ក្នុងឱកាសចូលឆ្នាំថ្មីប្រៃណីជាតិខ្មែរ មន្ដ្រីនៅតាមបណ្ដាខេត្ដទេសចរណ៍គោលដៅមួយចំនួនបានព្យាយាមកែច្នៃ និង រៀបចំកែលម្អថ្មីៗ ជាច្រើនក្នុងបំណងដើម្បីទាក់ទាញភ្ញៀវទេសចរណ៍ឲ្យទស្សនារម្យណីយដ្ឋានក្នុងខេត្ដទាំងនោះឲ្យបានច្រើនជាងបុណ្យចូលឆ្នាំខ្មែរកាលឆ្នាំមុន។
អភិបាលខេត្ដ និង ប្រធានមន្ទីខេត្ដមួយចំនួនដែលជាខេត្ដគោលដៅទេសចរណ៍ក្នុងព្រះរាជាណាចក្រកម្ពុជាបានបង្ហាញកម្មវិធី និង កន្លែងកំសាន្ដជាច្រើននៅក្នុងខេត្ដដែលពួកគាត់កំពុងតែបំពេញភារកិច្ចដើម្បីអបអរឆ្នាំថ្មី ។
អភិបាលខេត្ដព្រះសីហនុ លោក យន្ដ មីន មានប្រសាសន៍ប្រាប់វិទ្យុស្ដ្រីថា ក្នុងឱកាស់បុណ្យចូលឆ្នាំថ្មីប្រពៃណីជាតិខ្មែរ លោក និងប្រធានមន្ទីទេសចរណ៍ខេត្ដគឺមិនមានអ្វីខុសពីរៀងរាល់ឆ្នាំនោះទេ គឺខេត្ដនេះនឹងរៀបចំឲ្យមានការលេងល្បែងប្រជាប្រិយ៍ខ្មែរជាច្រើនប្រភេទ បូករូមនិងការតាំពិព័ណផ្សេងផងដែរ លោកថា រឿងដែលសំខាន់ទៀតនោះគឺការពង្រីកបន្ថែមឆ្នេរសមុទ្រដើម្បីឲ្យមានកន្លែងកាន់តែទូលាយសម្រាប់ពលរដ្ឋខ្មែរមកកំសាន្ដ ។
«ក្នុងឱកាស់ចូលឆ្នាំថ្មីប្រពៃណីជាតិខ្មែរយើងគឺមិនខុសពីរាល់ឆ្នាំនោះទេ គឺយើងពង្រឹងបន្ថែមនូវការរៀបចំខេត្ដដើម្បីទទួលទេវតាឆ្នាំថ្មីនេះ ដូចការគ្រោងទុកយើងនឹងមានរៀបចំលេងល្បែងកំសាន្ដប្រជាប្រិយ៍ ហើយក្នុងនោះចំណុចសំខាន់គឺការពង្រីកឆ្នេរបន្ថែមប្រមាណ១០០០ ម៉ែតបន្ថែមទៀតដើម្បីឲ្យប្រជាពលរដ្ឋយើងមានកន្លែងលេងកំសាន្ដកាន់តែច្រើនទៀត» ។
លោក យន្ដ មីន បន្ថែមថា លោកក៏បានធ្វើការណែនាំដល់មន្ដ្រីចរាចរណ៍ដើម្បីត្រៀមខ្លួនឲ្យបានរួចរាល់ក្នុងការជួយសម្រួលដល់ការធ្វើដំណើររបស់ពលរដ្ឋក្នុងពេលចូលឆ្នាំ ហើយចំពោះការតម្លៃផ្ទះសំណាក់ សណ្ឋាគា អ្វីផ្សេងលោកក៏បានធ្វើការណែនាំកុំឲ្យមានការតម្លើងថ្លៃដែរ ។ អភិបាលខេត្ដព្រះសីហនុបន្ដថា ឆ្នេរកំពង់សោមបានជាប់ឈ្មោះជាឆ្នេរស្អាតក៏ព្រោះតែក្រុមការងារ និង ប្រជាពលរដ្ឋ បានសហការគ្នាយ៉ាងល្អប្រសើរក្នុងការជួយថែរក្សានិងសម្អាតបរិស្ថាន។
