ភ្នំពេញ ៖ មេធាវីការពារក្តីឲ្យ កញ្ញា ចាន់ តារាទី ហៅ ស្រីមុំ បានលើកឡើងក្រោយបញ្ចប់ការសាកសួរនៅព្រឹកថ្ងៃអង្គារ៍នេះថា ព្រះរាជអាជ្ញារងសាលាដំបូងរាជធានីភ្នំពេញ លោក សៀង សុខ មិនបានសាកសួរអំពីករណីផ្ដល់សក្ខីកម្មក្លែង និងអំពើពេស្យាចារឡើយ ។ ចំណែកអង្គការធ្វើការលើស្ត្រីថា អ្នកនយោបាយយកកញ្ញា ស្រីមុំ ជាឈ្នាន់នយោបាយ និងរំលោភសិទ្ធិមនុស្សធ្ងន់ធ្ងរ ។ លោក ធូ វិរៈលម្អិតព័ត៌មាននេះ
នៅពេលដែលអ្នកសារព័ត៌មានសួរថា តើព្រះរាជអាជ្ញាសាកសួរកញ្ញា ស្រី មុំ អំពីករណីផ្ដល់សក្ខីកម្មក្លែង និងអំពើពេស្យាចារដែរឬទេ? មេធាវីការពារឲ្យកញ្ញា ស្រីមុំ អ្នកស្រី គ្រី ឈួន ឆ្លើយថា ព្រះរាជអាជ្ញារងសាលាដំបូងរាជធានីភ្នំពេញ លោក សៀង សុខ មិនបានសាកសួរ កញ្ញា ខុម ចាន់តារាទី ហៅ ស្រីមុំ អំពីករណីផ្ដល់សក្ខីកម្មក្លែង និងអំពើពេស្យាចារ តែព្រះរាជអាជ្ញាសួរអំពីខ្សែអាត់សំឡេង និងបុគ្គលដែលពាក់ព័ន្ធជាមួយកញ្ញា ស្រីមុំ ប៉ុន្តែមិនបានសំដៅចំឈ្មោះ លោក កឹម សុខា នោះទេ។
អ្នកស្រី គ្រី ឈួន មានប្រសាសន៍ថា«សំនួរនិងអត់បានតាំងសួរទេនៅព្រឹកនេះ។ តុលាការសំខាន់សួរពីខ្សែអាត់សំឡេង និងទំនាក់ទំនងរវាងកូនក្តីខ្ញុំជាមួយបុគ្គលពាក់ព័ន្ធ»។
អ្នកស្រី គ្រី ឈួន សង្ឃឹមថាតុលាការក្រុងភ្នំពេញ នឹងមិនសម្រេចចោទប្រកាន់កូនក្តីរបស់អ្នកស្រីទៅតាមរបាយការណ៍របស់សមត្ថកិច្ចនៃនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន រកឃើញថាកញ្ញាជាប់ពាក់ព័ន្ធការផ្ដល់សក្ខីកម្មក្លែង និងអំពើពេស្យាចារ ព្រោះអ្នកស្រីថាកូនក្តីរបស់អ្នកស្រីជាជនរងគ្រោះ។
អ្នកស្រី គ្រី ឈួនបន្តថា «ខ្ញុំសង្ឃឹមថាកូនក្តីរបស់ខ្ញុំរួចផុតពីបទចោទ ព្រោះកូនក្តីខ្ញុំជាជនរងគ្រោះ មិនជាប់ពាក់ព័ន្ទទៅនិងបទល្មើសទៅនិងក្រសួងមហាផ្ទៃធ្វើរបាយការណ៍មកតុលាការទេ»។
ការកោះហៅរបស់តុលាការនេះ គឺបន្ទាប់ពីរបាយការណ៍របស់សមត្ថកិច្ចនៃនាយកដ្ឋានប្រឆាំងភេរវកម្មនិងឧក្រិដ្ឋកម្មឆ្លងដែនរកឃើញថា កញ្ញាជាប់ពាក់ព័ន្ធការផ្ដល់សក្ខីកម្មក្លែងនិងអំពើពេស្យាចារដែលគេចោទថាកញ្ញា មានស្នេហាជាមួយ លោក កឹម សុខា មេដឹកនាំគណបក្សប្រឆាំង។ ក្រោយពីបញ្ចប់ការសាកសួរអស់រយៈពេលជាង៤ម៉ោងរួចមក នៅព្រឹកថ្ងៃ អង្គារនេះ កញ្ញា ខុម ចាន់តារាទី ហៅ ស្រីមុំ មានប្រសាសន៍ថា កញ្ញាមកបំភ្លឺនៅតុលាការរាជធានីភ្នំពេញនេះគឺ ដើម្បីចង់ឲ្យតុលាការរកយុត្តិធម៌ជុំវិញការ ចោទប្រកាន់ថា មានស្នេហាលួចលាក់ជាមួយប្រធានស្តីទីគណបក្សសង្គ្រោះជាតិ។
