ភ្នំពេញ៖ បន្ទាប់ពីមានសំណើពីប្រជាសហគមន៍ព្រៃឡង់ សុំឱ្យរដ្ឋាភិបាលកម្ពុជាបញ្ចូលសមាសភាពពួកគេក្នុងការចូលរួមការពារតំបន់ព្រៃទ្បង់ជាមួយនឹងភាគីរដ្ឋាភិបាល លោក សាយ សំអាល់ រដ្ឋមន្ត្រីក្រសួងបរិស្ថានដែលទើបត្រលប់មកពីមើលស្ថានភាពព្រៃឡង់ បានថ្លែងថា រដ្ឋាភិបាលស្វាគមន៍ចំពោះបំណងរបស់ប្រជាសហគមន៍ដែលចង់ចូលរួមជាមួយរដ្ឋាភិបាលដើម្បីការពារព្រៃឡង់ ។ លោកថា ការស្នើសុំនេះ ក្រសួងនឹងលើកយកទៅជជែកនៅសិក្ខាសាលានាពេលខាងមុខនេះ ។
ខណៈរដ្ឋាភិបាលកំពុងពន្លឿនការដាក់តំបន់ព្រៃឡង់ ជាតំបន់ព្រៃអភិរក្សស្របតាមផ្លូវច្បាប់ រដ្ឋមន្ត្រីក្រសួងបរិស្ថាន លោក សាយ សំអាល់ បានថ្លែងសន្យាទទួលយកការ ស្នើសុំរបស់ប្រជាសហគមន៍ព្រៃឡង់ដែលស្នើឱ្យរដ្ឋាភិបាលដាក់បញ្ចូលសមាសភាពរបស់ពួកគេដើម្បីរួមចំណែកការពារតំបន់ព្រៃដ៏ធំមួយនេះ ។
លោក សាយ សំអាល់ ថ្លែងបែបនេះ បន្ទាប់ពីលោកនិងលោក William A. Heidt ឯកអគ្គរដ្ឋទូតអាមេរិកប្រចាំប្រទេសកម្ពុជា ព្រមទាំងមន្ត្រីរដ្ឋាភិបាលមួយចំនួនទៀតដែល ទើបត្រឡប់មកពីមើលព្រៃឡង់វិញដោយជិះឧទ្ធម្ភាគចក្រ នៅថ្ងៃទី ១៨ ខែមេសា ឆ្នាំ ២០១៦ ។
« រដ្ឋអធិបតេយ្យមួយ វាមានរដ្ឋបាលស៊ីវិលហ្នឹង ហើយមានជារដ្ឋ ដែលយើងហៅថារដ្ឋអំណាច។ ឥឡូវហ្នឹងក្នុងសិក្ខាសាលា យើងនឹងពិភាក្សាជាមួយគាត់ថា តើគាត់អាចចូលរួមរបៀបមិច តាមការរាយការណ៍ការឃ្លាំមើល ព្រោះតំបន់នេះធំណាស់» ។
លោក សាយ សំអាល់ បានឱ្យដឹងបន្តថា ខណៈដែលលោកនិងឯកអគ្គរដ្ឋទូតសហរដ្ឋសហអាមេរិក ជិះឧទ្ធម្ភាគចក្រមើលព្រៃឡង់ លោកបានមើលឃើញបញ្ហាមួយចំនួនរបស់ព្រៃឡង់ គឺតំបន់នេះកំពុងរងការកាប់ទន្ទ្រានយកដីពីប្រជាពលរដ្ឋ ការកាប់ព្រៃឈើ និងបញ្ហាទំនាក់ទំនងរវាងថ្នាក់ជាតិនិងអាជ្ញាធរថ្នាក់ក្រោមជាតិ។
លោកបានបញ្ជាក់ថា ដើម្បីការពារតំបន់ព្រៃឡង់មិនឱ្យមានការកាប់បំផ្លាញតទៅទៀត រដ្ឋាភិបាលនឹងបញ្ឈប់ការផ្តល់ព្រៃសម្បទានក្នុងអាណត្តិនេះ ហើយក្រសួងនឹងពន្លឿនដាក់ព្រៃឡង់ជាព្រៃអភិរក្សតាមផ្លូវច្បាប់ ។
នៅពេលជាមួយគ្នានេះដែរ លោក William A. Heidt ឯកអគ្គរដ្ឋទូតអាមេរិកប្រចាំប្រទេសកម្ពុជា បានប្រាប់អ្នកសារព័ត៌មានថា លោកបានឃើញនឹងភ្នែកពីស្ថានភាពរបស់ព្រៃឡង់ ហើយលោកបានថ្លែងគាំទ្រ ពីវិធានការរបស់រដ្ឋាភិបាលដែលបានរក្សាទុកតំបន់ព្រៃឡង់ជាតំបន់ការពារឱ្យនៅគង់វង់ទៅមុខទៀត ។ ជាមួយគ្នានេះដែរ លោក William A. Heidt បានសរសើរចំពោះប្រជាសហគមន៍ដែលបានជួយការពារព្រៃឡង់បានបន្តគង់វង្ស ។
បណ្តាញសហគមន៍ព្រៃទ្បង់បានឱ្យដឹងថា បើទោះបីជារដ្ឋាភិបាលមានវិធានតឹងរ៉ឹង ប៉ុន្តែបច្ចុប្បន្ននេះព្រៃទ្បង់នៅតែរងការកាប់បំផ្លាញពីជនទុច្ចរិតមួយចំនួនដែលមានអំណាច ។
ព្រៃឡង់មានផ្ទៃក្រឡា ៣,៦០០ គីឡូមែត្រការ៉េ មានជនជាតិដើមភាគតិចរស់នៅជាង ២០០,០០០នាក់ មានព្រំប្រទល់ជាប់ខេត្តព្រះវិហារ ខេត្តស្ទឹងត្រែង ខេត្តក្រចេះ និងខេត្តកំពង់ធំ ។ ព្រៃឡង់ រងការបំផ្លាញជាច្រើនឆ្នាំមកហើយ ៕