ខេត្ដព្រះសីហនុក្រៅតែពីឆ្នេរសមុទ្រកំពង់សោមដែលជាទីពេញនិយមទៅកំសាន្ដពីភ្ញៀវទេសចរណ៍ ខេត្ដនេះក៏មានកោះប្រមាណជាង ៣០ ផងដែរ ក៏ប៉ុន្ដែកោះដែលសម្បូរភ្ញៀវទេសចរណ៍ទៅកំសាន្ដច្រើនមានត្រឹមតែពីរ ឬបីកោះប៉ុណ្ណោះ ក្នុងនោះមានកោះ រុង កោះរូងសន្លឹម និង កោះទន្សាយ ជាដើម។
លោកបានបញ្ជាក់ទៀតថា កម្ពុជាគឺជាប្រទេស ពោរពេញទៅអរិយធម៍ដ៏ល្អវិចិត្រដែលលោកបានដាក់ផែនការសម្រាប់ថ្ងៃចូលឆ្នាំឆ្នាំនេះ គឺខេត្ដព្រះសីហនុនឹងរៀបចំឲ្យមានការលេងល្បែងប្រជាប្រិយ៍ដើម្បីបង្ហាញដល់បរទេសឲ្យបានដឹងពីល្បែងប្រជាប្រិយ៍ខ្មែរកាន់តែទូលំទូលាយបន្ថែម ។ លោក យន្ដ មីន ក៏បានបង្ហាញពីកម្មវិធីមួយដែលមានឈ្មោះថា «គ្រួសារស្អាត ភូមិស្អាត ឃុំស្អាត » លោកថា ការផ្ដូចផ្ដើមប្រារព្ធពិធីនេះឡើងពីព្រោះតែលោកចង់ឲ្យពលរដ្ឋទាំងអស់ចូលរួមសម្អាតបរិស្ថានទាំងអស់គ្នាដើម្បីសោភ័ណ្ឌភាពនៃខេត្ដទាំងមូល។
«យើងខ្ញុំគិតហើយគិតទៀតរហូតដល់យើងជម្រុញឲ្យមានការប្រលងប្រណាំង គ្រូសារស្អាត ភូមិស្អាត ឃុំស្អាត នេះគឺសំដៅទៅការថែរក្សាអនាម័យហ្នឹងឯង ក៏ប៉ុន្ដែប្រហែលមកពីទំលាប់បងប្អូនយើងអាចមានការលំបាកបន្ដិច ត្រូវប្រើពេលយូបន្ដិចក្នុងការប្ដូរទំលាប់ការចោលសំរាមផ្ដេសផ្ដាស់នេះប៉ុន្ដែពេលនេះឃើញថាមានការកែប្រែច្រើនហើយ» ។
លោក យន្ដ មីន ក៏បានអំពាវនាវដល់ពលរដ្ឋខ្មែរគួរតែចំណាយពេលវេលាទៅទស្សនាខេត្ដព្រះសីហនុ ដែលជាសមុទ្រខ្មែរដ៏មានសម្រស់ឆើតឆាយពិសេសក្នុងឱកាស់បុណ្យចូលឆ្នាំថ្មីនេះ ខេត្ដនេះក៏បានពង្រីកឆ្នេរសមុទ្របន្ថែមរហូតដល់ទៅប្រមាណជាង ១០០០ម៉ែតបន្ថែមដើម្បីទទួលភ្ញៀវទេសចរណ៍ទៅកំសាន្ដក្នុងឆ្នាំនេះ។
ជុំវិញការប្រារព្ធកម្មវិធីកំសាន្ដក្នុងឱកាស់បុណ្យចូលឆ្នាំថ្មីនេះដែរ លោក ងិន សុវិមាន ប្រធានមន្ទីទេសចរណ៍ខេត្ដមណ្ឌល់គីរីបានមានប្រសាសន៍ថា លោកបានរៀបចំចាត់ចែងក្រុមការងាររួចរាល់ហើយសម្រាប់ដឹកនាំពលរដ្ឋទាំងអស់ដើម្បីចូលរួមលេងកំសាន្ដនៅល្បែងប្រជាប្រិយ៍ខ្មែរ។
