ភ្នំពេញ ៖ ព្រះរាជអាជ្ញារងសាលាដំបូងរាជធានីភ្នំពេញ កោះហៅដើមបណ្តឹងកញ្ញា ធី សុវណ្ណថា ដើម្បីមកសាកសួរជុំវិញបណ្តឹងដែលបានប្ដឹងកញ្ញាពីបទបរិហារកេរ្តិ៍ទាក់ទងខ្សែអាត់សំឡេង ការសន្ទនាស្នេហារវាង លោក កឹមសុខានិងកញ្ញា ខុម ចាន់តារាទី ហៅស្រីមុំ នៅចុងខែ មេសានេះ ។
យោងតាមដីកាកោះហៅរបស់ លោក កែវ សុជាតិ ព្រះរាជអាជ្ញារងនៃអយ្យការអបសាលាដំបូងរាជធានីភ្នំពេញ នៅថ្ងៃទី ១៨ មេសា បានបង្គាប់ឲ្យដើមបណ្តឹង កញ្ញា ធី សុវណ្ណថា ចូលខ្លួននៅសាលាដំបូង ដើម្បីសាកសួរពីដំណើររឿងប្តឹងពីបរិហារកេរ្តិ៍ នៅព្រឹកថ្ងៃទី ២៧ មេសា ឆ្នាំ ២០១៦ នាម៉ោង ០៨ :៣០ ព្រឹក។
ចំណែក កញ្ញា ខុម ចាន់តារ៉ាទី ហៅស្រីមុំ ត្រូវបាន លោក កែវ សុជាតិ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានបង្គាប់ឲ្យចូលខ្លួនទៅតុលាការដំបូង នៅថ្ងៃទី ២៩ មេសា ម៉ោង ០៨ :៣០ ព្រឹក។ ការកោះហៅ កញ្ញា ស្រី មុំនេះ ជុំវិញបណ្តឹងរបស់ កញ្ញា ធី សុវណ្ណថា ប្តឹងរឿងបរិហារកេរ្តិ៍ ។
កាលពីខែមីនា កញ្ញា ធី សុវណ្ណថា បានដាក់ពាក្យប្តឹងឲ្យសមត្ថកិច្ចស្រាវជ្រាវសំឡេងសន្ទនាស្នេហាដែលត្រូវគេអះអាងថាជាការសន្ទនារវាងលោក កឹម សុខា និងកញ្ញាស្រីមុំ គឺជាចំណែកមួយនៃការសន្ទនាមានលក្ខណៈបរិហាកេរ្តិ៍ឈ្មោះរបស់នាង ។
កាលពីថ្ងៃអង្គារ ព្រះរាជអាជ្ញារងអមសាលាដំបូងរាជធានី លោក សៀង សុខ បានសាកសួរកញ្ញាស្រីមុំអស់រយៈពេលជាង៤ម៉ោង ពីដំណើររឿងរបាយការណ៍របស់សមត្ថកិច្ចនៃនាយកដ្ឋានប្រឆាំងភេរវកម្មនិងឧក្រិដ្ឋកម្មឆ្លងដែន ដែលថាផ្ដល់សក្ខីកម្មក្លែងនិងមានអំពើពេស្យាចារ ។ ប៉ុន្តែកញ្ញា ស្រីមុំបានបដិសេធទាំងស្រុងលើសំឡេងបែកធ្លាយថាមិនមែនជាសំឡេងរបស់នាង ដែលគេអះអាងថាសន្ទនាជាមួយមួយលោក កឹម សុខា ។
តែនៅពេលជាមួយគ្នានេះ តុលាការសាលាដំបូងរាជធានីភ្នំពេញបានចេញសេចក្ដីការណ៍ដោយ អះអាងថា កញ្ញាស្រីមុំ បានសារភាពថា ខ្លួនបានសន្ទនាជាមួយលោក កឹម សុខានោះមែន ហើយថា លោក កឹម សុខាបានបង្គាប់ស្រីមុំ ឆ្លើយបដិសេធ ៕
