ភ្នំពេញ ៖ ប្រធានក្រុមការងារ Facebook សម្តេច ហ៊ុន សែន បដិសេធថា សម្តេច ហ៊ុន សែន មិនបានអួតខ្លួនសម្ដេច ជាអធិរាជហ្វេសប៊ុកនោះទេ និងស្នើឱ្យភ្នំពេញប៉ុស្ត៍កែតម្រូវអត្តបទរបស់ខ្លួនជាបន្ទាន់ ។ ការស្នើឱ្យកែតម្រូវនេះ បន្ទាប់ ពីកាសែតភ្នំពេញប៉ុស្តិ៍ ចុះផ្សាយនៅថ្ងៃនេះ បានដាក់ចំណងជើងថា «លោក ហ៊ុន សែន ប្រកាសខ្លួនឯងជា អធិរាជ ហ្វេសប៊ុក» ។
ក្នុងលិខិតរបស់ ដួង តារាដែលជាប្រធានក្រុមការងារ Facebook សម្តេច ហ៊ុន សែន បានលើកឡើងថា ការចុះផ្សាយបែបនេះ គឺជាការសរសេរបំភ្លៃគ្មានការពិត និងគ្មានការទទួលខុសត្រូវលើវិជ្ជាជីវៈ ។
លោក ដួង តារា បានសរសេរបញ្ជាក់ថាតាមពិតប្រសាសន៍របស់សម្តេចនាយករដ្ឋមន្ត្រី ហ៊ុនសែន នៅក្នុងពេលសម្ពោធរោងចក្រស្ករស និងកៀបទឹកអំពៅនៅខេត្តព្រះវិហារកាលពីម្សិលមិញ គឺ់សម្តេចមិនបានលើកឡើងថាខ្លួនអធិរាជហ្វេសប៊ុកនោះទេ គឺសម្តេចចង់សំដៅពាក្យនេះទៅមេដឹកនាំគណបក្សប្រឆាំងវិញទេ ។
ឆ្លើយតបនឹងលិខិតរបស់លោក ដួង តារា លោក កៃ គឹមសុង និពន្ធនាយកកាសែតភ្នំពេញ ប៉ុស្តិ៍ជាខេមរៈភាសា បានឱ្យដឹងថាលោកបានទទួលលិខិតសុំកែសម្រួលនេះរួចរាល់ហើយ ។ លោកបន្តថា លោកនឹងមើលបើសិនមានកំហុងលោកនឹងធ្វើការកែតម្រូវ តែបើមិនខុសទេនឹងគ្មានការកែតម្រូវឡើយ ។
កាលពីថ្ងៃទី១៩ មេសា ម្សិលមិញនៅក្នុងពិធីសម្ពោធរោងចក្រស្ករស របស់ក្រុមហ៊ុន Rui Feng Cambodia International Co.,ltd ក្នុងស្រុកឆែប ខេត្តព្រះវិហារ សម្តេច ហ៊ុន សែនបានថ្លែងចំអកឱ្យប្រធានគណបក្សប្រឆាំងលោក សម រង្ស៊ីថាលេងហ្វេសប៊ុកចាញ់ខ្លួន និងថាលោក សម រង្ស៊ី បានចោទប្រកាន់រូបលោកថាលួចLikesពីហ្វេសប៊ុករបស់លោក ៕
