាពអឺរ៉ុប ត្រៀមផ្ដល់ទៅកាន់សាលាក្ដីខ្មែរក្រហមប្រមាណ១ភាគ៣នេះ គឺសំដៅជួយដល់ដំណើរការកាត់ក្ដីរបស់សាលាក្ដីនេះ ឱ្យកាន់តែប្រសើរឡើង ។ បើតាមលោក George Edgar កាលពីឆ្នាំមុនសហភាពអឺរ៉ុបបានផ្ដល់មូលនិធិចំពោះសាលាក្ដីខ្មែរក្រហម គឺមានទឹកប្រាក់ប្រមាណជា១០លានអឺរ៉ូ ដែលនៅក្នុងនោះមាន២ភាគ៣ បានផ្ដល់ជូនដល់សាលាក្ដីនេះរួចហើយចំណែក១ភាគ៣ទៀតនឹងត្រៀមផ្ដល់ជូននៅក្នុងឆ្នាំនេះ ។
សហភាពអឺរ៉ុប ដែលជាប្រភពផ្ដល់ជំនួយធំជាងគេសម្រាប់កម្ពុជា បានប្រកាសផ្ដល់ជំនួយ ៤០០លានដុលា្លរ ក្នងរយៈពេល៧ឆ្នាំ គឺចាប់តាំងពីឆ្នាំ២០១៤ ដល់ ឆ្នាំ ២០២០ ៕
