ភ្នំពេញ ៖ លោកស្រី គ្រី ឈួន មេធាវីការពារក្តីកញ្ញា ខុម ចាន់តារាទី ហៅ ស្រីមុំ នៅថ្ងៃទី ១៨ ខែមេសានេះថា លោកស្រីទើបបានដាក់ពាក្យនៅសាលាដំបូងរាជធានីភ្នំពេញ ដើម្បីធ្វើជាមេធាវីការពារក្តីជូនកញ្ញា ស្រីមុំ ទាក់ទងដីកាកោះហៅកញ្ញា ស្រីមុំ ឲ្យចូលបំភ្លឺ បន្ទាប់ពីរបាយការណ៍របស់សមត្ថកិច្ចរកឃើញថា កញ្ញា ស្រីមុំ ជាប់ពាក់ព័ន្ធការផ្ដល់សក្ខីកម្មក្លែងនិងអំពើពេស្យាចារ ។
មេធាវីការពារក្ដីនៃសមាគមអាដហុក លោកស្រី គ្រី ឈួន បានប្រាប់វិទ្យុស្ត្រីថា តុលាការក្រុងភ្នំពេញបានទទួលពាក្យសុំរបស់លោកស្រី និង លោក ឡង់ លន់ ធ្វើជាមេធាវីការពារក្តីកញ្ញា ស្រីមុំ ហើយនៅព្រឹកថ្ងៃទី ១៨ ខែមេសានេះ។ លោកស្រី គ្រី ឈួន បន្តថា ពេលនេះលោកស្រីនិងមេធាវីមួយរូបទៀតកំពុងបន្តពិភាក្សាគ្នាជាមួយកូនក្តីរបស់ខ្លួន ថាត្រូវសម្រេចឱ្យកូនក្តីចូលបំភ្លឺឬត្រូវបដិសេធ នឹងដឹងនៅរសៀលថ្ងៃនេះ ។
សូមបញ្ជាក់ថា កញ្ញា ខុម ចាន់តារាទី ហៅ ស្រីមុំ ដែលត្រូវបានគេចោទថា មានស្នេហាលួចលាក់ជាមួយប្រធានស្តីទីគណបក្សសង្គ្រោះជាតិ លោក កឹម សុខា ធ្លាប់បានដាក់ពាក្យសុំពន្យារពេលចូលបំភ្លឺនៅតុលាការរួចម្តងមកហើយ បន្ទាប់ពីព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញចេញដីកាកោះហៅ កញ្ញា ឲ្យចូលបំភ្លឺនៅតុលាការ នៅថ្ងៃទី ០៨ ខែមេសា ឆ្នាំ ២០១៦ ។ ការកោះហៅរបស់តុលាការនេះ គឺបន្ទាប់ពីរបាយការណ៍របស់សមត្ថកិច្ចនៃនាយកដ្ឋានប្រឆាំងភេរវកម្មនិងឧក្រិដ្ឋកម្មឆ្លងដែនរកឃើញថា កញ្ញាជាប់ពាក់ព័ន្ធការផ្ដល់សក្ខីកម្មក្លែងក្លាយនិងអំពើពេស្យាចារ។
កន្លងមកសង្គមស៊ីវិលដែលធ្វើការលើកស្ទួយស្ត្រីចំនួន ២០ បានចេញសេចក្ដីថ្លែងការណ៍រួមមួយ កាលពីថ្ងៃទី ០៩ មេសា ថាករណីផ្សាយសំឡេងកញ្ញាស្រីមុំនេះ គឺជាការជ្រៀតជ្រែកនិងផ្សព្វផ្សាយអំពីជីវិតឯកជនរបស់កញ្ញា ខុម ចាន់តារាទី ដែលកំពុងរំលោភលើសិទ្ធិមនុស្ស ខណៈដែលកម្ពុជាជាភាគីនៃកតិកាសញ្ញាអន្តរជាតិស្ដីពីសិទ្ធិពលរដ្ឋ និង សិទ្ធិនយោបាយ។ ម្យ៉ាងវិញទៀត ដីកាកោះហៅរបស់តុលាការនេះ គឺជាការចោទប្រកាន់ដោយគ្មានមូលដ្ឋានច្បាស់លាស់ ៕