លោកថា ការរៀបចំនេះនឹងមាននៅក្នុងក្រុងសែនមនោរម្យ តំបន់ទឹកជ្រោះប៊ូស្រា និង ពិសេសនោះគឺនៅរង្វង់មូលគោព្រៃក្នុងគោលបំណងដើម្បីឲ្យភ្ញៀវបរទេសពេលដែលធ្វើដំណើរឆ្លងកាត់បានឃើញពីល្បែង របាំប្រជាប្រិយ៍ខ្មែរ។
«នៅក្នុងពេលចូលឆ្នាំនេះយើងមានរៀបចំនៅច្រើនកន្លែងជាពិសេសនៅក្នុងក្រុងសែនមនោរម្យគឺយើងមានការរៀបចំការបង្គំតន្ដ្រី និង នៅតាមវត្ដពិសេសនៅរង្វង់មូលគោព្រៃហ្នឹងយើងមានរៀបចំការលេងល្បែប្រជាប្រិយ៍របស់ខ្មែរយើងដូចជា បោះអង្កុញ ទាញព្រាត់ បោះឈូង ការឡើងសរសរមានខ្មាញ់ បូមទឹកដាក់ដប និង មានល្បែងជាច្រើនទៀត» ។
ប្រធានមន្ទីទេសចរណ៍ខេត្ដបានបន្ថែមថា ក្នុងឱកាសចូលឆ្នាំខ្មែរនេះ លោកសូមធ្វើការអំពាវនាវដល់ពលរដ្ឋទាំងអស់ឲ្យអញ្ជើញទៅទស្សនារមណីយដ្ឋានជាច្រើនកន្លែង លោកបញ្ជាក់ថារម្យណីយដ្ឋានក្នុងខេត្ដនេះគឺមានជាង១៥កន្លែង តែការរៀបចំមិនទាន់បានល្អប្រសើរទាំងស្រុងនៅឡើយទេ។ លោក ងិន សុវិមាន បានឲ្យដឹងដែរថាកាលពីឆ្នាំ២០១៥ ខេត្ដមណ្ឌល់គីរីនេះបានទទួលភ្ញៀវទេសចរណ៍ជាតិ និង អន្ដរជាតិប្រមាណជាង ១ម៉ីននាក់ ដោយឡែកសម្រាប់ឆ្នាំ២០១៦នេះលោកសង្ឃឹមថា អាចនឹងមានកំនើនលើសឆ្នាំមុនទៅទៀត ។ លោកបញ្ជាក់ថាមូលហេតុដែលលោករំពឹងខ្ពស់បែបនេះពីព្រោះតែបច្ចុប្បន្នផ្លូវថ្នល់តភ្ជាប់គ្នារវាងខេត្ដនីមួយៗគឺភាពល្អប្រសើរជាមុនឆ្ងាយ ។
«ខ្ញុំសង្ឃឹមថាអាចមានចំនួនលើសពីឆ្នាំទៅព្រោះយើងបានផ្សព្វផ្សាយច្រើននិយាយទៅផ្លូវមណ្ឌល់គីរី រតនគីរី បានតភ្ជាប់គ្នាអញ្ចឹងវាអាចទៅធ្វើចលនាពីរតនគីរី មកមណ្ឌល់គីរីបន្ថែមទៀតពីមុនយើងបានតែមួយច្រក គឺពីភ្នំពេញមកមណ្ឌល់គីរីតែម្ដងតែឥឡូវភ្ញៀវអាចមកពីភ្នំពេញដល់មណ្ឌល់គីរី រតនគីរី ព្រះវិហារ ហើយចេញទៅសៀមរាបក៏បានដែរ ជួនភ្ញៀវអាចមកពីសៀមរាប ព្រះវិហារ ស្ទឹងត្រែង រតនគីរីមកមណ្ឌល់គីរី រួចបានទៅភ្នំពេញវិញក៏បានដែរ ហេតុដូចនេះដោយសារចលនាផ្លូវខ្ញុំសង្ឃឹម និង ជឿជាក់ថាចំនួនភ្ញៀវមកកំសាន្ដនៅមណ្ឌល់គីរីនឹងមានចំនួនកើន» ។