កញ្ញា ខុម ចាន់តារាទី និយាយថា «និយាយរួមទៅខ្ញុំអត់មានអ្វីនិយាយច្រើនទេ ខ្ញុំនិយាយអ្វីតែការពិត និងរកយុត្តិធម៌ឲ្យខ្ញុំ ពេលទៅមុខទៀតខ្ញុំអត់ដឹងថាអ្វីទេ»។
ជុំវិញបញ្ហានេះ អង្គការធ្វើការងារលើសិទ្ធិស្ត្រី បាន សម្ដែងការសោកស្ដាយ ដែល ស្ត្រីម្នាក់ បានក្លាយជា ឧបករណ៍របស់អ្នកនយោបាយ ។ លោកស្រី ធីតា ឃិះ នាយិការអង្គការសីលការ វាយតម្លៃថា មនុស្សប្រមាណជាង៦០ភាគរយជាអ្នកមានអំណាច និងអ្នកនយោបាយខ្លះមានអាស្រូវស្នេហាលួចលាក់ដូចទៅនិងករណីកញ្ញា ស្រី មុំ ។ លោកស្រីក៏បានអំពាវនាវឲ្យលោក កឹម សុខា ប្រធានស្តីទីគណបក្សសង្គ្រោះជាតិចេញមុខមកបំភ្លឺករណីដែលគេចោទថា មានស្នេហាលួចលាក់។
ជុំវិញបញ្ហានេះ លោក កែម ឡី អ្នកវិភាគបញ្ហាសង្គមដែលបានទៅតាមដាននៅសាលាដំបូងព្រឹកមិញនេះបានរិះគន់អ្នកនយោបាយមួយចំនួនបានយក កញ្ញា ស្រីមុំ ជាល្បែងនយោបាយ ដោយមិនបានគិតពីអនាគតរបស់នាង។ លោកថាស្ថានប័នកំពូលរបស់រដ្ឋធំៗ មិនគួរយករឿងបុគ្គលមកដោះស្រាយនោះទេ ដែលធ្វើឲ្យខូចប្រយោជន៍ជាតិ។
នៅក្រៅរបងតុលាការក្រុងភ្នំពេញនាព្រឹកមិញនេះគេសង្កេតឃើញមានអង្គការសង្គមស៊ីវិលធ្វើការលើស្ត្រី និងមន្ត្រីអង្គការសហប្រជាជាតិ UN រួមទាំងក្រុមនិស្សិតរបស់លោក ស្រី ចំរើនដែលតែងតែតាមឆាឆៅ លោក កឹម សុខា ប្រធានស្តីទីគណបក្សសង្គ្រោះជាតិឲ្យបកស្រាយខ្សែអាត់សំឡេងក័បានអង្កេតអំពីការសាកសួរកញ្ញា ស្រី មុំ។
កន្លងមកសង្គមស៊ីវិលដែលធ្វើការលើកស្ទួយស្ត្រីចំនួន ២០ បានចេញសេចក្ដីថ្លែងការណ៍រួមមួយ កាលពីថ្ងៃទី ០៩ មេសា ថាករណីផ្សាយសំឡេងកញ្ញា ស្រីមុំ នេះគឺជាការជ្រៀតជ្រែក និងផ្សព្វផ្សាយអំពីជីវិតឯកជនរបស់កញ្ញា ខុម ចាន់តារាទី ដែលកំពុងរំលោភលើសិទ្ធិមនុស្ស ខណៈកម្ពុជាជាភាគីនៃកតិកាសញ្ញាអន្តរជាតិស្ដីពីសិទ្ធិពលរដ្ឋ និង សិទ្ធិនយោបាយ ។
ទោះជាយ៉ាងណា លោក កឹម សុខា មិនដែលបានឆ្លើយតប ឬប្រតិកម្ម ចំពោះការវាយប្រហារមកលើរូបលោកម្ដងណាទេ ដោយសន្យាមិនប្រតិកម្មជាដាច់ខាត ៕
