ភ្នំពេញ ៖ នាយករដ្ឋមន្ត្រីកម្ពុជា សម្ដេច ហ៊ុន សែន បានអំពាវនាវដល់ក្រុមហ៊ុនវិនិយោគធំៗនៅកម្ពុជាគួរសង់ផ្ទះឱ្យកម្មករស្នាក់នៅ និងត្រូវផ្តល់ប្រាក់ខែជូនកម្មករឱ្យបានសមរម្យ ដើម្បីទាក់ទាញកម្លាំងពលកម្មកុំអោយទៅធ្វើការចំណាក់ស្រុកនៅក្រៅប្រទេស ។ ការអំពាវនាវនេះធ្វើឡើងក្នុងកម្មវិធីប្រកាសដាក់ដំណើរការ រោងចក្រផលិតស្ករស របស់ក្រុមហ៊ុន RuiFeng lntemational Co.Ltd នៅឃុំម្លូរព្រៃ ស្រុកឆែក ខេត្តព្រះវិហារ នៅព្រឹកថ្ងៃទី១៩ ខែមេសា ២០១៦ ។
បន្ថែមពីលើការអំពាវនាវនេះ សម្តេច ហ៊ុន សែន ក៏បានស្នើឱ្យក្រុមហ៊ុនវិនិយោគត្រូវសង់មន្ទីរពេទ្យ និងសាលារៀនផងដែរ នៅក្នុងកសិដ្ឋានរបស់ក្រុមហ៊ុន ដើម្បីបំរើសេវាកម្មជូនដល់កម្មករ និងបំរើដល់ប្រជាពលរដ្ឋដែលមានទីតាំងនៅក្បែរនោះ ។
សម្តេច ហ៊ុន សែន មានប្រសាសន៍ថា «អញ្ចឹង!ប្រជាពលរដ្ឋនឹងទទួលបានផលប្រយោជន៍ពីហេដ្ឋារចនាសម្ព័នរបស់ក្រុមហ៊ុនដែលទទួលបានសិទ្ធិវិនិយោគដីធ្លីក្នុងព្រះរាជាណាចក្រកម្ពុជា»។
ទោះបីជាយ៉ាងណា លោកនាយករដ្ឋមន្ត្រី ហ៊ុន សែន ក៏ថ្លែងទទួលស្គាល់ថា មានកម្លាំងពលកម្មរបស់កម្ពុជានៅតែបន្តធ្វើការចំណាក់ស្រុកទៅធ្វើការនៅបរទេស ពិសេសគឺប្រទេសថៃ ដោយពលរដ្ឋមួយចំនួនចំណាក់ស្រុកទាំងខុសច្បាប់ទៀតផង ៕