លោក ងិន សុវិមាន ក៏បានផ្ញើរសារអំពាវនាវដល់ពលរដ្ឋខ្មែរនៅទូទាំងប្រទេសកម្ពុជាសូមអញ្ជើទៅទស្សនាទេសភាពដ៏ស្រស់ត្រកាលនៃខេត្ដមណ្ឌល់គីរីនេះឲ្យបានច្រើនផងក្នុងឱកាស់ចូលឆ្នាំថ្មីនេះ ។ លោកបានក្រើនរម្លឹកពីការធ្វើដំណើរសូមពលរដ្ឋមានការប្រយ័ត្នខ្ពស់ ហើយក៏កុំពិសាគ្រឿងស្រវឹងដែលនាំឲ្យប៉ះពាល់សុខភាព និង អាចមានគ្រោះថ្នាក់ផ្សេងៗបានទៀតផង។
ចំណែកលោក ប៊ុន ថាឬទ្ធី អភិបាលរងខេត្ដសៀមរាបមានប្រសាសន៍ថា ខេត្ដសៀមរាបកំឡុងប៉ុន្មានឆ្នាំចុងក្រោយ គឺបានប្រារព្ធពិធីអង្គរសង្ក្រាន្ដដែលប្រជាពលរដ្ឋទូទាំងប្រទេសសុទ្ធសឹងតែបានដឹងគ្រប់ៗគ្នា ។ លោកថា សម្រាប់ឆ្នាំ២០១៦នេះ ការប្រារព្ធពិធីអង្គរសង្ក្រាន្ដគម្រប ៤ឆ្នាំហើយដែលខេត្ដសៀមរាបបានរៀបចំឡើង ។
អភិបាលរងខេត្ដបន្ដទៀតថា ទឹកដីនៃក្រុងអង្គរនៃឆ្នាំនេះគឺនឹងមានរៀបចំកម្មវិធីកំសាន្ដយ៉ាងសម្បូរបែបលើសពីឆ្នាំមុនទៅទៀតដោយក្នុងនោះរយៈពេល ៤ថ្ងៃទាំងអភិបាលខេត្ដ និង ប្រធានមន្ទីទេសចរណ៍ រួមជាមួយអាជ្ញាធរជាតិអប្សរា បានរៀបចំបែងចែកកម្មវិធីជាបន្ដបន្ទាប់ដើម្បីឲ្យពិធីបុណ្យចូលឆ្នាំថ្មីនៅក្រុងអង្គរឆ្នាំនេះសប្បាយរីករាយជាងមុន។
« និយាយរូមល្បែងប្រជាប្រិយ៍ដែលយើងធ្លាប់លេងកន្លងមក ហើយពេលនេះយើងនឹងធ្វើការស៊ើរើកោះកកាយយកមកលេងកំសាន្ដទៀតដែលមាន ដូចជា ទាញព្រាត់ ចោឈូង ការបង្ហាញនៅក្បាចគុណបុក្តោ និង ការរាំលេងកំសាន្ដជាច្រើនទៀត ហើយនៅក្នុងនោះអាជ្ញាធរជាតិអប្សរាគឺបានចូលរួមចំណែកផ្ដូចផ្ដើមការរៀបចំកម្មវិធីមួយចំនួនដែរ រួមមានការប្រារព្ធពិធីមុណ្យនៅភូមិខ្ញុំ ដែលក្នុងនោះមានការនាំលេងល្បែងកំសាន្ដរហូតដល់ទៅ ជិត ២០ ល្បែងប្រជាប្រិយ៍ខុសៗគ្នា បូករួមនឹងការលេងអុកចាក់ត្រង់ និងការធ្វើបង្អែមនៃសេចក្ដីស្រលាញ់ដែលជាការប្រគួតប្រជែងគ្នាផងដែរ»។
