ម្ដាយមីងយុវជនម្នាក់រស់នៅខេត្ដកោះកុងត្រូវបានសមត្ថកិច្ចចាប់ខ្លួន ដោយសារលេងជះទឹកកាលពីបុណ្យចូលឆ្នាំ ទទូចឱ្យសមត្ថកិច្ចដោះលែង ក្មូយ អ្នកស្រីវិញព្រោះអ្នកស្រីថា គឺជាការសងសឹកផ្ទាល់ខ្លួនហើយជារឿងអយុត្តិធម៌ ។ អ្នកស្រី វុន សុខណាត ដែលត្រូវជាម្ដាយមីងរបស់យុវជន អេង លីឆាយ ភេទប្រុស អាយុ១៧ឆ្នាំ ដែលត្រូវបានសមត្ថកិច្ចចាប់ខ្លួនកាលពីថ្ងៃទី ១៤ មេសា ឆ្នាំ២០១៦ បានអះអាងប្រាប់វិទ្យុស្ត្រីថា ក្មួយប្រុសរបស់អ្នកស្រីមិនបានប្រព្រឹត្ដិដូចការចោទប្រកាន់របស់សម្ថកិច្ចខេត្ដកោះកុងនោះឡើយ ។
ស្ដ្រីរូបនេះបានប្រាប់ឲ្យដឹងថាកាលពីថ្ងៃចូលឆ្នាំទី ២ នាពេលព្រឹកក្មួយប្រុសរបស់អ្នកស្រីរួមជាមួយមិត្ដភ័ក្ររបស់គាត់មានគ្នាប្រមាណជិត ២០នាក់នាំគ្នាយកទឹកមកគប់គ្នាលេងនៅមុខផ្ទះយុវជន អេង លីឆាយ តែក៏មានយុវវជនមួយក្រុមទៀតបានមកដល់ហើយក៏លេងគប់គ្នាទៅវិញទៅមក រហូតដល់មានទំនាស់ពាក្យសម្ដីក៏បង្កឲ្យមានការយកដុំដី និង ដុំថ្មគប់គ្នាដែលបណ្ដាលឲ្យភាគីម្ខាងទៀតនោះខូចខាតម៉ូតូចំនួនពីរគ្រឿងផង ។
ឆ្លើយតបនឹងការបញ្ហានេះលោក វីរៈសេនីយ៍ឯក ឃឹម សាណេ ទទួលស្គាល់ថា កាលពីថ្ងៃទីពីរនៃថ្ងៃចូលឆ្នាំប្រពៃណីជាតិខ្មែរគឺពិតមានការឃាត់ខ្លួនយុវជនឈ្មោះថា អេង លីឆាយ មែនក្រោមបទចោទបំផ្លាញទ្រព្យសម្បត្ដិបុគ្គលសាធារណៈ ។ លោក ឃឹម សាណេ បានបន្ថែមថា ការប្រព្រឹត្ដហិង្សារបស់យុវជននេះប្រសិនបើគិតតាមច្បាប់ជនបង្កគឺត្រូវសងសំណងទៅជនរងគ្រោះ ហើយក៏ត្រូវមានទោសព្រហ្មទណ្ឌផងដែរ ។ លោកបន្ដរថា ពេលនេះសំណុំរឿងយុវជនឈ្មោះ អេង លីឆាយ ត្រូវបានបញ្ជូនសំណុំរឿងឡើងទៅដល់តុលាការហើយ ។
ជុំវិញការឆ្លើយតបរបស់លោកវីរៈសេនីយ៍ឯក ឃឹម សាណេ នេះដែរអ្នកស្រី វុន សុខណាតបានបដិសេធការអះអាងនេះ ដោយអ្នកស្រីលើកឡើងថា បំពង់ទីបដែលសមត្ថកិច្ចរកឃើញនោះគឺអាចរើសបានមកពីកន្លែងជាងដែកនៅក្បែផ្ទះរបស់ក្មួយអ្នកស្រីប៉ុណ្ណោះ ។ អ្នកស្រីថា ការចាប់ខ្លួនក្មួយរបស់អ្នកស្រីគឺជាការសងសឹកគំនុំផ្ទាល់ខ្លួនព្រោះកន្លងមកក្រុមគ្រួសាររបស់យុវជនខាងលើធ្លាប់មានទំនាស់ជាមួយ ភាគីសមត្ថកិច្ចជាច្រើនលើកពាក់ព័ន្ធនឹងបញ្ហាជាច្រើន។
បើទោះបីជាមានការឆ្លើយតបយ៉ាងណាក៏អ្នកស្រី វុន សុខណាត ក៏បានអំពាវនាវសុំ សម្ដេចនាយករដ្ឋមន្ដ្រីជួយស្វែងរកយុត្ដិធម៍សម្រាប់គ្រួសារអ្នកស្រីផង។
ជុំវិញការចាប់ខ្លួនយុវជនឈ្មោះ អេង លីឆាយ នេះដែរ លោក ញៀប សំអឿន មន្ដ្រីផ្នែកសិទ្ធិមនុស្សអង្កការអាដហុកប្រចាំខេត្ដកោះកុងបានចាត់ទុកទង្វើរនេះថាជាការំលោភសិទ្ធិមនុស្ស ។ លោកបានបន្ថែមថា ត្រឹមតែករណីធ្វើឲ្យខូចខាតទ្រព្យសម្បត្ដិអ្នកដទៃសមត្ថកិច្ចគួរត្រឹមធ្វើការអប់រំណែនាំ មិនគួរដល់ថ្នាក់ចាប់បញ្ជូនជនបង្កដាក់ពន្ធនាគារដូចនេះទេ ។
តាមការផ្ដល់ព័ត៌មានរបស់លោក វីរៈសេនីយ៍ឯក ឃឹម សាណេ ក្មេងប្រុសអាយុ១៧ឆ្នាំ រូបនេះត្រូវបានសមត្ថកិច្ចប៉ូលិសនាំខ្លួនផ្ញើនិងឃុំខ្លួននៅពន្ធនាគារខេត្ត កោះកុង ដោយរង់ចាំការចោទប្រកាន់ជាផ្លូវការ ៕