លោក ប៊ុន ថាឬទ្ធិ បានបញ្ជាក់ថា កាលពីឆ្នាំមុនៗកំឡុងចូលឆ្នាំមានរយៈពេល៣ថ្ងៃក្នុងខេត្ដសៀមរាបនេះគឺភ្ញៀវទេសចរណ៍ជាតិ និង អន្ដរជាតិ ប្រមាណជាង ១លាន នាក់។ ហើយសម្រាប់ឆ្នាំនេះអភិបាលរងខេត្ដនេះរំពឹងថា នឹងមានចំនួនច្រើនលើសឆ្នាំមុនៗទៀត។ ត្រង់ចំណុចនេះលោក ប៊ុន ថាឬទ្ធិ បានជម្រាបថា តំបន់សំខាន់ៗចំនួនបីដែលនឹងមានកម្មវិធីលេងល្បែងប្រជាប្រិយ៍កំសាន្ដក្នុងនោះមានទាំងក្នុងទីរួមខេត្ដសៀមរាម និង ក្នុងតំបន់រម្យណីយដ្ឋានអង្គរផងដែរ ។
រីឯលោក អ៊ំ ម៉ារ៉ា អភិបាលខេត្ដព្រះវិហារក៏បានថ្លែងប្រាប់វិទ្យុស្ដ្រីពីការរៀបចំក្នុងថ្ងៃចូលឆ្នាំថ្មីមិនខុសពី អភិបាលខេត្ដ និង ប្រធានមន្ទីខេត្ដមួយចំនួនខាងលើប៉ុន្មាននោះទេក៏ប៉ុន្ដែអភិបាលខេត្ដរូបនេះបាន មានប្រសាសន៍ថា ខេត្ដព្រះវិហារពោរពេញទៅដោយភាពទាក់ទាញជាពិសេសលក្ខណៈអំណោយផលពីធម្មជាតិតាមរម្យណីយដ្ឋានជាច្រើនតំបន់ខុសគ្នា។ លោកថា ខេត្ដនេះបានរៀបចំលម្អក្រុងតាំងតែកំឡុងចុងខែមីនាមកម្លេះទាំងតាមស្ថាប័នរដ្ឋ និង តាមតំបន់រម្យណីដ្ឋាទាំងអស់នាពេលនេះគឺរៀបរយហើយ។
អភិបាលខេត្ដរូបព្រះវិហារបានបង្ហាញឲ្យដឹងថា រម្យណីដ្ឋានដែលរៀបចំហើយ ហើយគ្រោងនឹងរៀបចំជាកម្មវិធីកំសាន្ដយ៉ាងសម្បូរបែបនោះគឺបានការចូលរួមពី អាជ្ញាធរជាតិអប្សរា អាជ្ញាធរប្រាសាទជាដើម។ រម្យណីយដ្ឋានសំខាន់ៗដែលនឹងរៀបចំនោះរួមមាន ប្រាសាទព្រះវិហារ ប្រាសាទកោះកេរ្ដ៍ ប្រាសាទរម្យណីដ្ឋានកំពង់ស្វាយ និង រម្យណីដ្ឋានទឹកធ្លាក់ព្រះនិមិត្ដ នេះគឺជារម្យណីដ្ឋានសំខាន់ៗដែលលោកបានជម្រាបដល់ពលរដ្ឋខ្មែរដែលមានបំណងចង់ទៅកំសាន្ដក្នុងខេត្ដព្រះហារឆ្នាំនេះឲ្យបានដឹងពីគម្រោងរបស់លោក ។
លោក អ៊ំ ម៉ារ៉ា បាននិយាយទៀតថា ខេត្ដព្រះវិហារក៏មានវត្ដដែលពលរដ្ឋតែងទៅច្រើនជាងគេមានពីរវត្ដ រួមមាន វត្ដតាសែង ស្ថិននៅឃុំរណៈសិរ្ស និង វត្ដពោធិ៍ ព្រោះវត្ដពីរនេះមានទីតាំនៅជិតទីរួមខេត្ដ ហើយក៏ព្រោះជាវត្ដដែលល្បីឈ្មោះផងដែរ។
លោកបន្ថែមថា «យើងបានសហការជាមួយអាជ្ញាធរជាតិអប្សរា អាជ្ញាធរប្រាសាទ និងក្រុមហ៊ុន ដើម្បីរៀបចំឲ្យមានលេងល្បែងប្រជាប្រិយ៍រាំកំសាន្ដផងដែរ ភាគច្រើននៅតាមវត្ដអារាមគឺលោកគ្រូចៅអធិការនៅតាមវត្ដជាអ្នករៀបចំចាត់ចែងឲ្យមានការលេងល្បែងប្រជាប្រិយ៍ផ្សេងៗ ហើយនៅក្នុងខេត្ដព្រះវិហារនេះវត្ដដែលគេពេញនិយមទៅជាងគេនោះគឺវត្ដិរណៈសេរ្យ និង វត្ដពោធិ៍ វត្ដទាំងពីរហ្នឹងដែលបងប្អូនពេញនិយមទៅលេងជាងគេ» ។
អភិបាលខេត្ដព្រះវិហារបន្ថែមថា ក្នុងឆ្នាំ២០១៦នេះលោករំពឹងថាការខិតខំប្រឹងប្រែងរបស់លោកនិងក្រុមការងារទាំងអាចទាក់ទាញភ្ញៀវទេសចរណ៍ឲ្យមានកំណើនច្រើនជាងឆ្នាំមុនទៀតព្រោះឆ្នាំនេះខេត្ដព្រះវិហារបានព្យាយាមរៀបចំទីកន្លែងកំសាន្ដឲ្យកាន់តែល្អប្រសើរ និង មានសោភ័ណ្ឌភាពលើសពីឆ្នាំមុនៗ ។
ជាងនេះទៀតលោក អ៊ំ ម៉ារ៉ា បានបញ្ជាក់ថា សម្រាប់ភ្ញៀវទេសចរណ៍ទាំងជាតិ និង អន្ដរជាតិសូមកុំបារម្ភពីការតម្លើងថ្លៃបន្ទប់និងចំណីអារហារផ្សេងៗ ព្រោះខេត្ដព្រះវិហារប្រជាពលរដ្ឋមានក្រមសីលធម៍ហើយ ម្យ៉ាងពលរដ្ឋគឺចង់ឲ្យមានភ្ញៀវទៅទស្សនាខេត្ដឲ្យកាន់តែច្រើនដើម្បីជួយបង្កើនសេដ្ឋរបស់ពួកគាត់ ។
លោក អ៊ំ ម៉ារ៉ា បានអំពាវនាវដល់ពលរដ្ឋកម្ពុជាគួរចំណាយពេលខ្លះដើម្បីទស្សនាទឹកដីនៃខេត្ដព្រះវិហារយ៉ាងហោចណាស់ក៏ម្ដងដែរដើម្បីឲ្យបានដឹងថាតើក្នុងខេត្ដមួយនេះមានអ្វីខ្លះល្អនិងទាក់ទាញអារម្មណ៍ជាច្រើនដែលក្នុងនាមលោកជាអភិបាលខេត្ដពុំអាចជម្រាបជួនអស់។
«ខ្ញុំសូមអំពាវនាវដល់ពលរដ្ឋរស់នៅជិតឆ្ងាយទាំងអស់ សូមអញ្ជើញមកលេងខេត្ដព្រះវិហារ ក្នុងឱកាស់ចូឆ្នាំថ្មីនេះដែលយើងមានរម្យណីយដ្ឋានជាច្រើនដូចជា ប្រាសាទព្រះវិហា ប្រាសាទកោះកេរ្ដ៍ និង រម្យណីយដ្ឋាទឹកធ្លាក់នេះឯង»។
បុណ្យចូលឆ្នាំ នៅឆ្នាំនេះ ត្រូវប្រារព្វធ្វើឡើង រយៈពេល ៤ថ្ងៃ គឺចាប់ពីថ្ងៃទី១៣ មេសាដល់ ថ្ងៃទី ១៦ មេសា ហើយបើតាម ទំលាប់ អ្នកក្រុង ត្រូវចាកចេញទៅកាន់ស្រុកកំណើតនិង អ្នកខ្លះទៅលេង កំសាន្តទី ជនបទ និង ទស្សនារមណីយដ្ឋាន ប្រវត្តិសាស្ត្រនិងធម្មជាតិជាដើម ៕
